हमासले बन्धक रिहा गर्न थाल्दासमेत किन ढुक्क छैनन् इजरायली परिवार ?

तस्वीर साैजन्यः राेयटर्स ।

A+ A A-

हेन एभिग्देरी इजरायलका गनेमानेका टेलिभिजन हाँस्य लेखक हुन् । उनको काम सधैँ दर्शक हँसाउनुहुन्थ्यो । तर, पछिल्ला ४९ दिनदेखि हँसाउने काम छोडेर ‘आफ्नी छोरीलाई फिर्ता ल्याउने’ अभियानमा लागेका छन् ।

उनको अन्तिम कुरा आफ्नी ५२ वर्षीया श्रीमती शेरोन र १२ वर्षकी छोरी नोआमसँग ७ अक्टोबर बिहान १० बजे भएको थियो । आफूहरू सुरक्षित कोठामा गइरहेको र सबै ठीकठाक रहेको उनीहरूले बताएका थिए ।

हेन भन्छन्, ‘उनीहरू दक्षिणी इजरायलमा सबैभन्दा शान्तिपूर्ण किबुज गएका थिए । तर, त्यहाँ जे भयो, त्यो सबैका लागि हामी काेही तयार थिएनाैँ ।’

‘किबुज बेरीमा बसिरहेकी मेरी श्रीमतीका भाइलाई हेर्न हामी सबै जाने तयारीमा थियौँ । तर, अन्तिम घडीमा छोराले घरमै बस्ने बताए । तर छोरी साथमा गइन् । त्यसपछिको खबर दक्षिणमा निकै ठूलो उपद्रवको पाइयो र पहिलो दुई हप्तासम्म त उनीहरूलाई बेपत्ता घोषित गरियो । त्यसपछि उनीहरू बन्धक भएको कुरा थाहा पाइयो ।’

हेन एभिग्दोरीको परिवार र अधिकांश बन्धक जिउँदो रहेको कुनै संकेत मिलिरहेको छैन । बुधबार बन्धकलाई रिहाइ गर्ने सम्झौताको घोषणा भएपछि उनलाई लागेको छ, रिहा हुने मानिसहरूमा आफ्नी श्रीमती र छोरी पनि हुनेछन् ।’

उनी भन्छन्, ‘पछिल्लो ४९ दिनमा आशा नै हाम्रो एक मात्र साहारा थियो । तर म निकै सतर्क छु । आफ्नो आशालाई धेरै उच्च पार्न चाहन्नँ । मैले १६ वर्षे छोरा र पूरै परिवारसँग यही भनेको छु कि जबसम्म उनीहरूलाई आफ्नै आँखाले देख्दैनौँ, तबसम्म कुनै कुराप्रति भरोसा गर्दैनौँ ।’

हेन भन्छन्, ‘म त्यो परिस्थितिका बारेमा सोच्न चाहन्नँ, जसमा उनीहरूलाई राखिएको छ । हमासको भनाइमा उसले बन्धकहरूलाई गाजामा सुरुङ र सुरक्षित ठाउँमा लुकाएर राखेको छ ।’

उनी भन्छन्, ‘म कल्पना नगर्ने कोसिस गर्छु । ती कुरा सोच्नबाट म आफूलाई रोक्छु किनकि मेरो एक मिसन छ, उनीहरूलाई बाहिर ल्याउने । जति म उनीहरूको अवस्थाबारे कल्पना गर्न थाल्छु, उति नै मभित्र हतास बढ्नेछ ।’

बन्धकलाई रिहा गर्न दबाब

यसबीच हेनले इजरायली सरकार, रेड क्रस र कतारको मध्यस्थता गर्ने टिमसँग जोडिएका वरिष्ठ अधिकारीसँग भेटघाट गरिसकेका छन् । उनको भनाइमा उनीहरूले इजरायली सरकारमाथि ‘सैन्य विजयभन्दा माथि बन्धकको रिहाइ’ लाई प्राथमिकता दिन निकै दबाब दिए ।

सोमबार, इजरायली नेताहरू र परिवारसँग् इजरायली संसद् (नेसेट) मा चर्को बहसमा हेनले सांसदहरूसित भने, ‘तपाईंहरू अरबीलाई मार्ने कुरा बन्द गर्नुहोस् । र, यहुदीलाई बचाउने कुरा थाल्नुहोस् ।’

हेनलाई पहिल्यैदेखि लागेको थियो, अन्त्यमा बिना सम्झौता उनको परिवारलाई फिर्ता ल्याउने कुनै बाटो छैन । सैन्य अभियान चलाएर २ सय ४० मानिसलाई गाजाबाट फिर्ता ल्याउने विकल्प टिकाउ हुँदै होइन भन्ने उनी मान्थे ।

तर, उनी यसो पनि भन्छन्, ‘सबै बन्धक रिहा भए भने पनि यो सम्झौतालाई लिएर कुनै राम्रो भावना हुने छैन । जबसम्म हमासलाई जमिनी अभियानको महसुस हुँदैन ।’ हेनको भनाइमा यसको अर्थ हमासको उपस्थिति समाप्त गर्नु र हरेक बन्धलाई रिहा गर्नु आपसमा जोडिएका कुरा हुन् ।

शाको नयाँ किरण

३५ वर्षका सेगुई डेकेल–चेन अमेरिकी इजरायली नागरिक हुन् । उनी किबुज नीर ओजमा हमासको आक्रमणपछि बेपत्ता छन् । उनका बुबा जोनाथनको भनाइमा सम्झौताले केही सकारात्मक संकेत गरेको छ । तर, हेनकै जस्तो उनको पनि मान्यता छ, बन्धकको पहिलो समूह इजरायल पुगेपछि मात्रै भरोसा गर्न सकिन्छ ।

उनी भन्छन्, ‘मेरो छोरा शान्ति प्रिय नागरिक हो । उसका दुई छोरी छन् । उसकी श्रीमती आठ महिनाकी गर्भवती हुन् । सम्झौता वास्तवमै कार्यान्वयनमा आयो भने त म, मेरो किबुज नीर ओज र पूरै देशले महिलाहरू र बच्चाको रिहाइलाई स्वागत गर्नेछ ।’

यद्यपि, केही परिवारमा कतै अन्तिम घडीमा कुनै नयाँ शर्त राखेर सम्झौता अड्काइने हो कि भन्ने शंका पनि छ । तीन वर्षकी इजरायली–अमेरिकी अबिगेललाई हमासले सात अक्टोबरमा बन्धक बनायो । उनका आमाबुबा मारिए । अबिगेलका नातेदार हिर्स नाफतालीले भने, ‘बन्धकको पहिलो जत्थामा हामी अबिगेलकै प्रार्थना गरिरहेका छौँ ।’

रुबी चेनका १९ वर्षे छोरालाई ७ अक्टोबरमा हमासले लगेको थियो । उनी इजराल डिफेन्स फोर्सेजको ट्याङ्क युनिटमा सक्रिय ड्युटीमा थिए ।

सम्झौतापछि रुबीले सबै बन्धक फर्केलान् भनेर आफूलाई खुसी र आशा लागेको बताए । चेनलाई थाहा छ, उनका छोरा ती ५० मानिसमा हुने छैनन्, जसको रिहाइ हुँदैछ तर सम्झौतापछि उनमा आशा जागेको छ । ‘यसबाट बाँकी मानिस पनि छोडिने बाटो देखिन सक्छ’, उनले भने ।

प्रकाशित मिति: शनिबार, मंसिर ९, २०८० ०६:५०