विन्ध्यवासिनीमा शोभायात्रासहित ‘नवदुर्गा महोत्सव’ सुरु

A+ A A-

गण्डकी प्रदेशकै ठूलो शक्तिपीठ विन्ध्यवासिनी मन्दिरमा शोभायात्रासहित नवदुर्गा महोत्सव २०७६ सुरु भएको छ । विन्ध्यवासिनी धार्मिक क्षेत्र विकास समितिको आयोजनामा बडादसैंको स्वागतार्थ शोभायात्रासहित आज (आइतबार) घटस्थापना पूजा गरी महोत्सव सुरु गरिएको हो । महोत्सव आज (घटस्थापना) देखि नवमीसम्म सञ्चालन हुनेछ ।समितिका सचिव तीर्थ श्रेष्ठले नवकन्या आरुढ नौरथसहितको शोभायात्राको पूजा गरी बडादसैंको स्वागत गरिएको बताए । उनले उक्त शोयायात्रामा विन्ध्यवासिनी मन्दिरको झाँकी, नेपाली सेना, नेपाल प्रहरी, सशस्त्र प्रहरी, नेपाल स्काउट, राष्ट्रिय सेवा दल, बटुकहरू, जलकलशसहित मातृशक्ति, विभिन्न आमा समूहहरू, सामाजिक धार्मिक तथा जातीय सांस्कृतिक बैंक तथा वित्तीय संस्थाहरू, शैक्षिक संस्थाहरू, भजन समूहहरू र वाणिज्य तथा वस्तुगत संघहरूको उल्लेख्य सहभागिता रहेको बताए । महोत्सव अवधिभर रात्रिकालीन आरतीसमेत गरिने उनले बताए ।उनका अनुसार महोत्सव अवधिभर प्रत्येक दिन बिहान ९ देखि १२ बजेसम्म र मध्यान्हदेखि अपरान्ह ४ बजेसम्म महायज्ञ हुनेछ । विजया दशमीको दिन बिहान ४ बजेदेखि नित्य पूजा आरम्भ भई ५ बजेबाट भक्तजनहरूका लागि मन्दिर खुला गरिनेछ ।विश्व शान्ति तथा मानव कल्याणको कामना गर्दै जातीय सद्भाव तथा धार्मिक पर्यटनको विकासमा टेवा पुग्याउने उद्देश्यले महोत्सवको आयोजना गरिएको महोत्सव आयोजक समितिका अध्यक्ष गणेशबहादुर श्रेष्ठले बताए । शोभायात्राको नेतृत्व गण्डकी प्रदेशका प्रमुख बाबुराम कुँवरले गरेका थिए ।मन्दिरमा भक्तजनहरूले चढाएको भेटीबाटै समितिले विभिन्न सामाजिक कार्य गर्दै आएको उनले बताए । गत वर्ष समितिले करिब २ करोड ७५ लाख रुपैयाँ भेटी संकलन गर्न सफल भएको सचिव श्रेष्ठले बताए ।समितिले अपांग तथा असहायहरूका लागि केही समयअघि मन्दिर परिसरमा लिफ्टसमेत सञ्चालनमा ल्याएको छ । लिफ्ट शारीरिक असक्त, अपांगता भएका र ज्येष्ठ नागरिकहरूलाई निःशुल्क छ भने अन्य लिफ्ट प्रयोग गर्ने नेपाली नागरिकलाई समितिले प्रतिव्यक्ति ५० र विदेशीलाई १ सय रुपैयाँ शुल्क लिने गरेको छ ।तस्वीर ः नरहरि पाैड्याल