मन्त्रीको आलोचना हुने भएपछि लाइभ नगरिएको कांग्रेस बैठकमा सरकारकाे कामप्रति चर्काे असन्तुष्टि

मन्त्रीको आलोचना हुने भएपछि लाइभ नगरिएको कांग्रेस बैठकमा सरकारकाे कामप्रति चर्काे असन्तुष्टि

A+ A A-

बिहीबार सुरु कांग्रेस केन्द्रीय समिति बैठक लाइभ भएन । १ बजे बोलाइएको बैठकको १ घण्टाअघि प्रचार विभाग प्रमुख मीन विश्वकर्माले प्राविधिक कारणले लाइभ गर्न असमर्थ रहेको र जेनेरेटरको खोजी भैरहेको बताए ।

बैठक २ बजे सुरु भयो । बैठक जारी रहँदा एक पदाधिकारीलाई शिलापत्रले सोध्यो, ‘मन्त्रीहरूको कार्यसम्पादनमा प्रश्न उठ्ने र आलोचना हुने भएपछि लाइभ नगरेको हो ?’ जवाफमा ती पदाधिकारीले भने, 'हो । अरु प्रेसर पनि आउँछ । सबै कुरा मिलाउनै पर्छ । के गर्नु यस्तै छ ।’

साउन पहिलो हप्ता भएको केन्द्रीय समिति बैठक लाइभ गरेको कांग्रेसले लोकतान्त्रिक पार्टीको सबैकुरा पारदर्शी हुन्छ भनेर लोकतान्त्रिक पार्टीको एक अंग भएको दाबी गरेको थियो । त्यसपछि संसदको तेस्रो दल माओवादीभित्र पनि केन्द्रीय समिति लाइभ गर्ने विषयले प्रवेश पाएको थियो तर निर्णय भएन । दोस्रो ठूलो दल एमालेभित्र छलफल भए पनि अध्यक्ष केपी शर्मा ओलीले सुन्न चाहेनन् ।

अरु पार्टीलाई पनि लाइभको बाटोमा हिँड्ने बहस सिर्जना गरेको कांग्रेसले मन्त्रीहरूको चर्को आलोचना हुने भएपछि बैठकको लाइभ रोक्यो । त्यति मात्र होइन आसन्न राष्ट्रियसभाको चुनावको विषयलाई लिएर लफडा हुन सक्ने भएर लाइभ रोक्यो ।

बैठकमा उठ्ने एजेन्डामा पनि केन्द्रीय सदस्य सन्तुष्ट छैनन् । १५औँ महाधिवेशनमा आफू पदाधिकारीको उम्मेदवार रहने दाबी गर्ने एक केन्द्रीय सदस्य रुष्ट थिए । ‘राष्ट्रियसभाको चुनावको मुखमा छौँ के एजेन्डा लिएर जाने था छैन यार !’ उनले भने । ती सदस्य यत्तिमै रोकिएनन् । समसामयिक विषयमा पनि बैठकले अपनत्व लिन नसकेपछि चर्को सुनिए । ‘सहकारीपीडित छन्, यो बारेमा एजेन्डा बन्न पर्दैन ? ...’ उनी थप्दै थिए ।

बैठक लाइभ हुन्छ भनेर उत्साही हुँदै पुगेका केन्द्रीय सदस्यहरू पनि त्यसो नहुँदा गुनासो गर्दै थिए । ‘लाइभ हुन्छ भनेर उत्साही भएर आएका थियौँ । हाम्रा कुरा लाइभ हुन्छ के गर्छौं भनेर जनतालाई बताउन पाइन्छ भनेर खुसी थियौँ तर भएन । यो पनि स्वीकार गर्नैपर्छ,’ केन्द्रीय सदस्य डिला संग्रौलाले भनिन् ।

जनजीवन, जनजीविकाका जनसवालका कुराहरू सम्बोधन भए कि भएन यसलाई केन्द्रीय समितिमा खुला छलफल बनाउन केन्द्रीय सदस्यले दबाब दिएका थिए । त्यसमा पनि सभापति शेरबहादुर देउवाको कार्यशैलीको चर्को आलोचना हुने पनि थिएन । यस्तोमा संस्थापन पक्षको आरोप थियो भित्र एउटा कुरा गरेर बाहिर अर्को कुरा गर्ने ?

