प्रहरी घेरामा १०८ मिनेट उभिएर आन्दोलन गरेका अभियन्ता ईः, भन्छन्– ललितपुर सद्भावको महानगर हो

प्रहरी घेरामा १०८ मिनेट उभिएर आन्दोलन गरेका अभियन्ता ईः, भन्छन्– ललितपुर सद्भावको महानगर हो

A+ A A-

केही समयअघि फुटपाथ व्यवसाय हटाउने काठमाडौं महानगरको निर्णयविरुद्ध फुटपाथ व्यापारीको पुनःस्थापनाको माग राखेर लगातार ११९ घण्टा उभिएर अभियन्ता ईःले शान्तिपूर्ण आन्दोलन गरे । अन्ततः महानगरपालिकाले फुटपाथ व्यापारीको समस्या सम्बोधनका लागि दुई महिनाभित्र सुझाव पेस गर्न आन्दोलनरत पक्षसमेतको प्रतिनिधित्वमा आठसदस्यीय कार्यदल गठन गर्नेलगायत चारबुँदे सहमति भयो । त्यसपछि अभियन्ता ईःले आन्दोलन स्थगन गरे ।

उनै ईः ललितपुर महानगरको फुटपाथ हटाउने अभियानको विरोधस्वरुप हिजो १०८ मिनेट उभिन ललितपुर महानगरअगाडि पुगे । तर, उनलाई त्यहाँ स्थानीयले प्रतिवाद गरे । त्यहाँबाट नगए जे पनि गर्न सक्नेसम्मको धम्की स्थानीयले दिएपछि उनी उभिने समयभर प्रहरीले उनलाई सुरक्षा नियन्त्रण राख्यो ।

ललितपुर महानगरकै सभ्यताका पक्षमा उभिएको दाबी ईःले गरेका छन् । तर, उनकै विरोधमा ललितपुर महानगरका स्थानीय किन उत्रिए त ? यस विषयमा उनी भन्छन्, ‘स्थानीय तहहरूमध्ये शहरी गरिबप्रति बहस चल्दैगर्दा ललितपुर महानगरको दृष्टिकोणलाई सकारात्मक रूपले हेरिएको थियो । किन भन्दा यलःको आत्मा र सपना छ, विशेष गरी अहिलेको नेतृत्वमा । त्यसैले यो करुणाको महानगर हो । यो सहअस्तित्वको महानगर हो । यो सद्भावको महानगर हो भन्ने थियो ।’

हिजो ललितपुर महानगरले सडक, साइकल, गाडा र परम्परागत सामान नाम्लो, खर्पन तथा डोडालोमा राखेर हातेहिसाबले हिँडेर गर्ने व्यवसायलाई ललितपुर महानगरले जसरी व्यवस्थापन गरेको थियो, त्यो एकदमै उदाहरणीय बनेको थियो । तर एक्कासि एउटा पर्चा बाँडेर ललितपुरको सबैभन्दा ठूलो सडक व्यवसाय रहेको लगनखेलदेखि मंगलबजारसम्मको बाटोको व्यवसाय पूर्ण रूपले बन्द गर्ने भनियो ।

उक्त निर्णय ललितपुर महानगरको पहिचानविपरीत भएका कारण महानगर गलत बाटोमा हिँड्नुअघि त्यहाँ उभिएर आफ्ना कुरा राख्न र महानगरलाई सचेत गराउन खोजेको ई:को भनाइ छ ।

‘त्यस समय आदर्शविपरीत केही व्यक्ति प्रस्तुत भए । यसो हेर्दा त्यहाँ कति चिनिएका अनुहारहरू पनि थिए, जोसँग कुनै समय कतिपय अभियानमा सँगै पनि हिँडेका थियौँ । कतिपय समाजवादी विचार बोक्ने पनि हुनुहुन्थ्यो । कताकता संवाद तथा बुझाइमा कमजोरी भयो होला । हुन त लोकतन्त्रमा सबैलाई आफ्नो विचार राख्ने स्वतन्त्रता रहन्छ । तर, हामीले पनि त्यो स्वतन्त्रताको प्रयोग गर्न पाउनुपर्थ्यो भन्ने मात्र हो,’ ईः सुनाउँछन् ।

ईःले थपे, 'त्यसमा हामीले खोजेको नगर प्रहरीले व्यवस्थापकीय भूमिका खेल्दै व्यवसायीले आफूले गरेको फोहोर हटाएन भने प्रस्ट रूपमा कारबाही हुन्छ भन्नुपर्ने हो, कसैले सडक ओगटेर बसेको छ भने, त्यसरी नबस, अलिक पाखामा बस, कुनामा बस भन्नुपर्ने हो । त्यस्तै, संख्या धेरै छ भने आलोपालो वा समय तोकेर जान, बेलुका पाँचै बजे धेरै हुलमुल भइरहेको छ भने साढे ६ बजेबाट व्यवसाय गर्न पाउने भनेर सम्झाउनुपर्थ्यो, साथै ती व्यवसायबाट कर दस्तुर उठाउने बारेमा पनि बताउनुपर्थ्यो तर नगर प्रहरीबाट त्यस्तो काम भएको छैन ।'

कसैले सम्पदामा आँच आउने गरी व्यवसाय सञ्चालन गरिरहेका छन् भने उनीहरूलाई हटाउँदा केही आपत्ति नहुने उनको भनाइ छ । यी विषयमा नगर प्रहरीको व्यवस्थापकीय भूमिका हुनुपर्ने उनको तर्क छ ।