१५ हजारको मृत्युपछि इजरायल र हमासबीच युद्धविराम, शान्ति सम्झौता गर्न भने तयार छैनन्

१५ हजारको मृत्युपछि इजरायल र हमासबीच युद्धविराम, शान्ति सम्झौता गर्न भने तयार छैनन्

A+ A A-

इजरायल र हमासबीच ४९ दिनयता जारी युद्ध केही समयका लागि रोकिएको छ । तर यो युद्ध सधैँका लागि भने रोकिएको होइन ।

चार दिनका लागि उनीहरू युद्धविराम गर्न सहमत भएका छन्, युद्धविरामको सम्झौता आज शुक्रबार लागू भइसकेको छ । १५ हजारभन्दा बढीको मृत्यु भएपछि यतिबेला चार दिने युद्ध विराम भएको हो ।

अक्टोबर ७ मा सुरु भएको यस युद्धमा गाजा क्षेत्रका १४ हजार ५ सयले ज्यान गुमाएका छन् भने इजरायलतर्फ १४ सयले ज्यान गुमाएका छन् ।

शुक्रबार बिहानैदेखि युद्धविराम लागू भएको छ । यस्तोमा इजरायलले गाजामा हवाई कारवाही रोकेको टाइम्स अफ इजरायलले जनाएको छ । कतार र इजिप्टको मध्यस्थतामा पछिल्लो युद्ध विराम भएको हो । सम्झौताअनुसार आज नै हमासले अपहरण गरेको १३ जनालाई रिहा गर्दैछ, हमासले २४० जनालाई इजरायलबाट बन्धक बनाएर गाजा लगेको थियो ।

चार दिनको युद्धविराममा इजरायलले ५० बन्धकको बदलामा १५० प्यालेस्टाइनी कैदी रिहा गर्नेछ, साथै सो अवधिमा दुवै समूहले युद्ध गर्ने छैनन् ।

युद्धविरामको सम्झौता भएता पनि उनीहरूबीच शान्ति सम्झौता हुने कुनै संकेत देखिएको छैन । किनभने इजरायलले यसपटक हमासलाई समाप्त गरिछाड्ने दृढता लिएको छ । यसअघि संयुक्त राष्ट्रसंघ र अमेरिकाको युद्धविरामकै प्रस्ताव पनि इजरायलले अस्वीकार गरेको थियो ।

यसै हप्ताको मंगलबार मात्र इजरायलका प्रधानमन्त्री बेन्जामिन नेतान्याहुले भनेका थिए,‘हमास समाप्त नभइन्जेल युद्ध रोकिने छैन, साथै गाजामा इजरायलले चुनौती दिने समूह निमिट्यान्न नहुन्जेल आक्रमण रोक्नेछैनौं ।’

गत अक्टोबर ७ मा हमासले हजारौं रकेटहरू हान्दै इजरायलमा आक्रमण गरेको थियो । सोही दिनदेखि युद्ध चलिरहेको हो ।

प्रकाशित मिति: शुक्रबार, मंसिर ८, २०८० १५:५०