‘आलोचना गर्दा पनि मन्त्री नपाएर आलोचना गर्‍यो भन्ने भाष्य सिर्जना हुन्छ । हामीले डेलिभरी दिनुपर्छ । जनतासँग कांग्रेस मात्र होइन जनतासँग सांसद कार्यक्रम ल्याएर संसदसँग पनि जनतालाई जोड्नुपर्छ,’ सांसद तथा केन्द्रीय सदीय दीपक गिरीले भने ।

स्वास्थ्यमन्त्रीको ब्रिफ

बिहीबार मन्त्रिपरिषद् बैठक भएकाले बैठकमा हाजिर जनाएर मन्त्रीहरू सिंहदरबार हानिए । स्वास्थ्यमन्त्री मोहनबहादुर बस्नेतले कामको ब्रिफ गरे । मन्त्री बस्नेतले आफूले गरेको कामको फेहरिस्त सुनाए ।

एक कुन्द्रीय सदस्यका अनुसार मन्त्री बस्नेतले ८ सय चिकित्सकको काज फिर्ता गर्ने योजना सुनाए । ‘८ सय चिकित्सकको काज फिर्ता गर्ने कुरा भएको छ,’ ती सदस्यले मन्त्रीको ब्रिफ शिलापत्रसँग भने, ‘स्वास्थ्यमा दरबन्दी पूरा भएको छैन । अहिले ९२ हजार दरबन्दी चाहिने हो । ३० हजार दरबन्दी खुलाउने प्रयास भइरहेको छ । स्वास्थ बीमा कार्यान्वयका लागि काम गरेको छु ।’ बस्नेतले ७५३ स्थानीय तहमा स्वास्थ भवन बनाउन पैसा नभएको बताएको ती केन्द्रीय सदस्यले जानकारी दिए ।

राष्ट्रियसभामा अवसर नपाउनेलाइ देऊ

बैठकमा राष्ट्रियसभामा पटक-पटक अवसर पाएकालाई लैजान नहुने पक्षमा चर्को आवाज थियो । केन्द्रीय सदस्य देवेन्द्र कँडेलले मापदण्ड बनाएर उम्मेदवार उठाउनपर्नेमा जोड दिए । ‘विभिन्न तहमा लडेर हारेकालाई उमेदबार बनाउनुहुन्न । अवसर नपाएकाहरूलाई अवसर दिउँ । मापदण्ड बनाउँ,’ बैठकमा कँडेलले भने ।

अर्का केन्द्रीय सदस्य राजिव कोइरालाले हारेकालाई उम्मेदवार बनाउने हो भने आफूलाई पनि उम्मेदवार बनाउन माग गरे । उनको माग हारेकालाई उम्मेदवार बनाउन हुँदैन भन्ने दबाब दिनका लागि थियो ।

‘हारेकाहरूलाई राष्ट्रियसभा उम्मेदवार बनाउने भए मैले पनि चुनाव हारेको हो । मलाई पनि उम्मेदवार बनाऔँ । मापदण्ड बनाउँ, चुनाव हारेकालाई उमेदवार नबनाऔँ,’ कोइरालाले बैठकमा भने ।

त्यस्तै केन्द्रीय सदस्य डिला संग्रौलाले अवसरको न्यायोचित वितरण हुनुपर्ने बताइन् । अर्का केन्द्रीय सदस्य कर्ण बुढाले पनि राष्ट्रियसभामा धेरै अवसर लिइसकेकाले नलिन प्रस्ताव गरेका थिए ।

मन्त्री र सरकारको काम प्रभावकारी भएन

बैठकमा पार्टीबाट सरकारमा सहभागी मन्त्री र सरकारको काम प्रभावकारी नभएको विषयले प्राथमिकता पायो । ‘यसअघिको बैठकमा हाम्रा केन्द्रीय सदस्यले मन्त्रीको पफर्मेन्स भएन भन्ने थियो । कार्यकर्ताले अनि त्यही भन्छन्,’ संग्रौलाले भनिन् ।

केन्द्रीय सदस्य दिलेन्द्र बडूले प्रधानमन्त्रीले भनेका कुराहरूको बारेमा पनि समीक्षा हुनुपर्ने बताए । केन्द्रीय सदस्य कोइरालाले सरकारले नगरेको अपजसको जिम्मा कांग्रेसले लिने र जस कसले लिने भनेर प्रश्न गरे । ‘सरकार भएको अनुभूति भएन । अपजस हामीले लिने जस कसले लिने ? हाम्रा मन्त्री गुटका आधारमा काम गर्ने भए,’ कोइरालाले भने ।

अर्का केन्द्रीय सदस्य नैनसिंह महरले तीनै तहको सरकारका बारेमा छलफल गर्नुपर्ने बताए । बैठकमा केन्द्रीय सदस्य कृष्णचन्द्र नेपाली पोखरेलले सरकारको प्रतिरक्षा कसैले गर्न नसकेको बताए । ‘प्रधानमन्त्री छटपटाउनुभयो । सरकारको डिफेन्स कसैले गर्न सकेन,’ बैठकमा उनले भने ।

प्रकाशित मिति: बिहीबार, पुस १२, २०८० २०:३२