सिद्धलेकबाट हिमाल नियाल्दा नाच्न मन लाग्यो

A+ A A-

मंसिर २ गते शनिबारको दिन (हाइक टु सिद्धलेक) मा आबद्ध हुन सबै सहभागी साथीलाई माछापोखरीस्थित बुद्ध मल बोलाएअनुसार बिहान ६ः१५ बजे सबै जना जम्मा भइयो । यस हाइकिङ कार्यक्रमलाई सफल बनाउन हामी २० जनाको टोली लागियाे धादिङको बुङचुङतर्फ ।

Rikesh koirala-siddhalake1700823391.jpg

बिहान ६ः३० मा हामी माइक्रो हाइस चढेर यात्रालाई अगाडि बढायौँ । १ घण्टाको यात्रापछि नौबिसेको हाेटल ह्वाइट हिल्समा चियानास्ता गर्न रोकियौँ । मीठो नास्तासहित हामीले परिचयात्मक कार्यक्रम पनि सञ्चालन गर्‍यौँ । हाइकिङ यस्तो माध्यम हो, जहाँ थुप्रै फिल्ड र क्षेत्रबाट आएकाहरूसँग परिचित भई साथी हुने मौका मिल्छ । त्यसैले सबैको सबै सहभागीसँग परिचय होस् र यात्रामा साथीभाइ बनून् भन्ने उद्देश्यले हामी सधैँ हाइकिङको सुरुवातमै परिचयात्मक कार्यक्रम राख्ने गर्छौं । नास्ता र परिचययात्मक कार्यक्रम सकेर हामी लाग्यौँ बुङचुङतिर ।

तीन घण्टाको काठमाडौंदेखि बुङचुङसम्मको यात्रा पनि धेरै छोटो लाग्यो । साथीभाइ सबै जनासँग मीठो गफगाफ गर्दैगर्दा बाटो सकिएको थाहै पाइएन ।

बुङचुङ बजारबाट सुरु भयो हाम्रो हाइकिङ । ८ किलोमिटर र ४ घण्टाको यो हाइकिङ अवधिभरलाई चाहिने पानी र अन्य खानेकुरा किनेर हामी लाग्यौँ हाम्रो गन्तव्यतिर । गाउँघर, बस्ती र खेतबारी अनि गाउँलेको सादा र सुन्दर जीवनशैली नियाल्दै हामी उकालो बाटोतिर अगाडि बढ्यौँ । १ घण्टाको रमाइलो यात्रापछि एउटा ठूलो चौतारीमा पुग्यौँ र वरपीपलको छायामा आराम गर्‍यौँ । निकै आनन्दको अनुभूति भयो । यात्रा निरन्तर अगाडि बढाउँदा बाटोभरि देखिने रङ्गीविरङ्गी पुतलीहरू, चराहरू र फूलहरूले मन फुरुङ्ग बनायो ।

करिब २ घण्टाको उकालो हिँडेपछि हामीलाई मुस्कुराउँदै स्वागत गर्‍यो मनास्लु हिमालले । आँखैअगाडि देखिने हिमालको यो दृश्य यति मनमोहक लाग्छ कि हाम्रो गन्तव्य नै बिर्साइदिन्छ । त्यहीँ बसेर दिनभरि आँखा बन्द नगरी एक टकले मनास्लुको मनमोहक दृश्य हेरिरहूँजस्तो लाग्छ ।

अलि चाँडो हिँड्ने साथीहरू अगाडि र अलि ढिलो हिँड्ने पछाडिका साथीहरूलाई कुर्दै त्यहाँबाट सबै सँगै लागियो गन्तव्यतिर । अबको बाटो सम्म र शीतल थियो । रमाइलो वनजंगल र बस्तीहुँदै हामी अगाडि बढिरह्यौँ । करिब १ घण्टाको हिँडाइपछि हामी खिर्रे बजार पग्यौँ, जहाँ गाउँलेहरू, सिद्धलेक गाउँपालिकाका अध्यक्ष परशुराम खतिवडा, सिहलेक– २ का वडा अध्यक्ष शम्भु गुरुङ, सिद्धलेक– ३ का वडा अध्यक्ष देव पुलामी, स्थानीय निकायका अरु साथीहरू पञ्चेबाजा, फूलमाला र खाँदासहित हाम्रो स्वागत गर्न तयार हुनुहुन्थ्यो । पञ्चेबाजा बजाउँदै गुरुङ भेषमा रहेका महिलाहरू र वडा अध्यक्षहरूले खादा ओढाई भव्य स्वागत गर्नुभयो ।

हामीसँग हाइकिङ गर्ने समूहमा केही विदेशी र केही नेपाली पर्यटकहरू साथमा हुनुहुन्थ्यो । तामझामको स्वागतले फुरुङ्ग हामी सबै जना बाजागाजासहित लाग्यौँ पात्लेमा अवस्थित श्रीवन नेचर क्याम्प रिसोर्टतिर ।

भव्य स्वागतले हाम्रो भोक पनि बिर्सिएछ । ८ बजे नौबिसेमा नास्ता गरेर निस्किएका हामी पानीबाहेक अरु केही खाएका थिएनाैँ । ४ बजे श्रीवन नेचर क्याम्पमा बफेट लञ्च सुरु भएपछि मात्र थाहा पायौँ कति भोका रहेछौँ भनेर । धेरै मीठो खाना खाएपछि स्थानीय निकायले मिटिङ हलमा आयोजना गरेको स्वागत कार्यक्रममा हामी सहभागी भयौँ ।

