बक्सिङ भिडन्तमा वाइल्डर पराजित हुँदा जोसुवा, डुबा र बिभोल विजयी (भिडियो)

A+ A A-

पछिल्लो केही समययता साउदी अरबले फुटबलमा व्यापक लगानी गरेको छ । साउदी सन् २०३४ को फिफा विश्वकप फुटबलको आयोजक नै घोषित भएको छ ।

साउदीले आफ्नो घरेलु लिगमा क्रिस्टियानो रोनाल्डो, नेमार जुनियर, करिम बेन्जेमाजस्ता विश्व चर्चित फुटबलर भित्र्याएर आफ्नो देशको खेलकुद विकासमा टेवा दिन खोजेको स्पष्ट पनि हुन्छ ।

फुटबलमा मात्र नभएर साउदीले बक्सिङ खेललाई पनि उत्तिकै महत्व दिन थालेको छ । साउदीमा बक्सिङका हेभिवेटदेखि सबै विधाका खेलहरू लगातार भइरहेका छन् । केही समय अगाडि मात्र हेभिवेट च्याम्पियनहरू टाइसन फ्युरी र ओलेकस्यान्डर उसेकले साउदीमै आयोजित प्रतियोगितामा फ्रान्सिस एनगानु र ड्यानियल डुबासँग प्रतिस्पर्धा गरेका थिए ।

उक्त खेल हेर्न माइक टाइसन, क्रिस्टियानो रोनाल्डो, सलमान खानदेखि सबै क्षेत्रका चर्चित अनुहार साउदी पुगेका थिए । हिजो शनिबार राति पनि साउदीमै विभिन्न विधामा बक्सिङ प्रतिस्पर्धाहरू भए ।

रियादमा भएको बक्सिङ भिडन्तमा पूर्व डब्लूबीसी च्याम्पियन डियोन्टे वाइल्डर जोसेप पार्करसँग पराजित भए । वाइल्डरले जित्ने अनुमान गरिएता पनि उनले पार्करसँग अंकका आधारमा खेल हारे । तीनै जना निर्णायकले पार्करलाई विजेता घोषित गरेका थिए ।

यस्तै अन्य भिडन्तमा बक्सिङका चर्चित मुहारहरू एन्थोनी जोसुवा, ड्यानियल डुबा र डिमिट्री बिभोल विजयी भए । बेलायती मुक्केबाज जोसुवा र डुबाले खेलमा नकआउट जित निकालेका थिए ।

बिभोलले भने लिनडोन अर्थरलाई युनानिमस डिसिजनको आधारमा जितेका थिए । तीनै जज उनको जितको पक्षमा उभिएका थिए ।

(भिडियो)