सुन्दरी प्रतियोगितामार्फत सुन्दरताका प्रचलित मान्यतामा प्रश्न उठाएर प्रशंसा बटुलेकी ग्यारेट (भिडियो)

सुन्दरी प्रतियोगितामार्फत सुन्दरताका प्रचलित मान्यतामा प्रश्न उठाएर प्रशंसा बटुलेकी ग्यारेट (भिडियो)

जेन दीपिका ग्यारेट

A+ A A-

विश्वव्यापी रूपमा सुन्दरी प्रतियोगिताहरू हुने गर्छन् । यस्ता प्रतियोगिताहरू निकै चर्चित हुन्छन् । तर, उत्तिकै विरोधाभाषपूर्ण पनि । नेपालमा पनि हुने यस्ता प्रतियोगिताहरू आलोचनामुक्त भने छैनन् ।

खासमा सुन्दरताको मानक के हो ? सुन्दर हुन आकर्षक जिउडाल हुनैपर्छ ? यी र यस्ता प्रश्नहरू यस्ता प्रतियोगिताहरूका सन्दर्भमा बारम्बार उठ्ने गरेको छ ।

एकातर्फ सुन्दरता आकर्षक शरीरले नभएर बौद्धिकता र व्यवहारले निर्धारण हुने बताइन्छ भने अर्कोतिर ती प्रतियोगिताहरूमा ‘बिउटी विथ ब्रेन’ अर्थात् आकर्षक देखिने बौद्धिक महिला अथवा पुरुषको खोजी गरिन्छ । त्यस्ता प्रतियोगितामा प्रतिस्पर्धाका लागि पातलो ज्यान, अग्लो कद हुनैपर्नेजस्ता नियमहरू समावेश हुन्छन्, जसको चर्को विरोध पनि हुने गरेको छ ।

तर, केही समयअगाडि सम्पन्न 'मिस युनिभर्स नेपाल–२०२३' ले सुन्दरताका केही मान्यतालाई केही हदसम्म तोड्ने प्रयास गरेको छ । सन् २०२३ को मिस युनिभर्स नेपाल जेन दीपिका ग्यारेट अहिले सोही कारण विश्वभर चर्चित बनेकी छन् ।

ग्यारेट हामीले देख्दै आएका सुन्दरीहरूभन्दा भिन्न रूपले सुन्दर छिन् । उनी केही वजनदार र प्लस साइजकी होलिन्, तर उनको सुन्दरतालाई त्यसले छेक्न सकेन । दृढ इच्छाशक्ति र आत्मविश्वासका कारण उनले मिस युनिभर्स नेपालको उपाधि हात पारिन् ।

मिस युनिभर्स नेपाल जितेकी उनले सुन्दरी प्रतियोगितामा नयाँ आयाम थपिन् भन्दा फरक नपर्ला । उनी विश्व मञ्चमा नेपालको प्रतिनिधित्व गर्दै ‘मिस युनिभर्स’ मा गएपछि थप चर्चित बनिन् । अनि सुन्दर हुन आकर्षक जिउडाल चाहिँदैन, बौद्धिकता र विचार प्रथम कुरा हो भनेर स्थापित गर्न सफल भइन् ।

ग्यारेट मिस युनिभर्सको स्टेजमा हिँड्ने पहिलो प्लस साइज मोडल हुन् । उनी आफूजस्तै संसारभरका प्लस साइज महिलाका लागि प्रेरणाको स्रोत बन्न सकिन् । उनको आत्मविश्वासले लाखौँ महिलाहरूलाई छुट्टै ऊर्जा प्राप्त भएको छ । सुन्दरता आफैँमा खोज्न सकिने सन्देश दिएको छ ।

मिस युनिभर्सको शीर्ष २० सम्म पुगेकी ग्यारेट आफ्नो विचारले चर्चित बनिन् । ग्यारेट सन् २००० मा अमेरिकामा जन्मिएकी हुन् । उनकी आमा नेपाली मूलकी र बुबा अमेरिकी नागरिक हुन् । उनको वास्तविक नाम जेन दीपिका एलिजाबेथ बोहोरा ग्यारेट हो । १० वर्षको उमेरमा पहिलोपटक नेपाल आएकी उनी त्यसयता आफ्नो परिवारसँग नेपालमै बस्दै आएकी छिन् । काठमाडौं इन्टरनेसनल स्टडी सेन्टर (किस्क) स्कुलमा अध्ययन गरेकी उनी पेसाले नर्स हुन् ।

लामो समयदेखि आफूले मानसिक स्वास्थ्यसँग संघर्ष गरेको बताउने जेन कैयौँपटक आफैँलाई चोट पुर्‍याउने प्रयास गरेको स्मरण गर्छिन् । कोरोनाकालमा उनको तौल एकैपटक १५ केजीसम्म बढ्यो । शरीर मोटाउँदै जाँदा आफैँलाई माया गर्न छाडेको उनको भनाइ छ । किनभने समाजले उनलाई ‘नराम्री’को संज्ञा दिएको थियो ।

तर, आफ्नो शरीरलाई माया गर्न थालेपछि उनको आत्मविश्वास बढ्यो । फेरि जिउने र समाजका लागि केही गर्ने आँट बढेको छ । उनी भन्छिन्, ‘पछिल्लो केही वर्षयता मैले आफूलाई सबैभन्दा बढी माया गर्न थालेकी छु । मैले आफूजस्तो छु, त्यसलाई नै स्वीकार गर्दै आत्मविश्वास बटुलिरहेकी छु ।’

