भूकम्प प्रभावित जाजरकोट र रुकुम पश्चिममा सुरु भएको छैन राहत वितरण

A+ A A-

शुक्रबार राति ११ बजेर ४७ मिनेटमा जाजरकोटको बारेकोट गाउँपालिका-१, रामीडाँडा केन्द्रविन्दु भएर गएको भूकम्पबाट जाजरकोट र रुकुम पश्चिम अस्तव्यस्त भएकाे छ । भूकम्पबाट मृत्यु हुनेको संख्या यो समाचार तयार पार्दासम्म १ सय ३६ पुगेको छ भने १ सय ४० जना घाइते भएको नेपाल प्रहरीले जनाएको छ ।

भूकम्पमा परी जाजरकोटमा ९५ जनाको मृत्यु भएको छ भने ५५ जना घाइते भएका छन् । रुकुम पश्चिममा ३८ जनाको मृत्यु तथा ८५ जना घाइते छन् । ६ दशमलव ४ म्याग्निच्युडको भूकम्प गएकाे थियो । मध्यरातमा मानिसहरू सुतिरहेको अवस्थामा भूकम्प गएकाले घरभित्र च्यापिएर धेरैको मृत्यु भएको छ ।

जाजरकोट भूकम्पको केन्द्रविन्दु बारेकोटमा मानवीय क्षति भएको छैन । भूकम्पको केन्द्रविन्दु रहेको बारेकोटमा भौतिक संरचनामा क्षति पुगे पनि मानवीय क्षति भने नभएको गाउँपालिकाका अध्यक्ष बीरबहादुर गिरी बताउँछन् ।

‘भौतिक संरचना ध्वस्त भए पनि भाग्य मान्नुपर्छ भूकम्पको केन्द्र भनिएको छ तर, मानवीय क्षति भने भएको छैन । मानिसहरूको बिजोग छ । पाटो, बारी जंगलतिर प्रभावितहरू बसिरहेका छन् । उनीहरूको खानपानमा समस्या छ । सडक भासिएको छ,’ अध्यक्ष गिरीले शिलापत्रसँग भने ।

मानिसहरू त्रासमा रहेको र घर वरपर जान नसक्ने अवस्थामा रहेको उनले बताए । ‘स्थिति भयावह छ । जनताको सामाजिक मनोविज्ञान आतंकित भएको छ । घरदेखि तर्सिने र घरतिर जानै नमान्ने अवस्था छ,’ अध्यक्ष गिरीले भने ।

तीन जना घाइतेलाई हेलिकोप्टरमार्फत उपचारका लागि सुर्खेत पठाइएको उनले जानकारी दिए । घाइतेहरूले जिल्ला अस्पताल र स्थानीय स्वास्थ्य केन्द्रहरू खचाखच छन् । दुवै जिल्लामा घाइतेहरूको उद्दार तथा उपचारका लागि सुरक्षाकर्मी र स्वास्थ्यकर्मी परिचालन गरिएको छ । गम्भीर घाइते भएकाहरूलाई नेपाली सेनाको हेलिकोप्टरमार्फत उपचारका लागि सुर्खेत, नेपालगन्ज र कोहलपुर लगिएको छ ।

रुकुम पश्चिममा ३८ जनाको मृत्यु भएको छ । तीमध्ये महिला र पुरुष १९-१९ जना रहेको सहायक जिल्ला अधिकारी प्रमेश बडुवालले शिलापत्रलाई जानकारी दिए । अस्पतालमा भर्ना भएका १५४, डिस्चार्ज भएका ५३, उपचाररत ५९ र अन्य जिल्ला रिफर गरिएका १८ जना छन् । अन्य जिल्ला लैजान नेपाली सेनाको दुईवटा हेलिकोप्टर र वायुसेवा निगमको एउट जहाज प्रयोग गरिएको बडुवालले जानकारी दिए ।

जिल्लामा राहत जाने क्रम अझै सुरु नभएको उनले बताए । ‘घरहरू भत्किएर धेरै मानिहरू पुरिएको भन्ने खबर छ । त्यसमा एम्बुलेन्स, स्वास्थ्यकर्मी र सुरक्षाकर्मी परिचालन भएका छन् । मृतक, घाइतेको पहिचान भइसकेपछि राहत केन्द्रित हुन्छौँ,’ सहायक प्रमुख जिल्ला अधिकारी बडुवालले भने ।

जाजरकोटमा पनि नेपाली सेनाको २ वटा हेलिकोप्टरमार्फत गम्भीर घाइतेलाई अन्य जिल्ला लैजानको काम भएको जिल्ला प्रशासन कार्यालयका प्रशासकीय अधिकृत तथा सूचन अधिकारी हरिशचन्द्र शर्माले जानकारी दिए । जिल्लामा स्थानीय स्रोतसाधनको प्रयोग गरी सम्भव भएसम्म उद्धारको काम भइरहेको छ । नेपाली सेना, नेपाल प्रहरी सशस्त्र प्रहरी उद्धारमा खटिएका छन् । प्रधानमन्त्री पुष्पकमल दाहाल प्रचण्डको टोली फिल्ड भ्रमण सकेर काठमाडौं फर्किएको छ ।

दुवै जिल्लाको घाइतेहरूको उपचारका लागि नेपालगञ्जस्थित भेरी अस्पताललाई डेडिकेटेड अस्पताल तोकिएको छ । कोहलपुर मेडिकल कलेज लगायत नेपालगञ्जमा रहेका ठूला अस्पतालहरूलाई तयारी अवस्थामा राखिएको छ ।अस्पतालमा बिरामीका लागि रगत अभाव नभएको अधिकारीले बताए । ‘रगत अभाव छैन । आवश्यक परे स्थानीय व्यक्ति सुरक्षाकर्मीहरूबाट जुटाउन तयारी अवस्थाम छन्,’ उनले भने । कतिपय घाइतेहरूले आफैँ उपचार गरेको उनले बताए ।

राहतको चरणमा जाजरकोटमा पनि काम हुन सकेको छैन । ‘पहिला उद्धारमा केन्द्रित छौँ । राहत सामग्रीका लागि गृह मन्त्रालयले पनि समन्वय गरिरहेको छ । दाताहरू पनि सम्पर्कमा आएका छन् । सामग्री आएपछि जिल्ला विपद् व्यवस्थापन समितिमार्फत वितरण गर्छौं,’ सूचना अधिकारी अधिकारीले भने ।

प्रकाशित मिति: शनिबार, कात्तिक १८, २०८० १४:२४