विदेशमा भारतविरोधी व्यक्तिलाई मराउने भारतीय जासुसी एक्सपोज बनाउने घटना

A+ A A-

पछिल्ला केही दिनहरूमा विदेशमा भारतविरोधी गतिविधि गर्नेहरू एकपछि अर्को गरी मारिएका घटनाहरू सार्वजनिक भइरहेका बेला क्यानडाका प्रधानमन्त्री जस्टिन ट्रुडोले भारतले आफ्नो देशका एक नागरिकको हत्या गराएको बताए ।

गत सेप्टेम्बरमा खालिस्तानी अभियन्ता हरदीप सिंह निज्जरको हत्या क्यानडामा भयो । त्यसपछि क्यानडाका प्रधानमन्त्री ट्रुडोले यसमा भारतीय जासुसको हात रहेको भन्दै कडा आपत्ति जनाए । यो ठीक त्यसै बेला भयो, जति बेला भारतमा जी२० को शिखर सम्मेलन आयोजना गरिएको थियो । यो सम्मेलनका लागि भारत आएका क्यानडाका प्रधानमन्त्री ट्रुडोले जति सम्मान पाउनुपर्ने हो, पाएनन् । जसले भारत र क्यानडाबीच केही समस्या उत्पन्न भएको संकेत मिल्यो । जब ट्रुडो क्यानडा पुगे उनले क्यानडाको संसदलाई सम्बोधन गर्दै आफ्नो देशका नागरिक निज्जरको हत्या भारतीय जासुसले गरेको बयान दिए ।

यसपछि भारत र क्यानडाबीच आरोपप्रत्यारोप मात्र चलेन कूटनीतिक सम्बन्धमै चिसोपना बढ्यो । भारत र क्यानडा दुवैले आ–आफ्ना मुलुकस्थित एकअर्काका कूटनीतिज्ञलाई फिर्ता गरे । ट्रुडोले निज्जर हत्यामा भारतको हात रहेको सूचना अमेरिकाले दिएको बताएका थिए । तर, भारतले भने यो आरोप झुटो रहेको बताइरह्यो । यसै कारण अहिले भारत र क्यानडाबीचको सम्बन्ध इतिहासमै सबैभन्दा कमजोर अवस्थामा पुगेको छ ।

यो प्रकरण सेलाउन नपाउँदै अमेरिकाबाट अर्को सनसनीपूर्ण खबर आयो– भारतले अमेरिकी नागरिक रहेका गुरवतपंत सिंह पन्नूको हत्या योजना भएको र सो योजना विफल पारिएको हो । अमेरिकाले यसमा भारतको हात रहेको मात्र बताएन, प्रमाणसमेत रहेको बतायो ।

यसपछि भारत अन्तर्राष्ट्रिय मञ्चमा एक्सपोज भएको छ । अब भारतले अमेरिकी दाबी स्वीकार मात्र गरेको छैन, सो प्रकरणमा संलग्न भारतीय जासुसले भारतको नीतिविपरीत काम गरेको बताएको छ । बिहीबार भारतीय विदेश मन्त्रालयका प्रवक्ता अरिंदम वागचीले अमेरिकामा एक अमेरिकी नागरिकको हत्यामा संलग्नताको विषय चिन्ताजनक मात्र नभई भारतको विदेश नीतिविपरीत भएको बताएका छन् ।

भारतीय सञ्चारमाध्यमहरूका अनुसार भारतीय जासुस निखिल गुप्ताले पन्नूको हत्याका लागि एक जना व्यक्तिलाई हायर गरेको खुलेको छ । उनले त्यसका लागि १ लाख डलरमा डिल गरेको र १५ हजार एड्भान्सका रुपमा दिएको बताइएको छ । यसरी गुप्ताबाट पन्नूको हत्या गर्न १५ हजार डलर लिने व्यक्ति संयोगले अमेरिकी गुप्तर एजेन्सीका एजेन्ट थिए । जसका कारण भारतको यो योजनाको पोल मात्र खुलेन अहिले विदेश नीतिविपरीत भन्दै बचाउ गर्नुपर्ने अवस्था आयो ।

प्रकाशित मिति: बिहीबार, मंसिर १४, २०८० १३:५०