मन्त्री फेर्ने तयारीमा रहेका प्रधानमन्त्री प्रचण्डलाई देउवा मनाउन गाह्रो

मन्त्री फेर्ने तयारीमा रहेका प्रधानमन्त्री प्रचण्डलाई देउवा मनाउन गाह्रो

A+ A A-

शुक्रबार प्रधानमन्त्री पुष्पकमल दाहाल प्रचण्डले कार्यकालको एक वर्ष पुगेलगत्तै ‘बोल्ड डिसिजन’ लिने बताए । सुनसरीमा इनरुवा जीआईस सबस्टेसनको उद्घाटन गर्दै उनले मन्त्री पनि फर्न सकिने बताए ।

उनले निरन्तरतामा क्रम भंगता गरेर विकास गर्ने गरेको बताए । ‘१० गते मेरो १ वर्ष पूरा हुन्छ । १० गतेका दिन नै राष्ट्रको नाममा सम्बोधन गर्ने र ११ गतेबाट नयाँ प्रक्रियाबाट विकास र निर्माण गर्ने जनताका कामहरूलाई अघि लाने प्रतिबद्धता व्यक्त गरिसकेको छु । सिंहदरबारमा विभिन्न मन्त्रालयहरूलाई बोलाएर उनीहरूको कामहरू कसरी भएका छन्,’ उनले भने, ‘आफूले प्रतिबद्धता व्यक्त गरेर सहमति जनाएका काम पनि कतिपय मन्त्रालयले पूरा गरेका छैनन् । त्यस्ता मन्त्रालयलाई मन्त्री फेरेर भए पनि कामलाई गति दिने प्रतिबद्धता व्यक्त गरेको छु ।’

प्रधानमन्त्री प्रचण्डले मन्त्री फेर्ने कुरा सत्ता गठबन्धनमा अनौपचारिक रूपमा मन्त्रीको रिपोर्ट कार्ड बुझ्नुअघि नै प्रवेश गराइसकेका छन् । त्यसमा सकरात्मक सन्देश पाए पनि समयमा कुरा मिलेको छैन । अर्कोतर्फ सत्ता साझेदार दल कांग्रेसका मन्त्री हटाइहाल्न कांग्रेस सभापति शेरबहादुर देउवासँग सहमति लिन प्रधानमन्त्रीलाई गाह्रो परिरहेको छ ।

कांग्रेस भन्छ- माओवादीका मन्त्री फेरौँ, माओवादी भन्छ- कांग्रेसका फेरौँ

देशको अर्थतन्त्रमा सुधार नआएको प्रधानमन्त्री प्रचण्डले बुझेका छन् । मंसिर अन्तिम साता प्रधानमन्त्री कार्यालय सिंहदरबारमा भएको मन्त्रीहरूको समीक्षात्मक बैठकमा अर्थमन्त्री डा प्रकाशशरण महतको चर्को आलोचना भएको थियो । विषयगत मन्त्रीहरूलाई समेत अर्थ मन्त्रालयले बजेट नदिएको, फाइल अड्काएको आरोप उनीमाथि लगाइयाे ।

माओवादी अर्थ मन्त्रालयबाट काम नभएकाले अर्थमन्त्री महतलाई हटाउन जोडबल गर्ने पक्षमा छ । माओवादीका मन्त्री फिर्ता बोलाउन पार्टी अध्यक्षसमेत रहेका प्रधानमन्त्री प्रचण्डलाई गाह्रो हुने छैन । यसअघि माओवादीका सामान्य प्रशासनमन्त्री अमनलाल मोदीलाई फिर्ता बोलाएर सो मन्त्रालय जनमत पार्टीलाई दिइएको थियो ।

उता कांग्रेसको पहिलो नजर भने गृहमन्त्री नारायणकाजी श्रेष्ठलाई हटाउनुपर्ने पक्षमा छ । श्रेष्ठले भ्रष्टाचार विरुद्धको अभियानका नाममा मुद्दा गिजोलेको बुझाइ कांग्रेसको छ ।

