दुर्गा प्रसाईंको काउन्टरमा उत्रिएको एमालेको ‘शक्ति नभएको प्रदर्शन’

A+ A A-

आवरणमा सरकारविरुद्ध भने पनि नेकपा एमालेनिकट युवा–विद्यार्थीको बिहीबारकाे तीनकुने शक्ति प्रदर्शन दुर्गा प्रसाईंविरुद्ध थियो । तर, शक्ति प्रदर्शनमा अपेक्षित उपस्थिति नदेखिएपछि अहिले एमालेलाई यो शक्ति प्रदर्शनको औचित्य पुष्टि गर्न हम्मेहम्मे भएको छ ।

त्यसै पनि एक जना व्यक्तिविरुद्ध सिङ्गो पार्टी उत्रिएको भन्दै चौतर्फी आलोचना हुनु र प्रदर्शनमा पनि अपेक्षित उपस्थिति नहुनाले एमालेलाई रक्षात्मक बनाइदिएको छ । तर, यो आन्दोलनको अगुवाइ गरिरहेका एमाले नेता तथा युवा संघ इन्चार्ज महेश बस्नेत भने बचाउमा उभिएका छन् । नेताहरूले चर्काे भाषण गरेर प्रदर्शनकाे बचाउ गर्नुपर्ने अवस्था आएकाे छ ।

बीच सडकमा मञ्च बनाउन प्रयोग गरिएका गाडी

कार्यक्रमको मोर्चा युवा संघले सम्हालेको थियो । बेथितिविरुद्धको विरोध कार्यक्रम सडक बन्द गरेर बेथितिमय बनाइयाे । खुला चौर खाली राखेर, व्यस्त सडक अवरोध गरेर किन कार्यक्रम राखेको भन्ने प्रश्नमा युवा संघका नेता महेश चौलागाईं भन्छन्, ‘हाम्रो आमसभा हो र खुला ठाउँमा राखिने विरोध कार्यक्रम हो । त्यसैले सडकमा कार्यक्रम गरेका हौँ । हामीले संयमित भएर स्वयंसेवक खटाएका थियौँ । शान्तिपूर्ण रूपमा कार्यक्रम सफल भयो ।’

प्रसाईंले लगातार एमाले अध्यक्ष केपी शर्मा ओली र महेश बस्नेतविरुद्ध बाेलिरहेका छन् । ओली र बस्नेतले पनि प्रसाईंविरुद्ध बाेलिरहेका छन् । यसै क्रममा प्रसाईंले बिहीबार प्रदर्शन गर्ने भएपछि ओलीकाे आड भराेसामा बस्नेतकाे अगुवाइमा प्रसाईंविरुद्ध तीनकुनेमा शक्ति प्रदर्शन भयाे । तर, बल्खुकाे प्रसाईंकाे भन्दा तीनकुनेकाे प्रदर्शन कमजाेर देखिएपछि चर्काे भाषण गरेर यसकाे औचित्य पुष्टि गर्ने प्रयास भएकाे छ । बस्नेत मात्र नभई एमाले जनसंगठन संयन्त्र प्रमुख भानुभक्त ढकाल पनि तीनकुनेमा चर्काे सुनिए ।

७ हजारको हाराहारीमा कार्यकर्ता उपस्थित भए पनि बस्नेतले कार्यक्रम सुरु गर्नुअघि १५ हजार कार्यकर्ता आएको र अन्य १५ हजार कार्यकर्ता अन्तै गएको बताए । उनले भनेबमोजिम प्रदर्शनकारीहरू तीनकुनेबाट कोटेश्वर घुमेर फेरि तीनकुनेमै आएर कोणसभामा सहभागी भए ।

उता बल्खुमा भएको सुरुवाती झडपमा युवा संघका कार्यकर्ताको हात रहेको शंका गरिन्छ नि भनेर शिलापत्रले एक नेतासँग जिज्ञासा राख्यो । जवाफमा ती नेताले भने, ‘उहाँहरूले आजै सिंहदरबार घेर्ने रे । भोलि प्रधानमन्त्री प्रचण्डलाई त्यहाँबाट लखेट्ने रे नि ! अनि ...!’

