पार्टीभित्र कामको समीक्षा हुने भएपछि उत्साहित छन् कांग्रेसका मन्त्रीहरू

A+ A A-

बिहीबार सिंहदरबारमा मन्त्रीहरूको कार्य प्रगतिको समीक्षा हुदाँ प्रधानमन्त्री पुष्पकमल दाहाल प्रचण्ड खुसी थिएनन् । विकासमा छलाङ मार्नुपर्छ भनेका प्रधानमन्त्रीले प्रगति विवरणमा त्यस्तो संकेत भेटेनन् । एक मन्त्रीका अनुसार अर्थ मन्त्रालयप्रति सबैको गुनासो थियो । अहिले अर्थको कमाण्ड डा प्रकाशशरण महतले सम्हालेका छन् । उनी कांग्रेसका प्रवक्तासमेत हुन् । त्यस्तै सरकारमा सहभागी मन्त्रीहरूको बारेमा कांग्रेसभित्र पनि गुनासो छ ।

गुनासो आएपछि नेपाली कांग्रेसले आगामी पुस १२ गतेदेखि हुने केन्द्रीय समिति बैठकमा मन्त्रीहरूका कामबारे समीक्षा गर्ने जनाएकाे छ । शुक्रबार बसेको केन्द्रीय कार्यसम्पादन समिति बैठकले पुस १२ देखि केन्द्रीय समिति बैठक गर्ने निर्णय गरेको छ । साेही बैठकमा मन्त्रीहरूकाे कामबारे समीक्षा हुनेछ ।

वर्तमान गठबन्धन सरकारमा कांग्रेसका नौ जना मन्त्री छन् । समीक्षापछि कांग्रेसले मन्त्रीमा नयाँ टिम पठाउने वा पुरानै यथावत राख्ने भन्ने निर्णय लिनेछ । आवश्यक छलफलपछि मात्र सो बारे निर्णय लिइने प्रचार विभाग प्रमुख मीन विश्वकर्मा बताउँछन् ।

उपसभापति पूर्णबहादुर खड्काको नेतृत्वमा कांग्रेस सरकारमा सहभागी छ । उनी उपप्रधानमन्त्री तथा रक्षामन्त्री छन् । अर्का उपसभापति धनराज गुरूङ कानुनमन्त्री, प्रवक्ता महत अर्थमन्त्री, एनपी साउद परराष्ट्रमन्त्री, मोहनबहादुर बस्नेत स्वास्थ्य मन्त्री, रमेश रिजाल उद्योग मन्त्री, सीता गुरूङ शहरी विकासमन्त्री, डिगबहादुर लिम्बू खेलकुदमन्त्री, सुरेन्द्रराज आचार्य महिला, बालबालिका तथा ज्येष्ठ नागरिकमन्त्री छन् ।

प्रधानमन्त्री प्रचण्डले सरकार गठन भएको वर्ष दिनपछि नयाँ ढंगबाट अघि बढ्न चाहेको गठबन्धनका शीर्ष नेताहरूसँग बताउने गरेका छन्। पुस १० गते प्रचण्ड प्रधानमन्त्री भएको एक वर्ष पुग्दैछ । सो दिनपछि नयाँ ढंगले अघि बढ्न चाहेको कांग्रेस नेताहरू बताउँछन् । राष्ट्रियसभा चुनावपछि मन्त्रिपरिषद् पुनर्गठन गर्नेबारे गठबन्धनमा छलफल चलिरहेको छ ।

अर्थमन्त्री महत कांग्रेसका मन्त्रीहरूले सरकारमा रहेर राम्रो काम गरिरहेको दाबी गर्छन् । ‘मन्त्रीहरूका काम कारबाहीबारे कांग्रेसमा कसैले प्रश्न उठाउने ठाउँ छैन । कामबारे नियमित समीक्षा भइराख्छ, यो स्वाभाविक हो । तर मलाई थाहा छैन कि, कांग्रेसका मन्त्रीहरूले काम गरेनन् भनेको कहीँ छ ? त्यस्तो त मैले सुनेको छैन,’ उनले भने ।

कांग्रेसका अन्य मन्त्रीहरू भने कार्य समीक्षा पार्टीभित्र हुन लागेकोमा उत्साहित छन् । ‘पार्टीभित्र कामको समीक्षा हुनु उत्साहको कुरा हो । यसमा हामीले कुन अवस्थामा काम गरेका छौं । साथीहरूले हाम्रो कामलाई कसरी लिनुभएको छ भनेर बुझ्न पाइन्छ । यो सकरात्मक काम हो,’ उद्योगमन्त्री रमेश रिजालले शिलापत्रसँग भने ।

त्यस्तै महिला तथा बालबालिका मन्त्री सुरेन्द्र आचार्य पनि कार्य मूल्याकंन पार्टीभित्र हुनुलाई सकरात्मक रुपमा लिन्छन् । केन्द्रीय सदस्यको जवाफ दिने काम स्वाभाविक रहेको उनले बताए । ‘म उत्साहित छु । कुन मन्त्रीले काम गरे भनेर पार्टीलाई जानकारी गराउनुपर्छ । खर्च विवरण, प्रगति प्रतिवेदन तथ्याकं प्रधानमन्त्रीलाई बुझाइसकेका छौं । राम्रा कामहरू बाहिर आउन सकेका छैनन् । कतिपय कामहरू गर्न सकिएको पनि छैन,’ मन्त्री आचार्यले शिलापत्रसँग भने ।

प्रकाशित मिति: शनिबार, मंसिर ३०, २०८० १४:३३