टिकटक बन्द हुँदा के भन्छन् टिकटकबाटै सफल बनेका व्यवसायीहरू ? (भिडियो)

A+ A A-

पछिल्लो समय 'भाइरल तरकारीवाला'का रूपमा चर्चित कृष्ण अधिकारीले तरकारी बेचेर पाएको सफलताले जोकोहीलाई लोभ्याउँछ । चाबहिल गणेश मन्दिको उत्तर ढोकाछेउमै तरकारी पसल गरेका कृष्णले दैनिक १ लाखसम्मको तरकारी बेच्ने गर्छन् ।

अधिकारीको सफलतामा उनको लगन र मिहिनेतका साथसाथै टिकटकको पनि उल्लेख्य भूमिका छ । अधिकारी टिकटकमार्फत तरकारीको रमाइलो तरिकाले प्रचार गर्थे । अनि टिकटककै कारण उनी भाइरल पनि भए । त्यसपछि उनको व्यापार दिन दुई गुणा रात चौगुणा वृद्धि भयो ।

टिकटकबाटै सफलता पाएका अर्का व्यापारी हुन् पूर्ण श्रेष्ठ । उनले टिकटकबाट मार्केटिङ गर्ने सोचले करिब १० महिनाअघि इमाडोलमा उदयपुरे मटन सुकुटी नाममा सुकुटी उत्पादन सुरु गरे । टिकटककै प्रचारका कारण हाल उनको व्यवसाय निकै नै फस्टाएको छ ।

कृष्ण वा पूर्ण मात्र होइन, टिकटकलाई प्रचारप्रसारको माध्यम बनाएर राम्रो व्यावसायिक सफलता हात पार्ने अरु पनि थुप्रै छन् ।

तर, सरकारले टिकटक प्रतिबन्ध लगाइदियो । २७ कात्तिकमा शान्ति सुरक्षाको अवस्थामा प्रभाव पारेको, जातीय, भाषिक, धार्मिक सद्भाव खलबल्याउनुका साथै राष्ट्रिय एकता र राष्ट्रहितमा प्रतिकूल असर पार्नेलगायतका समस्याहरू देखापरेको भन्दै सरकारले टिकटकलाई प्रतिबन्ध लगाएको हो ।

टिकटकको सकारात्मक प्रयोग गरेर सफलता कमाएका मात्र होइनन्, अन्य धेरै टिकटक प्रयोगकर्ता टिकटक प्रतिबन्ध लगाउने सरकारको निर्णयविरुद्ध यतिखेर सडकमै उत्रेर विरोध जानाइरहेका छन् ।

अर्कातर्फ टिकटकलाई प्रतिबन्ध लगाउने निर्णयविरुद्ध सर्वोच्च अदालतमा रिट निवेदन दर्ता भएको थियो । उक्त मुद्दामा मङ्गलबार सुनुवाइ थाल्दै न्यायाधीश विनोद शर्माको एकल इजलासले सरकारलाई १५ दिनभित्र कारणसहितको जवाफ पेस गर्न आदेश दिएको छ । मुद्दाको अर्को सुनुवाइ मङ्सिर १९ गते तोकिएको छ ।

कानुन व्यवसायीहरूको मागबमोजिम अदालतले यो रिटमा अन्तरिम आदेश जारी गर्न भने अस्वीकार गरेको छ ।