प्रसाईं र बस्नेतको आन्दोलनको मारमा शैक्षिक संस्था, कतै खुला, कतै बन्द

A+ A A-

कक्षा ६ मा अध्ययनरत काठमाडौं महानगरपालिका बानेश्वरका स्वीकृत मोक्तान आज स्कुल गएनन् । विद्यालयमा गएर पढ्नुपर्ने उनी सडकमा फुटबल खेलिरहेका थिए । बुद्धनगरको एक निजी विद्यालयमा अध्ययनरत उनी मेडिकल व्यवसायी दुर्गा प्रसाईँ र एमाले नेता महेश बस्नेतको आन्दोलनका कारण विद्यालय जान नपाएका हुन् । ‘आन्दोलन भएकाले आज स्कुल जान पाइएन,’ उनले भने ।

उनको मात्र होइन, आन्दोलनका कारण काठमाडौंका धेरैजसो विद्यालयका बालबालिकाको पठनपाठन प्रभावित भएको छ । सभैभन्दा बढी प्रभावित काठमाडौं महानगरका विद्यालयमा परेको छ । महानगरमा मात्र विद्यालय तहमा पढ्ने विद्यार्थीको संख्या २ लाख २० हजार ८ सय ५९ रहेको छ । यो संख्या सरकारी र निजी दुवैको हो ।

कतै विद्यालय खुलेका छन्, कतै बन्द भएका छन् । कतिपय विद्यालय खुले पनि बसबाट जानुपर्ने विद्यार्थी जान पाएका छैनन् । त्रासका कारण कतिपय अभिभावकले बालबालिकालाई विद्यालय पठाएका छैनन् । ‘कतै खुला कतै बन्द छ । गाडीबाट आउनुपर्ने आएका छैनन् । त्रासका कारण अभिभावले पनि बालबालिका पठाउनुभएको छैन,’ एनप्याब्सनका निवर्तमान काठमाडौं जिल्ला अध्यक्ष खड्ग बस्नेतले भने, ‘अघिल्लो दिनको तुलनामा आज विद्यार्थीको उपस्थिति न्यून छ ।’

सरकारी विद्यालयमा पनि आज न्यून विद्यार्थी उपस्थित भएका छन् । ‘विद्यालय खोलेका छौँ तर आधा विद्यार्थी आएका छन् । त्रासका कारण नआएका हुन् । अभिभावकले पनि किन खोलेको भनेर गुनासो गरिरहनुभएको छ,’ नील बाराही माविकी प्रधानाध्यापक जानुका नेपालले भनिन् ।

काठमाडौं महानगरपालिकाकाले परिस्थिति हेरेर निर्णय लिन सम्बन्धित विद्यालयहरूलाई नै अधिकार दिएको छ । तर, महानगरका अनुसार आन्दोलनस्थलवरपरका निजी विद्यालयमा प्रभाव परेको छ भने सामुदायिक विद्यालय चलिरहेका छन् । ‘परिस्थिति हेरेर निर्णय गर्न विद्यालयहरूलाई भनेका छौँ । निजीमा बसबाट विद्यार्थी अनाउने भएकाले असर परेको छ । सामुदायिक विद्यालय बन्द छैन,’ महानगर शिक्षा विभागका सूचना अधिकारी इन्द्रप्रसाद दाहालले भने ।

विद्यालयलाई शान्ति क्षेत्र घोषणा गरे पनि हरेक आन्दोलनको सिकार शैक्षिक संस्थामा पर्नु विडम्बना भएको अधिकारकर्मीहरू बताउँछन् । ‘२०६७ सालमा सरकारले विद्यालय शान्ति क्षेत्र भनेर पास गरेको छ । दलहरूले पनि विद्यालयको पठनपाठन नरोक्ने भनेरर प्रतिबद्धता जनाएका छन् तर कार्यान्यन भएको छैन । हरेक आन्दोलनको सिकार शैक्षिक संस्था हुनुपरेको छ,’ अभिभावक महासंघका अध्यक्ष सुप्रभात भण्डारीले भने ।

विद्यालय बन्द भएपछि आन्दोलन, बन्द हडताल सफल भएको मान्ने संस्कार बसेका कारण समस्या भएको उनको निष्कर्ष छ । ‘विद्यालय बन्द भएपछि आन्दोलन सफल भयो भन्ने मान्यता छ । विद्यालय र अभिभावक पनि रिस्क लिन चाहँदैनन् । यातायात नचलेपछि डर र त्रास हुन्छ,’ उनले भने ।

आन्दोलन अघि नै सरोकारवाल पक्ष सबै बसेर विद्यालय निर्वाध रूपमा चल्ने वातावरण बनाउनुपर्ने तर्क गर्छन् भण्डारी । ‘आन्दोलनको समयमा मात्र कुरा उठ्ने गर्छ । आन्दोलनअघि सबै पक्षसँग बसेर विद्यालय सञ्चालन गर्ने वातावरण बनाउनुपर्छ । बालबालिकाको पढ्ने अधिकार खोस्न मिल्दैन,’ उनले भने ।

प्रकाशित मिति: बिहीबार, मंसिर ७, २०८० १३:१८