भारतमा सुरुङभित्र फसेका ४१ मजदुरकाे १७ दिनपछि यसरी गरियाे उद्धार

A+ A A-

भारतको उत्तराखण्डस्थित एउटा सुरुङ मार्गभित्र पछिल्लो १७ दिनदेखि फसेका ४१ मजदुरको मंगलबार राति उद्धार भएको छ । १७ दिनपछि सुरुङ बाहिर जीवितै निस्कन पाउँदा सबै मजदुरहरूको मुहारमा खुसी र हाँसो छाएको थियो ।

नोभेम्बर १२ मा सुरुङमाथि पहिरो गएपछि पहिरोले उत्तरकाशीमा निर्माणाधीन सिल्क्यारा सुरुङमा क्षति पुगेको थियो ।

त्यसपछि नै सुरुङ खन्दै गरेका ४१ मजदुर १७ दिनसम्म त्यहीँभित्र थुनिएका थिए । साढे चार किलोमिटरको सुरुङलाई ६० मिटर लामो भग्नावशेषले अवरोध पुर्‍याएको थियो ।

सुरुवातमा मजदुरहरूलाई बचाउन सुरुङ माथिबाटै ड्रिलिङ गर्न खोजियो, तर सुरुङ भत्किएको खण्डमा सबैको ज्यान जाने भएका हुनाले ६० मिटर भग्नावशेषलाई ड्रिल गर्दै सिधा सुरुङसम्म पुग्ने प्रयास गरियो ।

सुरुङभित्रका मजदुरलाई हावा र खानाका लागि सुरुङमाथिबाटै ड्रिल गरेर साना साना प्वाल बनाइएको थियो । जसकारण उनीहरू लामो समयसम्म बाच्न सफल भए ।

१७ दिनको अवधिमा ६० मिटरको अवरोधमा ढुंगा रड र माटोका भग्नावशेष हटाउनु निकै कठिन काम थियो ।

भग्नावशेषमा पनि ड्रिल गर्नु निकै गाह्रो थियो, फेरि कुनै बिपत्ति आइपर्ने हो कि भनेर ३ फिटको पाइप विछ्याउँदै सुरुङभित्र उद्धारकर्ता पुगेका थिए ।

ड्रिलिङ गर्ने क्रममा नोभेम्बर २४ मा मेसिनमा खराबी आएपछि उद्धारका लागि र्‍याट माइनर्स खटिएका थिए । र्‍याट माइनर्स ती निर्माण मजदुर हुन्, जसमा खराब स्थानमा पनि सुरुङ खन्ने र ड्रिल गर्ने विशेष कला हुन्छ । र्‍याट माइनर्सले सामान्य औजार र हातकै मद्दतले सुरुङभित्रका अवरोध हटाएका थिए ।

सिल्क्यारा बेन्ड–बरकोट सुरुङ भारतको नवयुग इन्जिनियरिङ कन्स्ट्रक्सन लिमिटेडले निर्माण गरिरहेको छ ।

साढे चार किलोमिटरको यो सुरुङमार्ग छिटो र छरितो सडक सञ्जालका लागि बनाउन थालिएको हो, जसले हिन्दु धर्मावलम्बीका चारवटा धार्मिक स्थललाई जोड्ने लक्ष्य लिएको छ । यो सुरुङमार्ग सम्पन्न भए यसले २० किलोमिटरको यात्रालाई केही किलोमिटरमा झार्नेछ ।

प्रकाशित मिति: बुधबार, मंसिर १३, २०८० १२:११