के प्यालेस्टाइनीको शवबाट इजरायली सेनाले अंगहरू तस्करी गरेका हुन् ? (भिडियो)

A+ A A-

प्यालेस्टाइनी लडाकु समूह हमास र इजरायलबीचको युद्धमा इजरायली सेनाहरूले धेरैपटक ज्यादती गरेको घटनाहरू सार्वजनिक भइसकेका छन् ।

इजरायली सेनाहरूले गाजामा प्यालेस्टाइनीहरूलाई अर्धनग्न बनाएर गिरफ्तार गरेको, निजी घरहरूमा घुसेर खाद्यपदार्थ जलाएको, मस्जिदमा बम पड्काएर हाँसेको भिडियोहरू त सार्वजनिक नै भइसकेका छन् । त्यति मात्र नभएर गाजामा निर्दोष बालबालिका, महिला र वृद्धहरू मारिएका छन् ।

इजरायलले भनेको आत्मरक्षा यतिबेला बृहत आक्रमण र ज्यादतीमा परिणत भएको टिप्पणी भइरहँदा पनि अन्तर्राष्ट्रिय समुदायको दबाबका बाबजुद उ युद्धविराम गर्न मानिरहेको छैन ।

यस्तो अवस्थामा अधिकारवादी संस्था युरो–मेड ह्युमन राइट्स मनिटरले इजरायली ज्यादतीबारे नयाँ खुलासा गरेको छ । उक्त संस्थाको दाबीअनुसार मृत प्यालेस्टाइनीहरूको शवहरूबाट इजरायली सेनाले अंगहरू तस्करी गर्ने गरेका छन् । हालसम्म इजरायली आक्रमणले गाजा स्ट्रिपमा २० हजारभन्दा बढी मानिस मारिएका छन् ।

जसमध्ये पछिल्लो समय कैयौं प्यालेस्टाइनी शवहरूको शरीरका महत्वपूर्ण अंगजस्तै मुटु, कलेजो, मृगौला गायब भएको पाइएको हो । युयुरो–मेड ह्युमन राइट्स मनिटरले इजरायली सेनाले मृतक प्यालेस्टिनीहरूको अंग चोरी गरेको भन्दै चिन्ता व्यक्त गरेको छ । यस संस्थाले स्वतन्त्र अन्तर्राष्ट्रिय अनुसन्धानको लागि आग्रह पनि गरेको छ ।

उक्त संस्थाले इजरायली सेनाहरूले उत्तरी र दक्षिणी गाजाका अस्पतालहरूबाट शवहरू जबर्जस्ती जफत गरेको पनि बताएको छ ।

इजरायली सरकार र सेनाले यी आरोपहरूमा अझै कुनै प्रतिक्रिया जनाएको छैन । तर इजरायलले प्यालेस्टिनी शवहरू गैरकानुनी रूपमा प्रयोग गरेको आरोपहरू वर्षौदेखि लाग्ने गरेको छ । त्यस्ता आरोपमा इजरायलले परिवारको सहमति बिना मृतकको शरीर आफूहरूले कहिल्यै प्रयोग नगरेको बताउने गरेको छ ।

‘ओभर दिएर डेड बडिज’ नामक पुस्तकमा इजरायलकै डाक्टर मिरा वेइसले इजरायली विश्वविद्यालयहरूमा चिकित्सा अनुसन्धान र इजरायली बिरामीहरूमा प्रत्यारोपण गर्नका लागि सन् १९९६ र २००२ को बीचमा मृत प्यालेस्टिनीहरूबाट अंग संकलन गरेको आरोप लगाएकी छन् । जसले पनि इजरायली सेनाले पछिल्लो समय अंगहरू तस्करी गरेको आरोपलाई पुष्टि गर्न मद्दत पुग्ने बताइएको छ । युरो न्युजको सहयोगमा