तीनकुनेको खाली चौर

कार्यक्रममा एमाले नेताहरू र उसका भ्रातृ संस्थाका नेताहरूले प्रसाईंको कार्यक्रम बिथोल्नमा हात छैन भनिरहेका थिए । उनीहरू भनिरहेका थिए, 'हामी कसैलाई हस्तक्षेप गर्दैनौँ ।'

‘एमालेले समाज रुपान्तरणको अभियान चलाउने हो । हामी कसैलाई हस्तक्षेप गर्दैनौँ । कसैका विरुद्ध कार्यक्रम गर्दैनौँ । तर, हाम्रो कार्यक्रमविरुद्ध निहुँ खोजेर आउँछ भने हामी छाड्दैनौँ । दुर्गा प्रसाईंको आजबाट हावा खुस्किएको छ । म चेतावनी दिन चाहन्छु– भोलिदेखि ठीक ठाउँमा बस, अब हामी यो कार्यक्रम सात प्रदेशमा विस्तार गर्दैछौँ,’ बस्नेतले कार्यक्रमलाई सम्बोधन गर्दै भने ।

युवासंघले ब्यानरमा बेथितिका सूत्राधार भन्दै राष्ट्रपति रामचन्द्र पौडेल, प्रधानमन्त्री प्रचण्ड, उपप्रधानमन्त्री तथा गृहमन्त्री नारायणकाजी श्रेष्ठ, कानुनमन्त्री धनराज गुरुङको राजीनामा मागेको थियो । टेरामक्स प्रकरण के हो सरकार ?, अर्थतन्त्र डामाडोल, शान्ति सुरक्षा भद्रगोललगायतका नारा लेखिएका प्लेकार्ड थिए ।

gadi 11700741918.jpg

भ्रष्टाचार र अनियमितताविरुद्ध, राज्यआतंकविरुद्ध, सामाजिक अराजकताविरुद्ध र सामाजिक सद्भाव भड्काउने, धार्मिक सहिष्णुता भत्काउनेविरुद्ध युवा संघ र अनेरास्ववियुको संयुक्त कार्यक्रम थियो । तर, नेताहरू प्रसाईं, पूर्वराजा र प्रधानमन्त्रीविरुद्ध केन्द्रित थिए ।

कार्यक्रम सुरु हुनुभन्दा अघि बस्नेतले पूर्वराजालाई चुनौती दिँदै भने, ‘ज्ञानेन्द्र, तिमीलाई निर्मल निवासमा बस्न मन छ कि छैन ? छैन भने दुर्गाको पछि लाग ।’

कार्यक्रममा भाषण गर्दै बस्नेतले भने, ‘जुँगा मुठारेर बसेका ज्ञानेन्द्र, तिमीलाई निर्मल निवासमा बस्न मन छ कि छैन ? बस्ने मन छैन भने बहुला दुर्गा प्रसाईंको पछि लाग । एमालेले आशीर्वाद दिएर जिताएका राजेन्द्र लिङ्देनको पछि लाग ।’

कार्यक्रममा एमाले जनसंगठन संयन्त्र समिति संयोजक भानुभक्त ढकालले प्रदर्शन व्यक्तिविशेष नभएर सरकारको खबरदारीका लागि गरिएको बताए ।

‘एमाले सदा राष्ट्र, राष्ट्रियता र जनताको पक्षमा छ । यो कुनै व्यक्तिविशेषका विरुद्ध होइन । सरकारको खबरदारीका लाागि गरेका छौँ । व्यक्तिको पछि लागेका होइनौँ । हामी संयमता अपनाएर बसेका छौँ । एमालेमाथि भएको आक्रमण भोलिका दिनमा टुलुटुलु हेरेर बस्दैन,’ उनले भने ।

कार्यक्रममा बस्नेतले प्रधानमन्त्री प्रचण्डलाई सच्चिन पनि चेतावनी दिए । ‘हामीले कानुन मान्यौँ, निषेधित क्षेत्र तोडेनौँ । प्रचण्डजीलाई पनि चेतावनी दिन चाहन्छु– तपाईं सच्चिनु भएन भने तपाईंको ३२ सिटे पार्टी र तपाईं आफू जोगिन नेपाली जनताको भविष्य अन्धकारमय बनाउनुभयो भने सिंहदबारको कुर्सीबाट ल्याएर माइतीघरमा हो कि तीनकुनेको सडकमा पर्छार्ने हो, त्यो तागत एमालेसँग छ,’ उनले भने ।

प्रकाशित मिति: बिहीबार, मंसिर ७, २०८० १८:४४