दसैं अफर : कुन मोटरसाइकलको मूल्य कति ?

A+ A A-

दसैं नेपालीहरुको महान चाड हो । विशेषतः हिन्दु धर्मालम्बीले मनाउने यो चाड आफन्तसँगको भेटभाट र रमाइलोको अवसरमात्र होइन, नयाँ सामान किन्ने बहानाका रुपमा पनि रही आएको छ ।

मुख्यतः परिवारका सबैले नयाँ लुगा किन्ने चलन रहेको दसैंमा अन्य सामान जोड्ने चलन पनि छ । पछिल्लो समय दसैंमा नयाँ मोटरसाइकल, स्कुटर वा गाडी किन्ने प्रचलन बढ्दो छ । यसैलाई मध्यनजर गर्दै सबै अटो कम्पनीले दसैंको अवसरमा विशेष छुट र विभिन्न ‘स्किम’ ल्याउने गरेका छन् ।

तर, सवारीसाधन भनेको सधैं किनिरहने चिज होइन । एकपटक किनेपछि वर्षौं प्रयोग हुने साधन हो । त्यसैले हामी धेरै पक्ष विचार गरेर मात्र किन्ने गर्छौं । मूल्य, माइलेज, कम्पनी, सीसी, डिजाइनलगायत आफ्नो आवश्यकताअनुसार धेरै पक्ष हेरी तुलना गरेर मात्र एउटा निर्णयमा पुग्ने गरेका छौं ।

यसरी विभिन्न पक्षको तुलना गर्नु जति आवश्यक छ त्यति नै झन्झटिलो पनि । नेपालमा अहिले एक दर्जन बढी ब्रान्डले सयभन्दा बढी भेरिएसनका मोटरसाइकल तथा स्कुटर बेच्छन् । यति धेरै विकल्प भएपछि आफ्नो आवश्यकता र बजेट अनुकुलको विकल्प रोज्न वास्तवमै गाह्रो हुन्छ । इन्जिन क्षमता र मूल्यका आधारमा नेपालमा उपलब्ध बाइकमध्ये उत्कृष्ट बाइकका विवरण यहाँ प्रस्तुत गरिएको छ । तपाईंले राेजेको र चाहेकोजस्तो मोटरसाइकल छान्न वा त्यसबारे थप कुरा बुझ्न यसबाट मद्दत मिल्न सक्छ ।

१२५ सीसी वा कम

होण्डा साइन

१२५ सीसी क्षमताको होण्डा साइन दुइटा भर्सनमा उपलब्ध छ, सीबी साइन र सीबी साइन एसपी । सीबी साइन पुरानो मोडल हो भने सीबी साइन एसपी उही मोडल तर आकर्षक डिजाइनमा आएको नयाँ भेरिएन्ट । दुई बाइकबीचको मूल्यमा २२ हजारको फरक छ ।

मूल्य : २,०७,९०० रुपैयाँ र २,२९,९०० (एसपी)
इन्जिन : १२५ सीसी
इन्धन : १०.५ लिटर
माइलेज : ६५ किमि प्रतिलिटर

हिरो स्प्लेन्डर आईस्मार्ट ११०

स्प्लेन्डर नेपाली बजारमा सबैभन्दा विश्वसनीय बाइक हो । हिरो मोटर्सले नेपालमा स्प्लेन्डरको ५ वटा भेरिएन्ट उपलब्ध गराउँदै आएको छ । त्यसमध्ये स्प्लेन्डर आइस्मार्ट ११० सबैभन्दा नयाँ भर्सन हो ।

मूल्य : १,८३,५०० रुपैयाँ
इन्जिन : ११० सीसी
इन्धन : १०.५ लिटर
माइलेज : ७५ किमि प्रतिलिटर

सुपर स्प्लेन्डर

स्प्लेन्डरले नेपालको दुई पाङ्ग्रे बजारमा विशेष स्थान बनाएको छ । ग्रामिण भेगमा बढी प्रयोग हुने यो बाइक नयाँ भर्सन आएपछि शहरी क्षेत्रमा पनि लोकप्रिय भएको छ । १२५ सिसिको सुपर स्प्लेन्डरमा भएको आइथ्रीएस प्रविधिले यसको लोकप्रियता बढाएको हो । आइथ्रीएस प्रविधिले बाइक नगुडेको बेला इन्जन स्वतः बन्द गरिदिन्छ । यसले ट्राफिक जाममा परेको बेला इन्धन बचत गर्न सहयोग पुग्छ ।

मूल्य : १,९४,००० रुपैयाँ
इन्जिन : १२५ सीसी
इन्धन : १३ लिटर
माइलेज : ७५ किमि प्रतिलिटर

यामाहा सलुटो

१२५ सीसी क्षमताको यामाहा सलुटोलाई यसको युनिफाइड ब्रेकिङ सिस्टम (युबीएस)ले यो श्रेणीका अन्य बाइकभन्दा फरक बनाउँछ । डिस्क ब्रेक र युबीएस भएको सलुटो चलाउन सजिलो र कन्ट्रोल गर्न सहज हुन्छ ।

