जापानमाथि परमाणु हमला गरेको टिनियन टापुमा अमेरिकी सैन्य अड्डा

A+ A A-

चीनसँग सम्बन्ध सुधारको कोसिस भइरहँदा अमेरिकाले चीनलाई लक्षित गर्दै प्रशान्त महासागरमा नयाँ एयर बेस निर्माण गर्ने भएको छ ।

यो यस्तो क्षेत्र हो, जहाँबाट अमेरिकाले दोस्रो विश्वयुद्धका क्रममा जापानमाथि परमाणु बम हमला गरी जापानलाई आत्मसमर्पण गर्न बाध्य पारेको थियो ।

विश्वका दुई प्रमुख आर्थिक शक्ति अमेरिका र चीनबीचको सम्बन्ध केही वर्षदेखि खराब अवस्थामा छ ।

अमेरिकाले सुरु गरेको व्यापार युद्ध र गत वर्ष अमेरिकी तत्कालीन सभामुख न्यान्सी पेलोसीको ताइवान भ्रमणले दुई देशबीचको सम्बन्धमा झनै तिक्तता बढेको छ ।

यही तिक्तता मेटाउन र सम्बन्ध सुधारको कोसिसका लागि गत महिना चिनियाँ राष्ट्रपति सी जिनपिङ अमेरिका पुगेर राष्ट्रपति जो बाइडेनसँग छलफल गरेका थिए ।

तर दुई देशबीच सम्बन्ध तत्कालै सुधार हुने अवस्था देखिएकाे छैन । यही बेला अमेरिकी वायु सेनाले प्रशान्त क्षेत्रको टिनियन हवाई क्षेत्रलाई फेरि सुरु गर्ने योजना बनाएको हो ।

अमेरिकी वायु सेनाले टिनियन द्विपको उत्तरी एयरफिल्ट अझै लामो र चौडा बनाउने तयारी गरेको प्रशान्त वायु सेनाका कमाण्डर जनरल केनेथ विल्सब्याकले बताएका छन् ।

दोस्रो विश्वयुद्धमा जापानमाथि परमाणु बम आक्रमण गरेर आत्मसमर्पण गराएकाले पनि अमेरिकाले प्रशान्त क्षेत्रको यो स्थानलाई हिन्द प्रशान्त र यस क्षेत्रका देशमाथि निगरानी गर्ने उपयुक्त स्थान ठानेको हुनसक्छ । सन् १९४६ मा अमेरिकी एयरफोर्स युनिटले यो स्थान छाडेपछि हाल जंगलमा परिणत भएको छ ।

सीएनएनका अनुसार चीनसँगको बढ्दो तनावको अवस्थामा अमेरिका आफ्नो विकल्पलाई पहिलेको भन्दा शक्तिशाली र व्यापक बनाउने कोशिसमा छ ।

टिनियन द्विप उत्तरी मारियाना द्विप समूहको कमनवेल्थको क्षेत्र हो । ३९ वर्गमाइलमा फैलिएको यो द्विपमा केबल तीन हजार मानिसको बसोबास छ ।

प्रशान्त क्षेत्रमा अमेरिकी इलाकाको हिस्सा रहेको यो क्षेत्र हवाई द्विपबाट करिब ६ हजार किलोमिटर पश्चिममा छ । टिनियन द्विपसँगै सइपन र गुआम टापु पनि छन् । यी क्षेत्रमा पनि अमेरिकाको कब्जा छ । यि तीनवटै द्विप अमेरिकाको सैन्य इतिहासमा निकै महत्वपूर्ण छन् ।

दोस्रो विश्वयुद्धका क्रममा अमेरिकाले यी टापुहरू जापानको कब्जाबाट खोसेको हो । यहाँबाट कोरियाली प्रायद्वीपसँगै चीनलाई निशाना बनाउन सकिन्छ । किनकि यहाँबाट चीन ४ हजार ७ सय किलोमिटर मात्रै टाढा छ ।

प्रकाशित मिति: आइतबार, पुस ८, २०८० १४:५७