एमाले र दुर्गा प्रसाईं आमनेसामनेः सात मंसिरमा टकरावकाे संकेत

A+ A A-

७ म‌सिर काठमाडाैंकाे माइतीघर मण्डलमा एमाले र दुर्गा प्रसाईं आमनेसामने हुने भएका छन् । पछिल्लाे समय सामाजिक सञ्जालबाट एमालेविरुद्ध खनिएका प्रसाईंले ७ मंसिरलाई शक्ति प्रर्दशनकाे रुपमा लिएका छन् । अनि एमाले चाहिँ प्रसाईं समूहकाे प्रतिवाद गर्ने रणनीतिमा देखिन्छ ।

खासमा प्रसाईंकाे पूर्वघाेषित उक्त कार्यक्रमले अहिले सरकार, सुरक्षा निकायदेखि प्रमुख प्रतिपक्षसम्म आतंकित भएका छन् । सुरक्षाा निकायले त प्रसाईंकाे समूहलाई ध्वा‌ंसात्मक शक्तिकाे रुपमा परिभाषित गरिसकेका छन् । प्रसाईंले बै‌ंकहरूको चर्को ब्याज कम गर्न , मेडिकल शिक्षा र जनताले गरिखाने वातावरण बनाउन सरकारमाथि दबाब बढाउन काठमाडौंमा जनप्रदर्शन गर्ने मिति दसैं अघि नै सार्वजनिक गरेका थिए ।

एमाले र प्रसाईंले एकै दिन प्रदर्शन गर्ने भएपछि उनीहरूबीच सात मंसिरमा टकराव हुने अवस्था सिर्जना भएकाे छ ।

प्रसाईंले काठमाडाै‌ं केन्द्रित आन्दाेलन घाेषणा गरेपछि एमालेकाे भ्रातृ संगठन युवा संघले पनि ७ मंसिरमै सरकारविरुद्ध प्रदर्शनकाे घाेषणा गर्‍याे । युवा संघले खासमा त्यसरी कार्यक्रम घाेषणा गर्नुकाे कारण सरकार केन्द्रितभन्दा धेरै प्रसाईंविरुद्ध छ । एमाले अध्यक्ष केपी ओली र एमाले नेता महेश बस्नेतविरुद्ध चर्काे आलाेचक भएर निस्केका प्रसाईंलाई केही महिनाअघि युवा संघले माेसाे पनि दलेकाे थियाे । त्यसकाे प्रतिक्रियामा प्रसाईंका समर्थकले झापा पुगेका बस्नेतकाे कार्यक्रम नै बिथाेल्ने प्रयास गरेका थिए । साथै बस्नेतकाे गाडी ताेडफाेड गरेका थिए ।

यी दुई घटनापछि एमाले र प्रसाईं आमनेसामने भएका हुन् । ओली अहिले प्रसाईंलाई तह लगाउन चाहन्छन् । अराजक भएर सामाजिक सञ्जालमार्फत प्रसाईं पनि ओलीमाथि निरन्तर प्रहार गरिरहेका छन् । अनि बस्नेत पनि चर्काे ताराेमा परेका छन् ।

प्रसाईं र एमाले नेता बस्नेतको टकराव सामाजिक सञ्जाल र सार्वजनिक भाषणामा प्रस्ट देखिन थाल्यो । युवा संघका पूर्व अध्यक्ष बस्नेत एमालेको युवा फाँटमा पकड राख्दछन् । त्यसैकारण युवा संघकाे ब्यानरमा प्रसाईंविरुद्ध एमाले कार्यक्रर्ता उतार्ने एमालेकाे प्रयास देखिन्छ । एमालेभित्र प्रसाईंविरुद्ध लड्न नहुने भन्ने ठूलाे पंक्ति रहेकाे छ र याे समूहले सार्वजनिक रुपमा मत पनि राखेकाे छ । तर बस्नेतकाे याेजनालाई ‌‌‍ओलीले साथ दिन अवस्था आएकाे छ । प्रसाईं र बस्नेतको टकरावको अपनत्व शनिबार एमालेले संस्थागत रुपमा दियो ।