मूल्य : २,०७,९०० रुपैयाँ
इन्जिन : १२५ सीसी
इन्धन : ७.६ लिटर
माइलेज : ७८ किमि प्रतिलिटर

टिभिएस स्ट्राइकर

टिभिएस बलियो सामान उत्पादनका लागि ख्यातिप्राप्त कम्पनी हो । टिभिएसको स्ट्राइकर पनि आफ्नो सेग्मेन्टमा ग्राहकको भरोसा जित्दै राम्रो व्यापार गर्न सफल बाइक हो ।

मूल्य : १,९२,९०० रुपैयाँ
इन्जिन : १२५ सीसी
इन्धन : १२ लिटर
माइलेज : ६५ किमि प्रतिलिटर

बजाज डिस्कोभर

बजाजको डिस्कोभर पनि यो सेग्मेन्टको एकदमै चर्चित बाइक हो । ५ गियरको यो बाइकको इन्जिन निकै बलियो भएकाले लामो दुरीको यात्रामा पनि सहज हुन्छ । बजाजले नेपालमा डिस्कोभरको दुईवटा भेरिएन्ट उपलब्ध गराएको छ – बजाज डिस्कोभर र बजाज डिस्कोभर एसटी । भेरिएन्ट र भेरिएसनअनुसार यो बाइकको मूल्य फरकफरक छ ।

मूल्य : १,९८,९०० (एसटी) रुपैयाँ, १,८७,९०० रुपैयाँ (डिस्क ब्रेक), रुपैयाँ १,७९,९०० (ड्रम ब्रेक)
इन्जिन : १२५ सीसी
इन्धन : १० लिटर
माइलेज : ८२ किमि प्रति लिटर, ७० किमि प्रतिलिटर (एसटी)

१५० सीसी

यामाहा एफजीएस एफआई डुअल डिस्क

यो १५० सीसी सेग्मेन्टको सर्वोत्कृष्ट बाइक हो । दुवै चक्कामा डिस्कब्रेक भएकाले यो बाइक चलाउन सुरक्षित र सहज छ ।
मूल्य : २,९५,९०० रुपैयाँ
इन्जिन : १४९ सीसी
इन्धन : १२ लिटर
माइलेज : ५३ किमि प्रतिलिटर

बजाज पल्सर

बजाजको पल्सर नेपालमा सर्वाधिक बिक्रि भएको बाइक मोडल हो । १५० सीसीदेखि २२० सीसीसम्म आकर्षक डिजाइन र विभिन्न भेरिएन्टमा उपलब्ध यो बाइकको १५० सीसी सेग्मेन्टमा नयाँ भर्सन आएको छ – पल्सर १५० टीडी ।
मूल्य : २,६४,९०० रुपैयाँ
इन्जिन : १४९.५ सीसी
इन्धन : १५ लिटर
माइलेज : ६५ किमि प्रतिलिटर

अपाचे आरटीआर

टिभिएसको अपाचे भेरिएन्टको सबैभन्दा चर्चित बाइक हो यो । पछिल्लो समय यो भेरिएन्टमा टिभिएसले थुप्रै बाइक ल्याएको छ । यो सेग्मेन्टमा आरटीआर १६० टुभी, आरटीआर १५० टुभी र आरटीआर १६० फोरभी उपलब्ध छन् । डिजाइनको कोणबाट फोरभी भर्सन उत्कृष्ट छ भने पर्फमेन्सका हिसाबमा सबै बाइक गुणस्तरिय छन् ।

मूल्य : २,८८,९०० रुपैयाँ (फोरभी), २,५४,९०० रुपैयाँ (१६० टुभी), २,५१,९०० रुपैयाँ (१५० टुभी)
इन्जिन : १६० सीसी र १५० सीसी
इन्धन : १२ लिटर (फोरभी), १६ लिटर (१६० टुभी), १२.५ लिटर (१५० टुभी)
माइलेज : ४५ किमि प्रति लिटर (१६० फोरभी), ५० किमि प्रति लिटर (१६० टुभी), ६० किमि प्रतिलिटर (१५० टुभी)

आर–वानफाइभ भीथ्री

आर–वानफाइभ यामाहाको उत्कृष्ट स्पोर्ट्स बाइक हो । यसको पहिलो र दोस्रो भर्सनको उल्लेखनिय सफलतापछि यामाहाले तेस्रो भर्सन भीथ्री बजारमा ल्याएको हो । यसको पनि दुई वटा भेरिएन्ट छन् । एन्टीलक ब्रेकिङ सिस्टम (एबीएस) भएको र नभएको । एबीएस प्रविधिले ब्रेकिङ सिस्टममा सुधार ल्याउँदै बाइक दुर्घटना कम गर्नुका साथै दुर्घटना भएमा क्षति न्युनीकरणमा पनि सहयोग गर्छ ।

