देउवाले ठण्डीमा महासमिति बैठक नगरौँ भन्दा महामन्त्री थापाको प्रतिवाद

A+ A A-

तोकेको समयमा कहिल्यै काम नगर्ने पार्टीको पहिचान बनाएको नेपाली कांग्रेसको १६ पुसदेखि १९ पुससम्म हुने भनिएको महासमिति बैठक निर्धारित मितिमा नहुने लगभग पक्का भएको छ ।

पार्टीले बनाएको वार्षिक क्यालेन्डरअनुसार मंसिर १३ मा महासमिति बैठक हुनुपर्ने थियो । तर, तेस्रोपटक सरेर १६ पुस पुर्‍याइयो । अब सो मितिमा पनि बैठक नहुने देखिएको छ । कांग्रेस सभापति शेरबहादुर देउवालाई महासमिति बैठक पुसमा हुन नसक्ने ब्रिफिङ संस्थापन समूहका नेताहरूले गरेका छन् । सोहीबमोजिम १३ मंसिरमा बसेको पदाधिकारी बैठकमा सभापति देउवाले भने, ‘पुसको ठण्डीमा महासमिति सदस्यहरू काठमाडौं आउन गाह्रो हुन्छ, बैठक दुई महिना सारौँ न ।’

उनको कुरा सुनेपछि उनीनिकट पदाधिकारीहरूले ‘हुन्छ त्यसै गरौँ, बैठक धकेल्दा केही बिग्रिँदैन’ भनेर होमा हो मिसाए । त्यसको प्रतिकार महामन्त्री गगन थापाले गरेको एक पदाधिकारीले बताए । ‘कांग्रेसको महाधिवेशन पुस महिनामा हुने, महासमिति किन नहुने ? यो तर्कसंगत छैन,’ महामन्त्री थापाले बैठकमा भनेका थिए ।

क्यालेन्डरमा मंसिर १३ देखि १५ गतेसम्म महासमिति बैठक गर्ने भनिए पनि तयारी नपुगेपछि दोस्रो मिति मंसिर २९ देखि पुस २ गतेसम्म तय गरिएको थियो । सो समयमा पनि तयारी नपुगेपछि पुस १६ देखि १९ गतेसम्म नयाँ मिति तय गरिएको थियो । अब नयाँ मिति फागुन हुने पदाधिकारीहरू बताउँछन् । माघ ११ गते राष्ट्रियसभा चुनाव छ । त्यसको तयारी गर्नुपर्ने भएकाले महासमिति बैठक सार्नुपर्नेमध्येको एक कारण हो । चुनावको समीक्षालगायतका काम गर्नुपर्ने बहानामा बैठक फेरि धकेलिन सक्छ ।

मंसिर २९ गते बस्ने केन्द्रीय कार्यसम्पादन समितिले महासमिति बैठकबारे निर्णय लिनेछ । बैठकमा महासमिति बैठक सार्ने प्रस्ताव कसले गर्ने भन्नेमा अन्योल देखिएको छ । कार्यतालिकाको प्रस्ताव गर्ने महामन्त्रीद्वय गगन थापा र विश्वप्रकाश शर्मा बैठक सार्न नहुने पक्षमा छन् ।

संस्थापन पक्षले सभापतिलाई नै नयाँ मिति प्रस्ताव गर्नुपर्ने प्रस्ताव राख्न सक्छन् । सभापति देउवा नेतृत्वमा बनाइएको मूल तयारी समितिको बैठक एकपटक पनि बस्न सकेको छैन । उपसभापति पूर्णबहादुर खड्काको नेतृत्वमा नीति निर्माण समिति, महामन्त्री थापाको नेतृत्वमा सांगठनिक प्रतिवेदन र महामन्त्री शर्माको नेतृत्वमा समसामयिक राजनीतिक प्रस्ताव समिति गठन भएको छ । ती समितिका कामहरूसमेत अधुरा छन् । महामन्त्रीहरूको समितिकै काम अन्तिम चरणमा छ । उनीहरूले संयोजन गरेर प्रतिवेदन लेख्नेछन् । उपसभापति खड्का नेतृत्वको समितिको कामले गति लिन नसकेको नेताहरू बताउँछन् ।

रामेछाप, दोलखालगायतका जिल्लाहरूमा महासमिति सदस्य चयनको विवाद चर्को छ । तीसहित १५ जिल्लाका क्षेत्रहरूमा भने समिति सदस्य चयन हुन बाँकी छ । बैठकअघि जिल्ला र प्रदेश सम्मेलन गरिएको छ । ‘महासमित बैठकले नीति अधिवेशनको रूप लिने भएकाले मुख्य कुरा प्रस्ताव हो । पार्टी उपसभापति पूर्ण दाइको नेतृत्वमा पदाधिकारी र विषयविज्ञ व्यक्तिहरूको कमिटी बनेको छ । सो कमिटीबाट काम भइरहेको छ । प्रस्तावहरू तयार हुँदै छन् । हलसमेत बुक भइसकेको छ । सबै कुरा अन्तिम चरणमा छ,’ पार्टी कार्यालय मुख्य सचिव कृष्ण पौडेलले भने ।

उनको दाबीअनुसार महासमिति बैठक सर्ने सम्भावना शून्य छ । ‘बैठक सर्ने सम्भावना शून्य छ । सबै तयारी भइरहेको छ । प्रदेश सम्मेलन पहिलोपटक हुने भएकाले नेताहरू व्यस्त भए पनि तयारी छ,' मुख्य सचिव पौडेलले भने । बाहिर बनाउन खोजिएको भाष्य गलत रहेको उनले बताए ।

महासमति बैठकमा कांग्रेसको निर्वाचन प्रणाली निर्वाचित हुने संख्या, पदाधिकारी र पार्टी कुन मोडलमा जाने भन्ने प्रस्ताव हुने महामन्त्री थापा बताउँछन् । अहिले महिला पदाधिकारी थप गर्ने विषयमा बहस भइरहेको छ । ‘महासमिति बैठकमा पार्टी विधान कस्तो बनाउने भन्ने विषयमा पनि प्रस्ताव हुनेछ । सो प्रस्ताव लिएर कांग्रेस जनताकहाँ जानेछ । त्यहाँ पनि प्रस्तावका बारेमा छलफल हुनेछ,’ महामन्त्री थापाले भने, ‘हामीले पहिला सभापति निर्वाचित अरु मनोनीत गर्ने व्यवस्था गर्‍याैँ । अहिले पदाधिकारी निर्वाचित हुने व्यवस्थामा छौँ । सबै निर्वाचित हुने भए पदाधिकारीलाई अझै समावेशी किन नबनाउने ? यसबारेमा विमर्श हुन्छ ।’

कांग्रेसले बुक गरेको हलको भाडा दैनिक ५ लाख रहेको छ भने महासमिति सदस्यहरूले बसोबासको व्यवस्था आफैँ गर्नुपर्नेछ । त्यस्तै, उनीहरूलाई खानाको व्यवस्था भने पार्टीले गर्नेछ । महासमिति बैठकमा १६५ निर्वाचन क्षेत्रबाट ११ जनाका दरले १८१५ जना महासमिति सदस्य आउनेछन् । त्यस्तै, केन्द्रीय सदस्यहरू, पूर्वकेन्द्रीय सदस्य, प्रवास, भ्रातृ तथा शुभेच्छुक संघसंस्थाबाट पनि महासमिति सदस्य आउने विधानमा उल्लेख छ ।

प्रकाशित मिति: सोमबार, मंसिर २५, २०८० १५:१४