वर्षमा ५० लाखसम्म संसारकै खतरनाक सर्प जन्माउने गाउँ (भिडियो)

A+ A A-

कृषि र पशुपालनका ठूला ठूला फार्महरू सञ्चालन गरेको त हामीले देखेका छौं । तर मानिसले यस्तै ठूलो सर्प फार्म सञ्चालन गर्छन् भन्दा पत्यार नलाग्न सक्छ । चीनको शेजियाङ प्रान्तको जिसिकियाओ गाउँ भने सर्प फार्मका लागि परिचित छ । यहाँका हरेकजसो परिवार सर्प पालनमा संलग्न भएकाले यसलाई स्नेक भिलेजसमेत भनिन्छ । यो गाउँमा हरेक वर्ष ३० देखि ५० लाखसम्म सर्पहरू जन्मिने अनुमान छ । वयस्क भएपछि वा मागअनुसार यी सर्पहरू चीन र बाहिरी देशमा समेत निर्यात गरिन्छ ।

आयुर्वेदमा जडिबुटीबाट औषधि बनाएजस्तै परम्परागत चिनियाँ औषधिमा सर्पको छालादेखि तेल र बिसको पनि उपयोग हुन्छ । करेत, पिट वाइपर, रेट स्नेक र रेटल स्नेक गरी ४ प्रकारका सर्प पालन गरिन्छ । केही दशकदेखि गोमन सर्पको पनि पालन सुरु भएको छ । औषधिका साथै चीनमा सर्पका परिकारहरू निकै महंगो मूल्यमा बेच्ने गरिन्छ ।

चीनमा सर्पको कति उपयोग हुन्छ र कति अन्य देशमा निर्यात हुन्छ भन्ने यकिन तथ्यांक पाइँदैन । तर चीन एक्लैले औषधि बनाउन ५० लाखभन्दा बढी सर्पको उपयोग गर्ने गरेको बताइन्छ । तर यो तथ्यांक पनि केही वर्ष पुरानो हो, यो क्रम झनै बढेको छ । चीन सरकारले सर्पको वर्गीकरणका लागि अनुमति दिँदै आएको छ । कुन तरिकाले फार्मिङ गर्ने, सर्पको कति ध्यान राख्ने र सर्पको जन्ममा अपनाइने आर्टिफिसियल तरिकाबारे स्पष्ट पार्नुपर्छ । सर्पलाई प्राकृतिक या सर्प अनुकूल वातावरण दिनु सबैभन्दा महत्वपूर्ण हुन्छ । यसका लागि २० भन्दा कम र २५ डिग्री भन्दा बढी तापक्रम हुनु हुँदैन ।

त्यसो त चीनबाट एग्जाटिक एनिमल्स खरिद गर्ने देशको संख्या बढिरहेको छ । सर्प किन्नमा अमेरिका, जर्मनी, जापान, दक्षिण कोरियाजस्ता देश अघि छन् । पछिल्लो समयमा तस्करी पनि मौलाएको छ । किनकि अधिकांश देशमा एनिमल वेलफेयर अन्तर्गत यस्ता जनावर ओसारपसारमा प्रतिबन्ध लगाइएको छ ।

सर्पको बिषको मूल्य कति पर्छ भन्ने त्यो कुन जातको सर्प हो भन्नेमा निर्भर गर्छ । आम रुपमा सर्पको एक ग्राम बिषको मूल्य साढे ४ सय देखि साढे ७ सय डलरसम्म पर्छ । कुनै सर्पको त १ ग्राम बिसकै आठ लाख रुपैयाँसम्म पर्छ । देशअनुसार पनि सर्पको बिषको मूल्य घटीबढी हुन्छ ।

सर्प पालनका लागि सबैभन्दा पहिले उचित वातावरण तयार गर्नुपर्छ । खासगरी यस्ता फार्महरू मानिसहरूलाई क्षति पुर्‍याउन नसकोस् भनेर मानवबस्तीभन्दा टाढा तयार गरिन्छ । यसपछि सर्प समात्ने एक्स्पर्टहरूले सर्पका अलग अलग प्रजातिहरूलाई यहाँ ल्याएर छाड्छन् । उनीहरूलाई खानका लागि भ्यागुता, मुसा, चरा र छेपाराहरू पनि जम्मा पारेर यो क्षेत्रमा छोडिन्छ । काँच वा काठको बाकसमा सर्पका अण्डाहरू कोरलेर बच्चाहरू जन्माइन्छ र उनीहरूको आकारअनुसार अर्को स्थानमा सारिन्छ । ठूलो भएपछि त्यति नै सावधानीसहित बुचडखाना पठाउने गरिन्छ ।

सधैं खतरनाक हुने भएकाले सर्पपालन गर्नेले एन्टी भेनम औषधि साथमै राख्नुपर्छ । हरेक प्रजातिका सर्पले टोकेमा प्रयोग हुने औषधि अलग हुन्छ । यसको जानकारी चिकित्सकहरूले दिन्छन् । चीनमा सर्प फार्ममा यस्ता धेरै घटनाहरू हुने गर्छन् । यसलाई कम गर्न किसानहरू हाई बुट र लामा पञ्जाहरू लगाउँछन् । बिषालु सर्पको बिष निकालेर ल्याबमा सुरक्षित राखिन्छ । त्यसपछि सर्पको शरीरको अन्य भागको उपयोग गरिन्छ । कस्मेटिक र कपडाका लागि सर्पको छाला र अन्य भाग प्रयोग गरिन्छ । मासुका लागि अलग प्रकारका सर्प पालिन्छ । पछिल्लो समयमा सर्प पर्यटनको माध्यम पनि बनेका छन् । मानिसहरू बिषालु सर्पलाई नजिकबाट नियाल्न आउँने गर्छन् ।

प्रकाशित मिति: शुक्रबार, मंसिर १, २०८० १६:०९