तरकारी खेतीबाटै लाखौँ कमाइरहेका 'भद्रगोल'का कुलबहादुर

A+ A A-

नेपाली हास्यव्यङ्ग्य क्षेत्रमा चिरपरिचित नाम हो कुलबहादुर ओली । धेरैले उनलाई हास्य टेलिशृंखला 'भद्रगोल' का कलाकारका रूपमा चिन्छन् ।

यद्यपि उनको यो परिचय पूर्ण भने होइन । सल्यानको कालीमाटी गाउँपालिका– ६, बारापुरका कुलबहादुर २०६८ सालमा उच्च शिक्षसँगै अवसरको खोजीमा राजधानी प्रवेश गरेका थिए ।

उनलाई लागेको थियो, राजधानी काठमाडौं आफ्नो गाउँको तुलनामा धेरै ठूलो ठाउँ हो । जहाँ काम पनि धेरै किसिमका पाइन्छन् र छानीछानी गर्न पाइन्छ । जीवनमा अगाडि बढ्न धेरैको साथ अनि सहयोग हुन्छ । यहाँ आउनुअघि उनले यस्तैयस्तै आशा अभिलाशा साँचेका थिए । राजधानी अर्थात् काठमाडौं आएसँगै भक्तपुरस्थित सानो ठिमी क्याम्पसमा भर्ना भएर उच्च शिक्षालाई निरन्तरता दिन थाले ।

घरको आर्थिक अवस्था कमजोर भएका कारण कुनै काम नगरी अध्ययनलाई निरन्तरता मात्र होइन, काठमाडौंजस्तो महँगो शहरमा खाने बस्ने अवस्था नै थिएन । तर, उनले सोचेजस्तो सजिलो राजधानी कहाँ थियो र ? पाइलैपिच्छे हण्डर खाए ।

हुन त गाउँका अगुवा सबैजसो यतै थिए । जसले गाउँ पुगेको बखत उनलाई ढाडस दिन्थे । त्यसैले पनि उनलाई आस थियो । उनीहरू त आफ्ना हुन्, भलै यो बिरानो शहरका सबैजसो बिराना छन् । ती आफ्नाले त कसो सहयोग नर्गलान् र ? कुलबहादुर सोच्थे ।

तर, उनीहरूको गाउँमा गर्ने व्यवहारभन्दा छुट्टै रूपमा प्रस्तुत भए । सायद काठमाडौंको परिबन्दले व्यक्तिलाई स्वार्थी बनाउँदो रहेछ भन्ने कुलबहादुर स्वयम्‌ले महसुस गरे । उनलाई लाग्यो– यो शहरमा टिक्न कसैको भर परेर हुँदैन । आफ्नो खुट्टामा आफैँ उभिनुपर्नेरहेछ ।

लामो समयको प्रयासपछि एउटा एनजीओमा काम पाए । त्यसपछि पढाइ छाडे । परिवारको आर्थिक अवस्था र काठमाडौंमा टिक्न पनि उनलाई काम गर्नुको विकल्प थिएन । बाल्यकालदेखि नै कुलबहादुरमा गायनप्रति छट्टै लगाव थियो । एल्बम निकाल्ने सपना थियो । जागिर गर्दैगर्दा उनमा गायनलाई पनि निरन्तरता दिने रहर जाग्यो । त्यसैले गायन क्षेत्रमा प्रवेश गरे । एल्बम पनि निकाले ।

त्यसै क्रममा कृष्ण कँडेलले सञ्चालन गरेको इन्द्रेणीसँग जोडिन पुगे । त्यसपछि भने उनमा अभिनयप्रति रुचि जाग्न थाल्यो । इन्द्रेणीमार्फत नै उनले अभिनय यात्रा पनि सुरु गरे । उनको अभिनयलाई दर्शकले रुचाए । बिस्तारै परिचित हुन थाले । उनमा झनै कलाकारिताप्रतिको रुचि बढेर गयो ।