‘केही मन्त्रीहरू हेरफेर गर्दा हुन्छ कि भनेर प्रधानमन्त्री ज्यूले अनौपचारिक प्रस्ताव ल्याउनुभएको छ । तर, कांग्रेसको महासमिति बैठक छ । त्यसअघि राष्ट्रियसभाको चुनाव छ । यी कुरामा समय दिनुपर्ने भएकाले त्यसपछि सल्लाह गरौंला भनेका छौँ,’ कांग्रेसका प्रचार विभाग प्रमुख मीन विश्वकर्माले शिलापत्रसँग भने, ‘सरकारको १ वर्ष पुग्दैछ । मन्त्रीका बारेमा टिप्पणी गरिहाल्ने बेला भएको छैन । छलफलको विषय बनेको छ । तर, पार्टीको धारणा बनिसकेको छैन ।’

कांग्रेस आफ्ना नेता बालकृष्ण खाँणलाई नक्कली भुटानी शरणार्थी प्रकरणमा थुनामा पठाउने हदसम्म पुगेको र सुन प्रकरणमा माओवादी नेता कृष्णबहादुर महराको नाम आएपछि पछाडि हटेकोमा रुष्ट छ ।

‘भ्रष्टाचारका मुद्दा जिस्क्याउने काम मात्र भयो । गृह मन्त्रालयबाट त्यस्तो काम केही पनि भएन । सुशासनको नाममा भाषण गर्ने, लय पक्रिएर काम गर्ने काम भएन । प्रधानमन्त्री पनि सो कुराबाट सन्तुष्ट भएको देखिँदैन,’ विश्वकर्माले भने । अरु कुन मन्त्रीहरूको कार्यसम्पादन चित्त बुझेको छैन भन्ने प्रश्नमा ‘जनतासँग जोडिएको मन्त्रालयको काम चित्त नबुझेको’ भन्ने जवाफ विश्वकर्माले दिए ।

देउवा मनाउन प्रचण्डलाई गाह्रो

प्रधानमन्त्री प्रचण्डले कांग्रेस सभापति शेरबहादुर देउवासँग मन्त्री हेरफेर गर्नेबारेमा बालवाटारमा पटकपटक छलफल गरेका छन् । तर, देउवालाइ ‘कन्भिन्स’ गर्न सकेका छैनन् । प्रतिक्षारत प्रधानमन्त्री भएका कारण देउवा धेरै कुरा चलाउन चाहँदैनन् । उनी नयाँ काम गर्ने भन्दा पनि भएकोलाई नबिगार्नेमा ध्यान दिएर लागि परेका छन् । अर्थमन्त्री महतलाई हटाउन देउवा तयार नभएको कांग्रेस नेताहरू बताउँछन् ।

अहिले मन्त्री परवर्तन गर्दा एकल पार्टीको भन्दा पनि सबै पार्टीहरूका मन्त्रीहरूको ‘सेट’ नै परिवर्तन गर्नुपर्ने दबाब प्रधानमन्त्रीमाथि छ । उनले देउवालाई माओवादीका सबै मन्त्री र कांग्रेसका मन्त्रीहरू छानेर फेरबदल गर्ने प्रस्ताव पनि गरेका छन् । तर पार्टीकाे आन्तरिक राजनीति बिग्रने भएकाले देउवा महासमिति बैठकअघि र कम्तीमा राष्ट्रियसभा चुनावअघि हेरफेर गर्न चाहाँदैनन् ।

मन्त्री फेरबदलका लागि प्रधानमन्त्री प्रचण्डले पार्टीमा भने छलफल गरेका छैनन् । ‘पार्टीमा छलफल भएको छैन । प्रधानमन्त्रीले नै भनिसक्नुभएको छ । म बोल्ड डिसिजन गर्छु भनेर,’ माओवादीका प्रवक्ता अग्नि सापकोटाले शिलापत्रसँग भने ।

प्रधानमन्त्री प्रचण्ड आर्थिक र विकास निर्माणसँगै जनताका प्रत्यक्ष सरोकार रहने विषयका मन्त्रालयको काम चुस्त होस् र डेलिभरी देखियोस् भन्ने चाहान्छन् । सरकार सञ्चालन गर्नमा लामो समयको कीर्तिमान बनाउन लागेका प्रधानमन्त्रीलाई मन्त्री हटाउन राजनीतिक सहमति अत्यावश्यक भएकाले उनले भनेजस्तै ११ गतेबाटै मन्त्री फेर्न भने सहज अवस्था देखिँदैन ।

प्रकाशित मिति: शुक्रबार, पुस ६, २०८० १९:१२