वन्डरिङ ट्रेल्स एड्भेन्चरद्वारा आयोजित यो दुईदिने हाइकिङ कार्यक्रम 'सिद्धलेक हाइक' तल्लाे गणेश हिमाल मनास्लु ट्रेकको एउटा भाग हो । वन्डरिङ ट्रेल्स एड्भेन्चरका सञ्चालक म रिकेश कोइराला यस धादिङ र गोरखा जिल्लाका गाउँहरूमा कहिले साइकलिङ गर्दै, कहिले हाइकिङ गर्दै त कहिले कच्ची सडकमा बाइक राइड गर्दै घुमेको धेरै समय भइसकेको भियो । आफ्नो टेन्ट र पकाउने प्राेपेन ग्यास बोकेर कहिले आफैँ पकाउँदै र जंगलमा टेन्ट लगाएर सुत्दै त कहिले गाउँलेहरूको न्यानो आतिथ्यमा उहाँहरूकै घरमा खाएर हिँड्नुको एक मात्र उद्देश्य थियो– धादिङ र गोरखाको लाेअर गणेश हिमाल मनास्लु बेल्टमा देखिएको पर्यटनको प्रचुर सम्भावनालाई प्रवर्द्धन गर्नु । एक पर्यटन व्यवसायी भएको हिसाबले यो मेरो सानो प्रयास हो, जसले यस क्षेत्रमा पर्यटन प्रवर्द्धन गर्न टेवा मिल्नेछ ।

लाेअर गणेश हिमाल मनास्लु ट्रेक ६ दिनकाे हो, जसको सुरुवात धादिङको बुङचुङबाट सुरु भई मैदिकोट र गोरखाको दरबुङफाँट, बुढी गण्डकी फाँटहुँदै गोरखा ताङलिचो चोक, गोरखा मनकामना, गोरखा घैरुङहुँदै गोरखाको गोरखाकाली मन्दिरमा पुगेर अन्त्य हुन्छ । पुराना पैदल राजमार्गहरूलाई जोडेर यो ६ दिनको पदमार्ग बनाइएको हो । यसको कतिपय भागमा बाक्लो झारहरू भएको र कतिपय ठाउँमा मर्मत आवश्यक भएकाले सम्बन्धित सबै निकायमा ध्यानाकर्षण गराउन चाहन्छु ।

यी सबै कुराहरू स्वागत समारोहमा मैले राखेपछि क्रमश: सिद्धलेक ०२ र ०३ का वडा अध्यक्षहरूले स्वागत मन्तव्य दिनुभयो । त्यसैगरी श्रीवन नेचर क्याम्पका सञ्चालक मेघराज नहकीजी, जो लामो समयदेखि यहाँको पर्यटन प्रवर्द्धन गर्न लागिरहनुभएको छ, ले पनि स्वागत मन्तव्य दिनुभयो । अन्त्यमा सिद्धलेक गाउँपालिकाका अध्यक्ष परशुराम खतिवडाले सिद्धलेकजस्तो पर्यटकीय सम्भावना बोकेको क्षेत्रको प्रवर्द्धनका लागि जस्तोसुकै सहयोग र सहकार्य गर्न तत्पर रहेको बताउनुभयो । उहाँको ऊर्जा र लगाव अनि पर्यटन प्रवर्द्धन गर्ने अठोट र पहलले लाग्यो– साँच्चै नै सिद्धलेकका बासिन्दाहरूले उहाँलाई प्रमुखको रूपमा चुनेर धेरै राम्राे काम गरेछन् । उहाँजस्तो अध्यक्ष पाउने त्यहाका जनता धेरै भाग्यमानी रहेछन् ।

स्वागत कार्यक्रम सकिएपछि बेलुकाको रमझम सुरु भयो । पञ्चेबाजा र दोहोरीको मज्जा लिँदै बेलुकी ९ बजे धेरै मीठो खाना खाएपछि हामी लाग्यौँ विश्राम कक्षतिर । धेरै नै सफा र सुन्दर श्रीवन नेचर क्याम्पको विश्राम कक्षमा मीठो निद्रा सुतियो ।

मंसिर ३ गते बिहान ५ः३० बजे हामी लाग्यौँ सिद्धलेक मन्दिरको हाइकिङतर्फ । करिब ४५ मिनेटको हाइकिङपछि भ्यु टावर पुग्यौँ, जहाँबाट मनमोहक सूर्याेदय हेर्ने मौका मिल्यो । सूर्योदय यति सुन्दर थियो कि १५ मिनेट सबै जना मौन भएर एकटकले हेरिरह्यौँ ।

भ्यु पाेइन्टबाट अन्नपूर्णः गणेश, मनास्लु र लाङटाङका रेन्जरहरू १ सय ८० डिग्रीमा अवलोकन गरियो । त्यहाँबाट गोरखा मनकामना, गोरखा दरबार, बन्दीपुर र तनहुँको छिम्केश्वरीको सुन्दर दृश्य हेरियो ।

भ्यु टावरबाट करिब १५ मिनेटको हाइकिङपछि सिद्धबाबा मन्दिर दर्शन गरी हामी फेरि फर्कियौँ श्रीवन नेचर क्याम्प । बिहानको नास्ता गरी कफी डाँडा हाइकिङ गरियो । धेरै शान्त र मनमोहक दृश्यका साथ कफी डाँडामा कफीको चुस्की लिँदै एकछिन आराम गरेपछि फर्कियौँ श्रीवन नेचर क्याम्प ।

क्याम्पमा दिउँसोको खाना खाएर २ बजेतिर ओरालो हिँड्यौँ । करिब ४ बजेतिर उही बुङचुङ पुगेर काठमाडौंतर्फ हानियौँ ।