गाजाका शरणार्थी शिविर लगातार निसानामा, इजरायलमाथि लाग्यो नरसंहारको आरोप (भिडियो)

गाजाका शरणार्थी शिविर लगातार निसानामा, इजरायलमाथि लाग्यो नरसंहारको आरोप (भिडियो)

A+ A A-

गाजा स्ट्रिपको एउटा शरणार्थी शिविरमा इजरायली सेनाले हवाई आक्रमण गरेकाे छ । हमासद्वारा सञ्चालित स्वास्थ्य मन्त्रालयका अनुसार इजरायली आक्रमणमा परी ७० जनाको मृत्यु भएकाे छ । शरणार्थी शिविरमा एक-दुई हप्ताका शिशुको पनि ज्यान गएको छ ।

मन्त्रालयका प्रवक्ता अशरफ अल–कुद्राका अनुसार उक्त क्षेत्रमा मृत्यु हुनेको संख्या बढ्न सक्ने अनुमान छ, किनभने धेरै मानिसहरू गम्भीर घाइते छन् । निर्दोष सर्वसाधारणले शरण लिइरहेको शिविरमा आक्रमण भएपछि इजरायली सेनाको यस हमलालाई नरसंहार भन्न थालिएको छ ।

अशरफले यस विषयमा भनेका छन्, ‘मघाजी शिविरमा जे भइरहेको छ त्यो एउटा भिडभाड आवासीय क्षेत्रमा भइरहेको नरसंहार हो ।’

हमलामा घाइते भएका दर्जनौँ मानिसलाई माघाजी नजिकै रहेको अल–अक्सा अस्पतालमा लगिएको छ । सार्वजनिक भएको फुटेजमा धेरै बालबालिकाको शव रगतले लतपतिएको देखिन्छ ।

यस घटनामा दर्जनौँ मानिसहरू घाइते भएका छन् । साथै, धेरै घरहरू आक्रमणमा ध्वस्त भएका कारण परिवारहरूले जीवित व्यक्तिहरू खोज्ने प्रयासमा भग्नावशेष खोतलिरहेका छन् ।

(भिडियो)

प्यालेस्टिनीहरूलाई इजरायली सेनाले खाली गर्न भनेको ठाउँहरूमध्येमा मघाजी शरणार्थी शिविर पनि एक थियो । माघाजी शिविरमा गत महिना पनि आक्रमण हुँदा कम्तीमा ५० प्यालेस्टाइनी मारिएका थिए ।

यसअघि उत्तरी गाजाको जबलिया शरणार्थी शिविरमा पनि इजरायली सेनाले आक्रमण गरेका थिए जसमा कम्तीमा ९० जना मारिएका थिए । गाजाका अनगिन्ती भवनहरू भत्किँदा मानिसहरू शरणार्थी शिविरमा जीवित हुने आशाका साथ शरण लिन बाध्य छन् ।

तर, ती शरणार्थी शिविरहरू पनि लगातार इजरायली सेनाको निसानामा पर्दै गएका छन् । गाजा स्ट्रिपका कुनैपनि क्षेत्र सुरक्षित नभएको बताउन थालिएको छ ।

प्रकाशित मिति: सोमबार, पुस ९, २०८० १२:२१