छोरीसँग पुनर्मिलनपछि पिता भन्छन्ः हमासको आक्रमणले छोरीको मृत्यु भयो भन्ने ठानेका थियौं

छोरीसँग पुनर्मिलनपछि पिता भन्छन्ः हमासको आक्रमणले छोरीको मृत्यु भयो भन्ने ठानेका थियौं

A+ A A-

डेढ महिनायता जारी हमास र इजरायलबीचको युद्ध केही समयका लागि रोकिएको छ । अस्थायी युद्ध विराम सम्झौता गत शुक्रबारदेखि लागू भएर भोलि सोमबार सकिँदैछ ।

चार दिने यस अस्थायी युद्धविराममा इजरायलले १५० प्यालेस्टाइनी कैदी रिहा गर्नेछ भने त्यसको बदलामा हमासले ५० बन्धक रिहा गर्नेछ । साथै यस अवधिमा दुवै समूहले युद्ध गर्ने छैनन् ।

शुक्रबार बिहानैदेखि युद्धविराम लागू भएपछि शुक्रबार र शनिबार गरेर हमासले पहिलो दिन २४ र दोस्रो दिन शनिबार १७ जना बन्धकलाई रिहा गरिसकेको छ । सो अवधिमा इजरायलले भने सुरुमा ५० र दोस्रो दिन ३९ जना प्यालेस्टाइनी कैदीलाई छाडेको छ ।

सार्वजनिक भिडियोहरूमा दुवै तर्फका बन्धकहरू रेड क्रसको गाडीमा घर फर्किरहेको देख्न सकिन्छ । भिडियोमा दुवैतर्फका परिवार आफ्ना सन्तान र आफन्तलाई देखेपछि भावुक बनेको पछि देखिएको छ ।

शुक्रबार हमासले रिहाइ गरेका बन्धकमा ९ वर्षकी इजरायली बालिका इमिली पनि थिइन् । शनिबार इमिलीलाई परिवारको जिम्मा लगाइएको थियो । हमासले बन्धक बनाएको ५० दिनपछि आफ्नो परिवारसँग भेट्दा उनी निकै खुसी थिइन् ।

हमासको आक्रमणले छोरीको मृत्यु भएको आफू र परिवारले ठानेको इमिलीका पिताले प्रतिक्रिया दिएका छन् । तर छोरी जीवितै घर फर्किँदा आफूहरू ज्यादै खुसी भएको उनी बताउँछन् । युद्धविरामका क्रममा शुक्रबार र शनिबार यस्तै खाले भावुक दृश्यहरू देखिएका छन् ।

आज आइतबार पनि दुवै पक्षले एकअर्काका बन्धकलाई छाड्ने अपेक्षा गरिएको छ ।

अक्टोबर ७ मा सुरु भएको हमास–इजरायल युद्धमा गाजा क्षेत्रका १४ हजार ५ सयले ज्यान गुमाएका छन् भने इजरायलतर्फ १४ सयले ज्यान गुमाएका छन् ।