कोरोनाको नयाँ भेरियन्ट ‘जेएनवान’ मानव स्वास्थ्यका लागि कति घातक ? (भिडियो)

A+ A A-

पछिल्लो समय कोरोनाको जेएनवान नामक नयाँ भेरिएन्ट चीन, अमेरिका, बेलायत तथा क्यानडालगायत विश्वका करिब ४१ राष्ट्रमा देखिएको विश्व स्वास्थ्य संगठन (डब्लूएचओ) ले जनाएको छ ।

गत हप्ता छिमेकी मुलुक भारतको दक्षिणी राज्य केरलामा पहिलोपल्ट देखिएको कोरोना जेएनवान भेरिएन्टबाट पछिल्लो २४ घण्टामा भारतमा ३५८ जना नयाँ संक्रमित देखापरेका छन् भने हालसम्म छ जनाले ज्यान गुमाइसकेको भारतीय सञ्चारमाध्यमले जनाएका छन् ।

डब्लूएचओले 'भेरियन्ट अफ इन्ट्रेस्ट'अन्तर्गत राखेको जेएनवान हालसम्म नेपालमा देखा नपरेको शुक्रराज ट्रपिकल तथा सरुवा रोग अस्पतालका मेडिकल अधिकृत डा. प्रेमकिशोर साह बताउँछन् ।

मानव स्वास्थ्यका लागि अत्यधिक घातक नरहे पनि विश्वभर तीव्र रूपमा फैलिरहेका कारण जेएनवानलाई निरीक्षणमा राख्नुपर्ने भएका कारण डब्लूएचओले 'भेरियन्ट अफ इन्ट्रेस्ट'का रूपमा राखेको साहको भनाइ छ ।

उनका अनुसार कोरोना मात्र नभएर सबै भाइरसहरूमा म्युटेसन हुनु स्वाभाविक हो । धेरै म्युटेसनले हामीलाई असर गर्दैन । कुनैकुनै म्युटेसनले मात्र असर गर्ने हो । कोरोनाको सवालमा यसअघि पनि धेरैपटक म्युटेसन भइसकेको हो, जसमा मार्स तथा सार्स वन पर्दछन् ।

पछिल्लो समय देखिएको कोरोनाको म्युटेसन जेएनवानको अन्तर्राष्ट्रिय रिपोर्टलाई आधार मान्दा यसको संक्रमण दर तीव्र भए पनि मृत्युदर निकै थोरै छ । लक्षण हेर्दा पनि रुघाखोकी, ज्वरो आउने, टाउको दुख्ने, चक्कर, बान्ता आउने तथा शरीर दुख्नेलगायत पुरानो म्युटेसनभन्दा धेरै फरक छैन । संक्रमितमध्ये धेरैमा सामान्य औषधिको प्रयोगबाट जेएनवान ठीक भएको पाइएको छ । त्यसैले हामीले अहिलेकै अवस्थामा त्रसित भइहाल्नुपर्ने अवस्था नरहेको डा. साह बताउँछन् ।

यद्यपि हामीले कोरोनाविरुद्ध मास्क लगाउने, सामाजिक दूरी कायम गर्ने, धेरै भिडभाडमा नजाने तथा हातमा स्यानिटाइज गर्नेजस्ता प्रोटोकललाई भने निरन्तरता दिइरहनुपर्ने साहको भनाइ छ ।