छानबिनका लागि सभामुखले राजीनामा दिनुपर्छ : गगन थापा

A+ A A-

नेपाली कांग्रेसका केन्द्रीय सदस्य गगन थापाले सभामुख कृष्णबहादुर महरामाथि लागेको बलात्कारको आरोपमाथि निस्पक्ष छानबिन गर्न माग गरेका छन् ।

उनले महारामाथि लागेको आरोपबारे छानबिन हुँदासम्म सभामुख पदबाट अलग हुन समेत आग्रह गरे । उनले सभामुखमाथि लागेको आरोपले सिंगो संसद र सांसदलाई स्तब्ध पारेकाले सभामुख महरामाथिको आरोपबारे अनुसन्धानमा सघाउन सभामुखले पदबाट अगल रहेर बस्नुपर्ने बताए ।

उनले घटनाबाट आफू स्तब्ध बनाएको भन्दै थापाले कानूनी राज्यको सिमाभित्र राखेर प्रचलित घटनाको निस्पक्ष रुपमा छानबिन गरिनुपर्ने बताए ।

बुटवलमा मंगलबार बिहान रिर्पोर्टर्स क्लबले आयोजना गरेको पत्रकार भेटघाट कार्यक्रममा थापाले पदबाट अलग रहेर घटनाको छानबपन गर्न महराले सघाउनुपर्ने बताए ।

घटनाले राज्यको क्षमतामाथि र देशको प्रतिष्ठामाथि आँच आएको भन्दै उनले प्रहरी प्रशासन कसैको दबाब र प्रभावमा नपरी तल्लो तहबाट घटनाको निष्पक्ष छानबिन गर्न माग गरे ।

त्यस्तै उनले पछिल्ला सरकारका गतिविधिले राज्यप्रति जनताको निरासा पैदा गराएको बताए । उनले सरकार खोक्रो बनेको र जनतामा निरासा मात्र छाएको भन्दै दसैं पर्वले सरकारमा रहेकालाई सद्बुद्धि दिन आग्रह गरे ।

उनले सरकारविरुद्ध कांग्रेसले दशै पछाडि संघर्ष गर्नेसमेत बताए । थापाले दसैं अगाडि नै कांग्रेसका सबै भातृ संगठन र प्रदेश संरचनाले पूर्णता पाउने दाबी गरे । कांग्रेसले गठन गरेको छायाँ सरकारले सही रुपमा अगाडि बढन नसकेको थापाले स्वीकार गरे ।

सभामुख महरामाथि संसद सचिवालयमा कार्यरत एक महिला कर्मचारीले आइतबार राति यौन दुर्व्यवहार गरेको आरोप लगाएकी छन् ।