आप्रवासी नियन्त्रणमा मेक्सिकोले अमेरिकालाई सघाउने (भिडियो)

A+ A A-

मेक्सिकोले अवैध आप्रवासी नियन्त्रणमा अमेरिकी सरकारलाई मद्दत गर्ने बताएको छ । मेक्सिकोका राष्ट्रपति आन्द्रेस म्यानुएल लोपेज ओब्राडोरले शुक्रबार आफ्नो सरकारले आप्रवासनलाई नियन्त्रण गर्ने उपायहरूलाई सुदृढ बनाउने बताएका हुन् ।

उनका अनुसार अमेरिकाले पछिल्लो समय सीमा क्षेत्रमा अवैध आप्रवासको समस्या गम्भीर रुपले खेपिरहेको छ । मेक्सिकोमा आप्रवासनलाई नियन्त्रण गर्ने उपायहरू सुदृढ पारिँदा अमेरिकालाई अवैध आप्रवासनको सामना गर्न सहज हुने उनको भनाइ छ ।

मेक्सिकन राष्ट्रपति ओब्राडोरले गतहप्ता अमेरिकी समकक्षी जो बाइडेनसँग टेलिफोन कुरा गरेका थिए । सो कुराकानीको भोलिपल्टै शुक्रबार उनले अमेरिकालाई आप्रवासी नियन्त्रणमा सहयोग गर्ने अभिव्यक्ति दिएका हुन् ।

उक्त टेलिफोन वार्तामा दुवै नेताले साझा सीमा क्षेत्रमा आप्रवासीका कारण व्यापार प्रभावित भएकाले दुवै देशले शक्तिको प्रयोग गर्नैपर्ने आवश्यकता भएको बताएका थिए । ओब्राडोरले भनेका छन्,‘हामीले सँगै काम गर्ने समहति जनाएका छौं । हामीले हाम्रा योजनाहरू सुदृढ गर्नेछौं ।’

आप्रवासीहरू सुखी जीवनको चाहनाका कारण अमेरिका पुग्न चाहन्छन् । उनीहरू मेक्सिको हुँदै अमेरिका घुस्न खोजिरहेका हुन्छन् । संयुक्त राष्ट्रसंघका अनुसार कोलम्बिया र मध्य अमेरिकामा फैलिएको खतरनाक जंगलखण्ड ड्यारियन ग्याप पार गर्ने संख्या यो वर्ष पाँच लाखभन्दा बढी भएको छ ।

यस्तै पछिल्लो विवरणअनुसार यसवर्ष मेक्सिको हुँदै अमेरिकी सीमा क्षेत्रमा पुग्ने आप्रवासीको संख्या २५ लाख नाघिसकेको छ । सीमा क्षेत्रमा अमेरिकी सुरक्षाकर्मीहरूले आप्रवासीहरूलाई नियन्त्रण गर्न हरसम्भव प्रयास पनि गरिरहेका छन् ।

(भिडियो)