शनिबार केन्द्रीय कार्यालयमा भएको जनसंगठन पदाधिकारीहरूको विशेष भेलालाले युवा संघले गर्ने भनेको ७ मंसिर को प्रदर्शनको अपनत्व मात्र लिएन, जनसंगठन समन्वय संयन्त्रले आयोजना गरेको २३ वटै संगठनका पदाधिकारी र सम्पर्क समन्वय समिति लगायतका सदस्यको विशेष भेलाले सबै शक्ति ७ मंसिरको प्रदर्शनमा केन्द्रित गर्ने घोषणा पनि गरेको छ ।

आवरणमा युवा संघले ७ मंसिर भ्रष्टाचार, महँगी, अनियमितता तथा राज्यको अराजकताविरुद्ध काठमाडौंमा जनप्रदर्शन गर्ने योजना बनाएको छ । त्यसअघि नै नागरिकलाई संकटबाट मुक्ति दिने भन्दै प्रसाईंले चामल र गुन्द्रुक लिएर काठमाडौं आउन र पानीको व्यवस्था आफूले गर्ने बताउँदै आएका छन् । ‘बृहत् नागरिक मुक्ति आन्दोलन’ को ब्यानरमा १० लाख उतार्ने दाबी गर्दै माइतीघरमा शक्ति प्रदर्शनको तयारी प्रसाईं समूहको छ । सो समूहको राष्ट्र, राष्ट्रियता, धर्म संस्कृति र नागरिक बचाउ महाअभियान नामक अभियान चलिरहेको छ । प्रसाईंले गणतन्त्र हटाएर राजतन्त्र फर्काउन प्रधानमन्त्री पुष्पकमल दाहाल प्रचण्डसँग ५० लाख रुपैयां मागेको बताउँदै आएका छन् ।

मोसोबाट सुरु भएको कालो सम्बन्ध

२२ असोज जमलको होटेल एलो प्यागोडामा प्रसाईंलाई मोसो दलियो । मोसो दलिएपछि केपी ओली जिन्दाबाद र महेश बस्नेत जिन्दावादको नाराबाजी भयो । त्यसपछि प्रसाईंले महेश बस्नेतको निर्देशनमा मोसो दलिएको दाबी गरे । त्यो घटनालगत्तै बस्नेतले फेसबुकमा लेखे ‘बैंक तथा वित्तीय संस्थालाई चुनौती दिने, विभिन्न समुदायलाई देश निकाल्छु, मोसो दल्छु भन्ने आपराधिक कर्म गर्ने दुर्गा प्रसाईंलाई युवाहरूले तह लाएछन् । अब सुध्रिऊ, अरूलाई दोष नलगाऊ । यस्तालाई सरकारले कारबाही गरोस् । जन प्रतिरोध हुनु राम्रो होइन । युवा संघको तागत ननाप प्रसाईं।’

त्यसयता प्रसाईं र बस्नेतबीच सार्वजनिक मञ्चहरूमा एक अर्काको आलोचना र चेतावनीको शृखंला चलिरहेको छ । बीचमा बस्नेतको गोप्य निजी भिडियो सार्वजनिक भयो । बस्नेत समूहले सो काम प्रसाईं समूहले गराएको दाबी गर्दा प्रसाईंले त्यसको आठवटा भाग रहेको दाबी गरेका छन् । प्रसाईं एमाले अध्यक्ष केपी शर्मा ओलीसँग सुमधुर सम्बन्ध भएका झापाली थिए । माओवादी पृष्ठभूमिका प्रसाईं एमालेमा गएपछि ओलीकाे किचनक्याबिनेटकाे मान्छे बनेका थिए । त्यहीकारण झापाका नरेश खरेलहरू केन्द्रीय सदस्यमा नअटाउँदा प्रसाईं एमालेकाे केन्द्रीय सदस्य भएका थिए ।

ओलीका लागि आर्थिक सहयाेग दाताकाे रुपमा पनि रहेका प्रसाईं ओलीसँग गत मंसिरकाे चुनावबाट टाढिन थालेका थिए । त्यतिबेला चुनावकाे टिकट आस गरेका प्रसाईंलाई ओलीले पाखा लगाए । त्यहीबेलादेखि बिच्चेका प्रसाईं अहिले चर्काे आलाेचक मात्र भएका छैनन्,भूइँतहमा एमालेकाे सम्बन्ध नै धमिल्याउन थालेका छन् ।

एमालेको नजरमा प्रसाईंको अभियान कस्तो ?