तर के गर्ने, अभिनयका लागि काठमाडौंमै धेरै समय बस्नुपर्ने बाध्यता । अभिनय गरेको पैसाले यहाँ महँगीमा खान बस्नै नपुग्ने । पारिवारिक अवस्थाका कारण पनि उनमा कमाउनुपर्ने बाध्यता एकातिर छँदै थियो । जो पारिवारिक जिम्मेवारीको बोझ उनको काँधमा आइपुगेको थियो ।

जागिर, संगीतहुँदै कलाकार बने । नाम पनि कमाए तर परिवारको जिम्मेवारी थेग्ने कमाइ त कहाँ हो कहाँ ? उनमा आफ्नै लागि काठमाडौंमा माम खाने अवस्था अझै बनेन । २०६७ सालतिरको कुरा हो, केही सीप नलागेर कमाउनका लागि पोर्चुगल लाग्ने सोच बनाए ।

पोर्चुगल जान पैसाको जोहो गर्न ऋण खोज्न थाले । पोर्चुगल हानिन लागेका उनलाई कसैले सुनायो– पोर्चुगल जाने पैसाले यहीँ व्यावसायिक तरकारी खेती गर । लाखौँ कमाइ हुन्छ । जुन कुराले उनलाई आर्षित गर्‍यो । गाउँघरमा खेतीपाती गरिरहेका उनलाई तरकारी खेती गर्नु कुनै गाह्रो कामजस्तो पनि लागेन ।

त्यसपछि विदेश जाने सोचलाई त्यागेर तरकारी खेतीका लागि जग्गा खोज्न थाले काठमाडौंको कागेश्वरी मनोहरा– २ मा साढे पाँच रोपनी जग्गा फेला पारे । प्रतिदुई वर्षमा २५ प्रतिशतका दरले वृद्धि हुने गरी वाषिर्क प्रतिरोपनी २५ हजारका दरले जग्गा लिजमा लिए । व्यावसायिक तरकारी खेतीका निम्ति टनेल हाले । मण्डला कृर्षि फार्म नाममा दर्ता पनि गराए । अनि टमाटर सबैभन्दा धेरै र काउली, बन्दा, काँक्रो, लौकालगायतका तरकारी लगाए ।

kulbahadur form1700657073.jpg

तरकारी त लगाए तर त्यसमा लाग्ने रोग र त्यसको रोकथामबारे उनी अञ्जान थिए । लगाएको टमाटर सबै रोगले सखाप पार्‍यो । पहिलो वर्ष जग्गाभाडा तिर्न नै उनलाई मुस्किल भयो । कुलबहादुर निराश भए । यद्यपि हिम्मत भने हारेनन् । गाउँघरमा गरेको खेतीपातीजस्तो होइन रहेछ, व्यावसायिक तरकारी खेती गरेर कमाउनुपर्ने रहेछ भन्ने बुझे । त्यसपछि यहाँको माटो, हावापानी तथा मौसमअनुरूप के–कस्ता तरकारी, कसरी र कुन सिजनमा लगाउने भनेर तालिम लिने तथा युट्युबमा आफैँले हेरेर सिक्न थाले ।

दोस्रो वर्षपछि भने तरकारी बिस्तारै सप्रिन थाले । कमाइ पनि राम्रो हुन थाल्यो । जग्गा थपेर साढे आठ रोपनी पुर्‍याए । त्यहीँ पोखरी खनेर माछापालन पनि थाले । जागिर, संगीत, कलाकारहुँदै व्यावसायिक तरकारी खेतीमा लागेका कुलबहादुर हाल वार्षिक १२ लाखको कारोबार गर्छन् । गरे स्वदेशमै सुन फलाउन सकिने रहेछ भन्दैै आशाको प्रकाश छर्छन् । सँगै कलाकारितालाई पनि निरन्तरता दिइरहेका छन् ।

मण्डला कृषि फार्ममार्फत व्यावसायिक अर्ग्यानिक तरकारी उत्पादन गरिरहेका कुलबहादुर स्वयम् आफूलाई धेरैले कलाकारका रूपमा चिन्ने गरेको तर अब भने आफू एउटा सफल व्यवसायीका रूपले चिनिन चाहेको सुनाउँछन् ।

हेर्नुस् भिडियो :

प्रकाशित मिति: बिहीबार, मंसिर ७, २०८० ०७:१८