देउवाको बेवास्ताले कांग्रेसले बिर्सियो क्यालेन्डर

A+ A A-

नेपाली कांग्रेस विधि र विधानअनुसार चल्ने पार्टी नभएको फेरि एकपटक देखिएको छ । कांग्रेसले केन्द्रीय समितिबाटै बनाएको कार्यतालिकासमेत लागू गर्न सकेको छैन । गत साउन दोस्रो साता सम्पन्न केन्द्रीय समिति बैठकले वार्षिक कार्यतालिका बनाएर पार्टीलाई बाह्रै महिना चलायमान बनाउने बताएको थियो । तर, बैठकले पारित गरेको सो क्यालेन्डर सभापति शेरबहादुर देउवाको प्राथमिकतामा नपर्दा पार्टीले क्यालेन्डर नै बिर्सिएको छ ।

आफैँले बनाएको क्यालेन्डर लागू नगर्न कांग्रेसलाई विभिन्न बहाना जुटेको छ । जाजरकोट भूकम्प प्रमुख कारण भयो भने अब राष्ट्रियसभा चुनावको तयारी अर्को बहाना बनेकाे छ । कांग्रेसको विधानले सभापतिको स्वीकृतिबिना कुनै पनि कुरा लागू हुन सक्दैन । क्यालेन्डर लागू गर्न सभापतिसँगै उपसभापतिद्वय पूर्णबहादुर खड्का र धनराज गुरुङ तथा महामन्त्रीद्वय गगन थापा र विश्वप्रकाश शर्मा जिम्मेवार हुनुपर्ने हो । तर, मूल नेतृत्वमा रहेका सभापति देउवा नै उदासीन देखिएका छन् ।

क्यालेन्डर कार्यान्वयनमा आएको थियो भने कांग्रेस अहिले ‘जनताको घरदैलो’मा हुने थियो । क्यालेन्डरमा मंसिर १५ देखि माघ १५ गतेसम्म दुईमहिने घरदैलो अभियान चलाउने उल्लेख छ । त्यस्तै, भदौ १० देखि २४ गतेसम्म गर्ने भनिएको समुदायसँग कांग्रेसको संवाद कार्यक्रम पनि हुन सकेन ।

वर्षायाम, अविरल झरी, बाढीपहिरो एवं डेंगी र आँखा पाक्ने रोगजस्ता जनस्वास्थ्यमा प्रत्यक्ष प्रभाव पार्ने महामारी फैलिएको जोखिमपूर्ण अवस्था रहेकाले कार्यक्रम गर्न नसकिएको कांग्रेसको असोज ८ गते सम्पन्न केन्द्रीय समिति बैठकमा बताइएकाे थियाे ।

भदौ महिनामा गर्ने भनेको दिवानसिंह राई स्मृति दिवसमा विचार गोष्ठी, प्रदीप गिरीको स्मरण सभा, भदौ २४ मा गर्ने भनिएको मानसिक स्वास्थ्यसम्बन्धी कार्यक्रम पनि कांग्रेसले गर्न सकेन । यस्तै, भदौ २९ मा बालदिवसको अवसरमा गर्ने भनिएको कांग्रेस विपन्न छात्रवृत्ति अभियान, असोज २ मा गर्ने भनिएको गणेशमान सिंह स्मृति दिवसको आयोजना पनि गर्न सकेन ।

देशको आर्थिक अवस्था शिथिल भएको अवस्थामा आर्थिक कन्क्लेभ गर्न कांग्रेस उत्साहित थियो । तल्लो तहसम्म आर्थिक रूपमा बहस सिर्जना गर्ने गरी कन्क्लेभ सम्पन्न गर्ने महामन्त्री थापाको दाबी थियो । कात्तिक २४ गते सुवर्ण शमशेर स्मृति दिवसको अवसरमा पार्टीको अर्थनीतिसम्बन्धी दुईदिने आर्थिक कन्क्लेभ नै गर्न सकेन ।

‘संगठनका मुख्य कुरा, विभाग बनाउने, भ्रातृ संगठन बनाउने कुरा क्यालेन्डर बनाए पनि, नबनाए पनि जबसम्म सभापतिजी आफैँ यसमा गर्छु भनेर नलागेसम्म समस्या आउँछ,’ महामन्त्री गगन थापाले भने, ‘यो क्यालेन्डर कार्यान्वयन गर्ने सन्दर्भमा पार्टी सभापतिले मात्रै प्राप्त गरेको अधिकार हो । प्रयोग उहाँले नगर्दा समस्या आएका हुन् ।’ सभापतिले गर्नुपर्ने काम नगर्दा के गर्ने भन्नेबारे विधानमा केही नभएको उनले बताए ।

पार्टीका मुख्यसचिव कृष्णप्रसाद पौडेल क्यालेन्डर कार्यान्वयनमा विभिन्न कारणले समयसीमा पालना नभएको बताउँछन् ।

‘कार्यतालिका शतप्रतिशत लागू गर्न खोजेका हौँ । तर, जाजरकोट भूकम्पका कारण पार्टीको पूरै ऊर्जा त्यतै खर्च गरियो । महामन्त्रीहरू फिल्डमा पुगेर आउनुभयो । दाङ, बाँके बर्दिया, सल्यानलगायतका जिल्लाका साथीहरूलाई पनि उता खटाइएको छ । अस्थायी बासस्थान बनाउने काम जारी छ,’ पौडेलले भने, ‘क्यालेन्डर पूर्ण कार्यान्वयन गराउन लागिरहेका छौँ । यसबीचमा जिल्ला र प्रदेश सम्मेलनले केही प्रभावित हुनेछ ।’

क्यालेन्डरमा भदौ १५ गतेसम्म पार्टीका विभाग, भ्रातृ तथा शुभेच्छुक संस्था गठन गरिसक्ने उल्लेख छ । त्यस्तै, प्रत्येक दुई महिनामा केन्द्रीय समिति बैठक बस्ने र मंसिरको दोस्रो साता महासमिति बैठक बस्ने उल्लेख छ ।

कांग्रेसका ७१ विभागमध्ये १८ वटामा मात्रै संयोजक तोकिएको छ । १३ वटा भ्रातृ संस्थाको नेतृत्व तोकिए पनि अधिवेशनको टुंगो छैन । नीति अधिवेशनका सट्टामा गर्ने भनिएकाे महासमिति बैठकका लागि सभापति देउवा संयोजक रहने मूल समारोह समितिको बैठक एकपटक पनि बसेको छैन ।

क्यालेन्डर बनाएर कार्यान्वयनमा नगर्ने प्रवृत्तिले पार्टीलाई घाटा पुर्‍याउने केन्द्रीय सदस्य तथा संसदीय दलका मुख्य सचेक रमेश लेखक बताउँछन् । ‘क्यालेन्डर बनाएर कार्यान्यन नगर्नु राम्रो काम होइन । यसले पार्टीको हित गर्दैन, क्यालेन्डर कार्यान्वयन गर्नुपर्छ,’ उनले भने ।

पार्टीलाई विधि र विधानअनुसार चलाउन नसकेको भन्दै कांग्रेस नेतृत्वको आलोचना हुँदै आएपछि वार्षिक तालिका नै बनाएर व्यवस्थित गर्ने प्रयास भएको थियाे । तर, त्यसको कार्यान्वयमा न नेतृत्व तहले गर्नुपर्छ भन्ने ठानेको छ, न त कार्यान्वयनका लागि दबाब नै दिइएको छ ।

कांग्रेसको क्यालेन्डर

प्रकाशित मिति: शुक्रबार, मंसिर २२, २०८० १९:०६