कर नतिर्ने वर्ल्डलिंकविरुद्ध ‘एक्सन’ मा उत्रियाे सञ्चार मन्त्रालय, विदेशी मुद्रा सटही रोकियो

कर नतिर्ने वर्ल्डलिंकविरुद्ध ‘एक्सन’ मा उत्रियाे सञ्चार मन्त्रालय, विदेशी मुद्रा सटही रोकियो

A+ A A-

निजी इन्टरनेट सेवा प्रदायक कम्पनी वर्ल्डलिंकले दूरसञ्चार रोयल्टी र ग्रामीण दूरसञ्चार विकास कोषबापत सरकारलाई बुझाउनुपर्ने जरिवानासहितको एक अर्ब २५ करोड ३४ लाखभन्दा धेरै रकम नबुझाएका कारण वर्ल्डलिंकलाई दिइएको विदेशी मुद्रा सटहीको सुविधा रोकिएको छ । सञ्चार मन्त्रालयले त्यस्तो सुविधा रोकेको सूचना तथा संचार मन्त्रालयकका प्रवक्ता नेत्रबिक्रम सुबेदीले बताएका छन् ।

‘भुक्तानी माग गर्दा सेवा बन्द गर्नेलगायत विभिन्न प्रकारकार धमक्कीपूर्ण अभिव्यक्ति दिँदै आएको वर्ल्र्डलिंकविरुद्घ हाल मन्त्रालय कठोर भएकै हो । कुनै पनि हालतमा राज्यलाई तिर्नुपर्ने सम्पूंण रकम नतिरेसम्म वर्ल्डलिंकलाई छुटदिइने छैन,’ सुबेदीले शिलापत्रसँग भने । वर्ल्डलिंकले सम्पूर्ण भुक्तानी नबुझाएसम्म विदेशी मुद्रा सटही अनुमति फुकुवा नगरिने उनको भनाइ छ ।

साथै भारतीय सेवा प्रदायक संस्था एयरटेल र टाटाबीच सम्झौता गरी वर्ल्डलिंकले विदेशी मुद्रा अपचलन गरेको आशंका समेत गरिएकाले ती कम्पनीबीच भएको सम्झौतापत्र पनि माग गरिएको उनले बताए ।

वर्ल्डलिंकलगायत इन्टरनेट सेवा प्रदायकहरूले सरकारलाई बुझाउनुपर्ने कर नबुझाएको दाबी गर्दै १६ साउनमा राजस्व चुहावट तथा सरकारी सम्पत्ति हानी–नोक्सानी उपर छानबिनका लागि उजुरी परेपछि सञ्चार, सूचना तथा प्रविधि मन्त्रालयले सहसचिव गौरव गिरीको संयोजकत्वमा समिति गठन गरेको थियो । समितिले २४ भदौमा आर्थिक वर्ष २०६९–७० देखि २०७८–७९ सम्मको १० वर्षको अवधिमा इन्टरनेट सेवाप्रदायकले साढे दुई अर्ब कर छली गरेको प्रतिवेदन पेस गरेको थियो ।

सेवा प्रदायकहरूले दूरसञ्चार रोयल्टी र ग्रामीण दूरसञ्चार विकास कोषबापत सरकारलाई बुझाउनुपर्ने जरिवानासहितको दुई अर्ब ४६ करोड ९० लाख ५९ हजार नौ सय ७८ रुपैंया कर नतिरेको प्रतिवेदनमा उल्लेख छ  । मन्त्रालयको आन्तरिक छानबिन प्रतिवेदनका अनुसार, यसरी कर छल्ने इन्टरनेट सेवा प्रदायकमध्येको वर्ल्डलिंकले मात्रै रोयल्टी, दूरसंचार कोष र जरिवनासहित एक अर्ब २५ करोड ३४ लाखभन्दा धेरै रकम तिनुपर्ने छ ।

त्यस्तै भायनेटले २६ करोड ७६ लाखभन्दा धेरै, सुबिसुले २६ करोड ५२ लाखभन्दा धेरै तथा क्लासिक टेक, टेकमाइन्ड्स नेटवर्क, मर्कन्टाइल, वेभसर्फर, पोखरा इन्टरनेट र नेट म्याक्सले करोडभन्दा माथि कर छली गरेको पाइएको छ ।

प्रकाशित मिति: शुक्रबार, पुस ६, २०८० १६:५७