मन्त्रीको हुटहुटीले सडकमा रङ पोतेर थालिएको द्रुत बस सेवा असफल, व्यवस्थित गर्न बल्ल बन्दै छ योजना (भिडियाे)

मन्त्रीको हुटहुटीले सडकमा रङ पोतेर थालिएको द्रुत बस सेवा असफल, व्यवस्थित गर्न बल्ल बन्दै छ योजना (भिडियाे)

A+ A A-

हाम्रो सरकार र मन्त्री कति अदूरदर्शी छन् भन्ने हेर्न टाढा जानै पर्दैन । द्रुत बस सेवा भन्दै सूर्यविनायक–रत्नपार्क सडक खण्डमा पोतिएको रातो रङ हेरे पुग्छ । हतारमा याेजना अघि बढाएर अहिले व्यवस्थापन गर्न थालिएकाे छ ।

गत असाेजकाे १ र २ गते हतारहतार सडकमा रङ पोत्न लगाइयाे । संविधान दिवसमा केही न केही नयाँ गर्नुपर्छ भन्ने भौतिक पूर्वाधार तथा यातायातमन्त्री प्रकाश ज्वालाकाे हुटहुटी थियाे । सडकमा पाेतिएकाे रङ राम्ररी सुक्न नपाउँदै ३ असोज अर्थात् संविधान दिवसका दिन तामझामका साथ ज्वालाले सूर्यविनायक–रत्नपार्क द्रुत बस सेवाकाे उद्घाटन गरे ।

द्रुत भनिए पनि ती बसहरू ट्राफिक जाममा मात्रै थिएनन्, तिनै बसका कारण सडकको ट्राफिकसमेत अस्तव्यस्त बनेको थियो । यात्रुहरूले द्रुत भनिएको बसमा झनै धेरै समय लागेको गुनासो गरे । सरकारले सडकको गतिलो संरचना नबनाई हचुवाको भरमा सुरु गरेको भन्दै द्रुत बस सेवाको आलोचना पनि त्यत्तिकै भयो । अन्ततः एक महिना नपुग्दै सूर्यविनायक–रत्नपार्क द्रुत बस सेवा बन्द भयो  ।

द्रुत बसको रुटका लागि सडकमा रङ लगाउन र ट्राफिक संकेत राख्न मात्रै साढे २ करोड रुपैयाँ खर्च भएको थियो । सडकमा लगाइएको रङ डेढ महिनामै उड्न थालिसकेको छ ।

१० मंसिरदेखि सूर्यविनायक–रत्नपार्क द्रुत बस सेवा पुनः सञ्चालनमा आएकाे भनिए पनि प्रभावकारी भने छैन । द्रुत बस सेवाको व्यवस्थापन गर्ने निकाय यातायात व्यवस्था विभागका प्रवक्ता ईश्वरीदत्त पनेरु भन्छन्, ‘हामीले सेवा बन्द गरेका थिएनौँ । यातायातको संख्या कम भएकाले चाडपर्वलक्षित भएर त्यसबेला व्यवस्थापन गरेका मात्र थियौँ ।’

उनका अनुसार, दसैँतिहारको समय बस उपत्यकाबाहिर पठाउनुपरेका कारण सडकमा निकै न्यून बस भए, जुन बस नोटिस नै हुन सकेनन् । त्यसैले द्रुत बस सेवा बन्द भएको समाचार आए पनि सम्बन्धित निकायबाट बन्द भएको आधिकारिक निर्णय आएको थिएन । चाडपर्व सकिएलगत्तै द्रुत बस सेवालाई परिस्कृत गरिएको दाबी पनेरुको छ ।

यसअघि बिहान ९ बजेदेखि ११ बजे र साँझ ४ बजेदेखि ६ बजेसम्म सञ्चालन गरिएको द्रुत बस सेवा अहिले भने बिहान आधा घण्टा थप गरेर ८ः३० देखि नै सुरु गरिएको छ । प्रत्येक ३/३ मिनेटमा बस आउने व्यवस्था मिलाइएको पनेरु बताउँछन् ।

रुट मिलाउने, बसको संख्या २५ बाट ३६ पुर्‍याउने, पहिलाको भन्दा आधा घण्टा समय थप्ने मात्र नभएर द्रुत बस सेवालाई प्रविधिमैत्री बनाउनसमेत गृहकार्य भइरहेको उनी बताउँछन् । उनी भन्छन्, 'हाल रत्नपार्कमा यात्रुको संख्या इन्ट्री गर्न गुगल सिटको व्यवस्था गरेका छौँ । जसबाट बस कुन समयमा पुग्यो, कुन समयमा छुट्यो तथा कति यात्रु चढेलगायतका विवरण उक्त गुगल सिटले राख्छ । अहिले दैनिक करिब ४ हजार यात्रुले द्रुत बसबाट सेवा लिइरहेका छन् ।'

सरकारले बिनातयारी हतारहतार हचुवाको भरमा द्रुत बस सेवा ल्याएको आरोपलाई खण्डन गर्दै उनी थप्छन्, 'अहिले रत्नपार्कबाट सूर्यविनायक जाने द्रुत बसले ४२ देखि ४७ मिनेटमा यात्रुलाई पुर्‍याइरहेको छ ।' यात्रुको चाप भएको समयमा मास ट्रान्सपोर्टेसनमार्फत सेवा दिन सकियो भने यात्रुलाई सहज हुनुका साथै उसको समयको बचत भएकाे उनी बताउँछन् । सँगै सडकको सवारी चापको ट्राफिक व्यवस्थापनलाई सहज बनाउने उद्देश्यले प्रधानमन्त्री तथा मन्त्रिपरिषद्को कार्यालयको निर्णयपछि एक कमिटी गठन भएर करिब दुई महिनाको विस्तृत अध्ययनपछि यो योजना ल्याइएको पनेरूकाे भनाइ छ ।

यातायात व्यवस्था विभागका तत्कालीन महानिर्देशकको नेतृत्वमा विज्ञहरूको संलग्नता, सडक इन्जिनियर, वातावरण इन्जिनियर, प्रधानमन्त्री कार्यालयका सहसचिवहरूसहितको कमिटीले ल्याएको द्रुत बस सेवा व्यवस्थापनका साथै दीर्घकालीन बनाउन यातायात व्यवस्था विभागको भूमिका भरपूर रहने पनेरु बताउँछन् । साथै, आगामी दिनमा द्रुत बसलाई प्रविधिमैत्री बनाउन एप निर्माण भइरहेको र आगामी पुस १ गतेदेखि द्रुत बस सेवाको एप सावर्जनिक गर्ने योजना रहेको पनेरु सुनाउँछन् ।

उक्त एपमार्फत यात्रुहरू बस आउने समय हेरेर घरबाट निस्किन सक्छन् । यात्रुले बस कहाँ छ, बिसौनीमा कति समयमा पुग्छलगायत द्रुत बससम्बन्धी सबै जानकारी लिन सक्छन् ।

प्रकाशित मिति: सोमबार, मंसिर २५, २०८० २०:१०