मिस युनिभर्स नेपाल–२०२३ को उपाधि जितेसँगै उको यो हौसला र आत्मविश्वास झनै बढेर गएको छ । ‘प्लस साइज’ सुन्दरी भन्दै उनको साहसको धेरैले प्रशंसा पनि गरे । तर, अझै पनि शरीरको विषयमा नराम्रो प्रतिक्रिया आउन नछाडेको उनी बताउँछिन् । मोटोपना र अस्वस्थकर जीवनशैलीलाई बढावा दिएको भनेर पनि उनीमाथि आरोप लाग्ने गर्दछ ।

यस विषयमा उनी भन्छिन्, ‘म मोटोपनालाई प्रचार गर्दिनँ, तर मानिसहरूले आफू जस्तो छ त्यसलाई स्वीकार गर्दै आफैँलाई माया गर्नुपर्छ । उदाहरणका लागि हामीले राम्री र आकर्षक देखिन प्लास्टिक सर्जरी गर्नु पर्दैन ।’ आफू स्वस्थ्य हुन शारीरिक व्यायाम भने अनिवार्य गर्नुपर्ने उनी बताउँछिन् ।

जेनलाई लागेको एक प्रकारको रोगका कारण उनको वजन बढिरहन्छ । ‘लकडाउनको समयमा एकैचोटि १५ केजीसम्म तौल बढ्दा म अचम्मित भएकी थिएँ,’ उनी भन्छिन्, ‘डाक्टरलाई देखाउँदा पीसीओएस भएको थाहा पाएँ ।’

पीसीओएस एक प्रकारको रोग हो, यो रोग लाग्दा छिटो तौल बढ्ने, केटाको जस्तै फेसियल हेयर आउने, अनियमित महिनावारी हुनेलगायतका समस्या देखिन्छ । तर, दैनिक शारीरिक व्यायाम गर्ने भएकाले उनले आफ्नो स्वास्थ्यमा त्यसलाई हाबी हुन दिएकी छैनन् । आफ्नो जीवनशैली स्वस्थकर रहेको उनी बताउँछिन् ।

मिस युनिभर्स नेपालको उपाधि जितेपछि जेन मिस युनिभर्समा नेपालको प्रतिनिधित्व गर्दै गत कात्तिकमा एलसाल्भाडोर गएकी थिइन् । ‘म मिस युनिभर्सको उपाधि जित्नका लागि गएकी थिएँ । नेपालमा रहेको सीमित स्रोतसाधनका बाबजुद दैनिक १६ घण्टासम्म प्रशिक्षण गरेर मैले प्रतियोगिताका लागि तयारी गरेकी थिएँ ।’ जेन मिस युनिभर्समा जाँदा आशा नभएर ‘सपना र आत्मविश्वास’ बोकेर गएको बताउँछिन् ।

‘प्लस साइज’ जेनलाई मिस युनिभर्सको उपाधि जित्दै इतिहास रच्ने मन थियो । उपाधि नजिते पनि संसारभरका मानिसहरूको माया बोकेर उनी नेपाल फर्किएकी छन् ।

महिला सशक्तीकरणमा मद्दत पुर्‍याउने भनिएको सुन्दरी प्रतियोगिताहरूमा महिलाको तौल र उचाइ नापेर प्रतियोगी छान्ने गरिन्छ । ‘सुन्दरी प्रतियोगितामा यी नियमहरू बदल्नुपर्छ । यस्तो नियम कायम भइराख्ने हो भने त्यो महिला सशक्तीकरण होइन,’ उनी भन्छिन् ।

सामाजिक कामलाई निरन्तरता दिने बताउँछिन् जेन । उनी आफूसमेत भुक्तभोगी रहेको प्लस साइज महिलाले भोग्ने पीडाका घाउहरूमा मलम बन्न चाहन्छिन् । मानसिक स्वास्थ्य, हर्मोनले स्वास्थ्यलगायतका विषयमा वकालत गर्दै आएकी उनी यही क्षेत्रमा अझै सशक्त भएर लाग्ने बताउँछिन् । मानसिक स्वास्थ्यको क्षेत्रमा उनी नेपाल सरकारसँग मिलेर काम गर्न चाहन्छिन् ।

ग्यारेट थर भएको हुँदा कतिपयले उनलाई नेपाली कसरी भइन् भनेर प्रश्न पनि गर्ने गरेका छन् । ‘मैले म नेपाली हुँ भनेर प्रमाणित गरिरहनु पर्दैन । मेरो थर ग्यारेट भएकै भरमा मलाई नेपाली होइन भन्न मिल्दैन । मेरी आमा नेपाली हुनुहुन्छ, पछिल्लो १३ वर्षदेखि म मेरो परिवारसँग नेपालमै बस्दै आएकी छु,’ उनको जवाफ छ ।

पछिल्लो १३ वर्षदेखि नेपाली हावापानीमा रमाउँदै आएकी जेनलाई दसैँ, तिहारजस्ता चाड खुबै मनपर्छ । दाल, भात, तरकारी उनलाई मनपर्ने परिकार हुन् ।

भिडियो