ताप्लेजुङकाे शान्त सिङ्जेमा, मनै लोभ्याउने साम्दो ‍‍(तस्वीरहरू)

A+ A A-

देशको सुदूरपूर्वी जिल्ला ताप्लेजुङको फक्ताङ्लुङ गाउँपालिका– ७, ओलाङ्चुङगोला अधिक मनोरम छ । यहाँको सिङ्जेमा ताल विछट्टै सुन्दर छ । साम्दो पोखरी पनि उस्तै सुन्दर छ ।

सिङ्जेमा ताल समुद्री सतहदेखि ४ हजार ७ सय मिटर उचाइमा छ । यसको लम्बाइ, चौडाइ र गहिराइ अहिलेसम्म आधिकारिक रूपमा नापिएको छैन ।

सिङ्जेमा तालको भ्रमण एक पर्यटकीय मात्र होइन, धार्मिक हिसाबले पनि महत्त्वपूर्ण मानिन्छ । यहाँ पुगेर मनदेखि नै केही मागिए पूरा हुने धार्मिक विश्वास छ ।

साथै, यहाँ शान्त र सफा मनले सिङ्जेमालाई नियालियो भने आफ्नो भविष्यसमेत देखिने अर्को जनविश्वास छ ।

किंवदन्तीअनुसार यो तालको तल्लो छेउमा धेरै वर्षपहिले एउटा सेतो गोरु भगवान्‌को रूपमा पदार्पण भएको थियो । जुन गोरु सिङ्जेमा तालमा खेल्ने र आसपासमा चर्ने गरेको थियो । सोही गोरुको गोबरलाई ओलाङ्चुङगोलाको एक व्यक्तिले घरमा लगेर राख्दा ती व्यक्ति असाध्यै धनी भएको कथन छ । यही कथनका आधारमा यो ताल ओलाङ्चुङगोलावासको श्रद्धाको केन्द्र बनेको छ ।

०००

सिङ्जेमा तालदेखि करिब दुई घण्टा उकालो हिँडेपछि पुगिन्छ– साम्दो पोखरी । समुद्री सतहदेखि ५ हजार ३४ मिटरको उचाइमा पोखरी छ । त्यहाँ पुग्ने बाटो अलिक कठिन छ । तर, यहाँ पुगेपछि वास्तविक स्वर्गको अनुभूति गर्न सकिन्छ ।

साम्दो पोखरी साँच्चिकै अचम्मको छ । जहाँ एकै स्थानमा पाँचवटा पोखरी छन् । दुईवटा ठूला सँगसँगै छन् । आसपासमा अन्य तीनवटा साना पोखरी छन् । यी पोखरीहरू निकै मनमोहक छन् ।

यहाँका वडाध्यक्ष छेतेन वालुङका अनुसार आगामी दिनमा पर्यटक आगमन सहज बनाउन बाटोलाई अझ चौडा गरिनेछ । घोडाहरूमा सवार गर्न सकिने वातावरण बनाइने छ । बस्ने ठाँउहरूलाई अझ सुधार्ने योजना रहेको पनि वालुङले बताए ।

यी दुई गन्तव्यमा कसरी पुग्ने ?

ताप्लेजुङ सदरमुकाम फुङ्लिङबाट पाँच घण्टाको गाडी यात्राबाट इलाडाँडा पुगिन्छ । भोलिपल्ट ओलाङ्चुङगोला पुग्न सकिन्छ । ओलाङ्चुङगोलाबाट सिङ्जेमा फेदी (छेर) भन्ने ठाउँमा गोठ अथवा क्याम्पिङ गरेर बस्न सकिन्छ । त्यसको भोलिपल्ट सिङ्जेमा ताल र साम्दो पोखरीसँग साक्षात्कार गर्न सकिन्छ । त्यसपछि पुनः सिङ्जेमा फेदीमा आएर बस्न सकिन्छ । अर्थात् आन्तरिक पर्यटकका लागि दूरी योभन्दा अझ छोटो पनि हुन सक्छ ।