शनिबार च्यासलमा भएको कार्यक्रममा एमाले अध्यक्ष ओलीले प्रसाईंको नाम नलिई कसैकसै व्यक्तिलाई उभ्याएर प्रतिक्रियावादी शक्तिहरू देशभरबाट मान्छे उतार्न लागेको बताए । ‘एउटा कसैकसै व्यक्तिलाई उभ्याएर प्रतिक्रियावादी शक्तिहरू जोडतोडले लागेका छन् देशभरिबाट काठमाडौंमा मानिसहरू उतार्न, ती मानिसहरू आएर काठमाडौंमा कुनै केही हुने होइन, काठमाडौं फोहोर मात्र हुने हो’, उनले भने ।

अध्यक्ष ओलीले आफूहरूले सरकारले ठीक ढंगले काम गर्न सकेन भनेर सांकेतिक विरोध मात्र गर्न खोजेको बताए । ‘हामी मान्छे ओसारेर होइन, यहीँ भएका युवा विद्यार्थी र त्यसको पृष्ठभागमा युवा विद्यार्थी एक्लै छैनन् भन्ने देखाउन चाहन्छौं, हामीले थोरै संकेत मात्र गर्न खोजेको हो’, उनले भने ।

देशमा अनियमितता र बेथितिले सीमा नाघेको भन्दै एमाले अध्यक्ष ओलीले सरकार तत्काल सच्चिनलाई खबरदारी गर्न खोजेको बताए । ‘प्रधानमन्त्रीजीले बोलाएको १२ बुँदे सहमतिसँग सम्बन्धित भनिएका दलको बैठकमा बेथिति आदि कुरा प्रधानमन्त्रीले स्वीकार्नुभयो, देशको अप्ठेरो अवस्थाबारे स्वीकार्नुभयो । तर के गर्ने भन्ने कुरामा केही भएन’, उनले भने ।

अहिलेको अनियमितता र बेथितिको कारण गठबन्धन सरकार रहेको भन्दै उनले यहीँबाट समाधान खोज्नुपर्ने बताए । ‘यसकारण यहाँ समाधान नखोजी यसको जिम्मा कसलाई लगाउने ? हामीले ७ मंसिरमा एउटा संकेत गर्न खोजेको हो’, ओलीले भने ।

एमालेको प्रदर्शन नीति

च्यासलको कार्यक्रममा ओलीले कार्यकर्तालाई समयमा आउन उर्दी जारी गरे । उनले निषेधित क्षेत्र नतोड्ने बताए । ‘निषेधित क्षेत्र तोड्दैनौं । कुनै समय त्यस्तो आउन पनि सक्छ । ६३ सालमा निशेधित क्षेत्र तोड्नुपरेको थियो । उनीहरूले निषेधित क्षेत्र घरसम्म ल्याउन सक्छन् । त्यस्ता निषेध आज्ञा तोड्नुपर्ने हुनसक्छ । सरकारले जुन रुट भन्छ त्यो रुटमा चल्न सक्छौं । सांकेतिक रुपमा हामी यहाँ छौं भनेर । एकपल्ट साथीहरू हामी यहाँ छौं भन्नुभएको थियो त्यसरी होइन,’ ओलीले भने ।

एमाले अध्यक्ष ओलीले एमाले कसैविरुद्ध जाइनलाग्ने बताए । ‘कसैसँग जाइलाग्ने नीति लिदैनौं । जोशिलो तर आक्रामक होइन । तोडफोड गर्दैनौं । आफ्नो सुरक्षा आफैँ गर्छौं,’ उनले भने ।

ओलीले युवा भएर घर नबस्न चेतावनी दिए ।

‘युवा भएर पनि ७ मंसिरमा घर बसियो भने त .... खुट्टा फ्क्याक्चर भए अर्कै कुरा ..,’ ओलीले भने ।

७ मंसिरमा युवाहरू घर बसे भने संगठन के का लागि भनेर ओलीले प्रश्न गरे । ‘जनवर्गीय संगठनका सदस्यहरू घर बसे भने संगठन के का लागि ? ७ मंसिर मैदान उत्रने छौं । ७ मंसिर ११ बजे माइतीघर मण्डला भनिएको छ । ठाउँ परिवर्तन पनि हुन सक्छ । सरकारले निषेधित क्षेत्र बनाउन पनि सक्छ,’ ओलीले भने ।

प्रकाशित मिति: शनिबार, मंसिर २, २०८० १७:४१