मूल्य : ४,३१,९०० रुपैयाँ, ४,५७,९०० रुपैयाँ (एबीएस)
इन्जिन : १५५ सीसी
इन्धन : ११ लिटर
माइलेज : ४५ किमि प्रतिलिटर

यामाहा एमटी वानफइभ

१५० सीसी सेग्मेन्टमा सबैभन्दा धेरै विकल्प र सुविधासम्पन्न बाइक उपलब्ध गराउने कम्पनीमा यामाहा सबैभन्दा अगाडी छ । यो सेग्मेन्टमा मात्र यामाहाले विभिन्न मोडलका लगभग १० भेरिएन्टका बाइक नेपाली बजारमा ल्याएको छ । त्यसमध्ये एमटी वानफाइभ सबैभन्दा नयाँ मोडल हो । दुवै चक्कामा डिस्क ब्रेक भएको यो बाइकको अगाडीको डिस्क ब्रेकमा सिंगल च्यानल एबीएस प्रविधि प्रयोग भएको छ ।

मूल्य : ४,२४,९०० रुपैयाँ
इन्जिन : १५५ सीसी
इन्धन : १० लिटर
माइलेज : ४३ किमि प्रतिलिटर

२०० सीसी वा बढी

पल्सर एनएस २००

२०० सीसी र त्योभन्दा बढी सीसी क्षमताको बाइक विशेषतः युवावर्ग केन्द्रित सेग्मेन्ट हो । त्यसैले पल्सर एनएस २०० पनि युवावर्गले नै बढी चढ्ने गरेका छन् । मस्कुलर नेकेड डिजाइनको यो बाइक पिकअप र स्टाइलका कारण लोकप्रिय छ ।
मूल्य : ३,१९,९०० रुपैयाँ
इन्जिन : १९९.५ सीसी
इन्धन : १२ लिटर
माइलेज : ३६.१ किमि प्रतिलिटर

पल्सर २२० एफ

२०० सीसी वा त्योभन्दा माथिका बाइक युवा केन्द्रित बाइक भए पनि पल्सर २२० ले पछिल्लो एक दशकयता सबै उमर समूहका व्यक्तिको मन जित्न सफल भएको छ । हेभि बाइक मनपराउने जुनसुकै उमेर समूहका व्यक्तिको पहिलो रोजाइ बन्न सफल यो बाइक यो सेग्मेन्टमा नेपालमा सबैभन्दा बढी बिक्री भएको बाइक पनि हो ।
मूल्य : ३,१४,९०० रुपैयाँ
इन्जिन : २२० सीसी
इन्धन : १५ लिटर
माइलेज : ४० किमि प्रतिलिटर

यामाहा एफजी २५

एफजी टुफाइभ पनि विभिन्न उमेर समूहका व्यक्तिले मनपराएको हेभी बाइकमध्येमा पर्छ । विद्यार्थी, जागिरे, व्यापारीदेखि हरेक वर्ग र पेसाका व्यक्तिहरुको रोजाइमा पर्न सफल भएको छ यो बाइक ।

मूल्य : ३,८९,९०० रुपैयाँ
इन्जिन : २४९ सीसी
इन्धन : १४ लिटर
माइलेज : ४३ किमि प्रतिलिटर

अपाचे आरटीआर २०० फोरभी

टिभिएस बाइकको ओरालो लाग्ने खतरामा रहेको नेपाली बजार फेरि उकास्न यो बाइकले उल्लेखनीय भूमिका खेलेको छ । आकर्षक डिजाइन, चलाउन सहज र बलियो इन्जिनका कारण यसले नेपाली बजारमा राम्रो उपस्थिति बनाउन सफल भएको हो ।

मूल्य : ३,२४,९०० रुपैयाँ
इन्जिन : १९७.७५ सीसी
इन्धन : १२ लिटर
माइलेज : ३७ किमि प्रतिलिटर

केटीएम ड्युक

स्ट्रिट फाइटर क्याटेगोरीमा पर्ने केटीएम ड्युक लक्जरी बाइक हो । तुलनात्मक रुपमा बढी मूल्य बढी मर्मत खर्च लागेपनि हेर्दा स्टाइलिस, चढ्दा आरामदायी र चलाउन एकदमै सजिलो हुने हुनाले धेरैको रोजाइमा पर्न सफल भएको छ । विशेषतः युवाहरु नै यसको लक्षित ग्राहक हुन् ।

मूल्य : ४,९९,९०० रुपैयाँ (ड्युक २००), ५,८९,९०० रुपैयाँ (ड्युक २५०), ८,२९,९०० रुपैयाँ (ड्युक ३९०)
इन्जिन : १९९.५ सीसी, २४८.८ सीसी, ३७३.२ सीसी
इन्धन : १०.२ लिटर (ड्युक २००) र १३.५ लिटर
माइलेज : ३० किमि प्रति लिटर (ड्युक २००) र ३५ किमि प्रतिलिटर

प्रकाशित मिति: आइतबार, असोज १२, २०७६ १२:४७