दाङमा आज लिट्रेचर फेस्टिबल

A+ A A-

दाङमा आज एकदिने दाङ लिट्रेचर मिनी फेस्टिबल–२०७६ हुने भएको छ । उदाहरण समूह नेपालको आयोजनामा दसैंकाे अवसर पारेर आज फूलपातीको दिन उक्त कार्यक्रम आयाेजना हुने भएकाे आयाेजकले बताएका हुन् ।

५ वर्षदेखि दाङसहित साविक राप्तीका विभिन्न जिल्लामा साहित्य, संगीत र कलाको क्षेत्रमा काम गर्दै आएको उदाहरण समूह, नेपालले दसैंको अवसर पारेर लिट्रेचर मिनी फेस्टिबल– २०७६ गर्न थालेको समूहका अभियन्ता नवीन अभिलाषीले जानकारी दिए ।

उदाहरण समूहले दाङ र काठमाडाैंको बीचमा देखिएको दुरी र खाडललाई केन्द्रमा राखेर बहस, अन्तर्क्रिया र साहित्यिक रचना वाचनका विभिन्न कार्यक्रमहरू हुने बताएको छ । राप्तीको भूगोलबाट काठमाडाैं र विभिन्न जिल्लामा बस्ने १५० बढी कवि, लेखक, पत्रकार, कलाकार, समालोचक, राजनीतिक व्यक्तिहरू सहभागी हुनेछन् ।

कार्यक्रम ३ सत्रमा सम्पन्न हुनेछ । डराइरहने दाङ, कराइरहने काठमाडाैं, सुदूरका सञ्चारमा सिर्जना र गाउँ फर्किरहेका अक्षरहरू‘ शीर्षकका तीन सत्रमा आयोजना गरिने कार्यक्रममा दाङसहित काठमाडाैंमा बसेर निरन्तर साहित्यको क्षेत्रमा काम गर्दै आएका व्यक्तिहरू सहभागी हुने आयोजकले बताएको छ ।

डराइरहने दाङ, कराइरहने काठमाडाैं नामक बहसमा पूर्वप्राज्ञ तथा वरिष्ठ समालोचक डा. अमर गिरी, कथाकार नवीन विभाष र कवि विष्णु सन्यासको बहस हुनेछ भने सुदूरका सञ्चारमा सिर्जना नामक बहसमा दाङका सञ्चारमाध्यममा साहित्यको उपस्थितिका बारेमा चर्चा हुनेछ ।

राप्ती साहित्य परिषद्का वरिष्ठ उपाध्यक्ष टीकाराम उदासी, बाह्रखरीका साहित्य तथा कला सम्पादक लेनिन बन्जाडे र पत्रकार नरेन्द्र केसीको बहस हुने आयोजक उदाहरण समूह नेपालले बताएको छ । तेस्रो सत्रमा राप्तीको भूगोलमा जन्मिएर दसैं मान्न गाउँ फर्किएका कवि तथा साहित्यकारहरूको रचना वाचन कार्यक्रम रहेको छ । गाउँ फर्किरहेका अक्षरहरू‘ शीर्षकको सत्रमा करिब दर्जन कविहरूले रचना बाचन गर्ने उदाहरण समूहका घनश्याम अस्तित्वले बताए ।

नेपाली कला, साहित्य र संगीतमा देखा परेको मोफसलमा सिर्जनात्मक र हस्तक्षेपकारी भूमिका खेल्ने उद्देश्यले २०७१ सालमा कलेज कविता अभियानमार्फत सुरु भएको युवा स्रष्टाहरूको यो अभियान २०७३ सालदेखि उदाहरण समूह, नेपालको नामले काम गर्दै आएको छ ।

प्रकाशित मिति: शनिबार, असोज १८, २०७६ १०:१९