एकीकृत समाजवादीमा मन्त्री फेर्न दबाब, पालाे कुर्दै सांसदहरू

A+ A A-

धान रोप्ने बेलामा असारमा किसानले मल पाएनन् । पाएको मल पनि खसी काटेर भाग लगाएजसरी ७ बोरा रासायनिक मललाई ६३ ठाउँमा भाग लगाइयो । खेती गर्ने सिजनमा मलको हाहाकार हुने नेपालको नियति नै हो ।

अर्को, सूर्यविनायक–रत्नपार्क रुटमा चल्नेगरी द्रुत बस सेवा असोज ३ गतेबाट सञ्चालनमा आयो । तीन करोड लागतमा सञ्चालनमा ल्याइएको योजना असफलजस्तै भयो ।

यी दुवै काममा एकीकृत समाजवादीबाट सरकारमा गएका मन्त्रीहरू छन् । कृषि तथा पशुपन्छी मन्त्रालय बेदुराम भुसाल र भौतिक पूर्वाधार तथा यातायात मन्त्रालय प्रकाश ज्वालाले सम्हालेका छन् । एकीकृत समाजवादीबाट नन्दा चपाई यातायात राज्यमन्त्री छिन् ।

यस्ता कामले पार्टीभित्र मन्त्रीहरूको काम भएन भनेर चर्को आलोचना सुरु भएको छ । तर, सो विषयले पार्टीको औपचारिक फोरममा भने प्रवेश पाएको छैन ।

‘काम गरेनन्, काम भएन भन्ने छ । जनअपेक्षाअनुसार काम गरेनन् । अनपेक्षित र महत्त्वाकांक्षी योजना ल्याउने गरेका छन् । सामान्य कुरा द्रुत बस सेवा पनि सम्भव थिएन । नचाहिने काम भयो । घोषणा नगरेको भए हुन्थ्यो,’ एकीकृत समाजवादीका एक नेताले शिलापत्रसँग भने, ‘कृषिमा त्यस्तै छ । मल दिन नसक्ने । कमिसनखोरहरूले देश कब्जा गरेका छन् । भाषणमा एक थोक हुने व्यवहारमा अर्को हुने छ । यस्तो भएपछि मन्त्रालयमा बसेर के अर्थ ? हामीले भन्नचाहिँ मिल्दैन ।’

मन्त्रालयमा गएर उपलब्धि हुँदैन भने सरकारमा किन जाने भन्ने प्रश्न पार्टीका कार्यकर्ता र नेताको छ । जनतासँग जोडिएर काम गर्दा जनसमर्थन जुट्छ भन्ने बुझाइ नेताहरूको छ ।

विशेष गरी चुनाव हारेका शीर्ष नेताहरू सरकारमा नै जान नहुने पक्षमा छन् । सम्मानित नेता झलनाथ खनाल र उपमहासचिव तथा प्रवक्ता जगन्नाथ खतिवडालगायतका नेताहरू सो पक्षमा भए पनि पार्टी बहुमतको निर्णय मानेर बसेका छन् । पार्टीका आन्तरिक छलफलमा उनीहरूले सो कुरा उठाइरहन्छन् ।

सरकारबाहिर रहन अध्यक्ष माधव नेपाल तयार छैनन् । सत्ताबाहिर रहँदा कमजोर हुने एमालेकालीन बुझाइ अध्यक्ष नेपालमा रहेको नेताहरू बताउँछन् । सत्तामा बस्दा थोरै भए पनि जनसमर्थन पाइने बुझाइमा रहेका नेपाल सत्ताबाहिर बसेर सरकारको समर्थन गर्न तयार छैनन् ।

१० सांसद रहेको पार्टीमा आलोपालो मन्त्री हुँदा प्राय: सबैलाई मन्त्री बन्ने अवसर छ । एक नेताका अनुसार सबै सांसदहरू मन्त्री बन्न पालो पर्खेर बसेका छन् ।

पूर्वमन्त्रीहरू किसान श्रेष्ठ र प्रेम आले दोस्रो चरणमा मन्त्री बन्न आकांक्षी छन् । उनीहरू पार्टीमा पनि प्रभावशाली छन् । उपाध्यक्ष राजेन्द्र पाण्डे र मेटमणि चौधरी पनि अध्यक्ष नेपालको प्राथमिकतामा छन् ।

अहिले तीन जना सांसद मन्त्री बनेका छन् । सत्ता गठबन्धनको पूर्वसहमतिअनुसार सरकार हेरफेर भएमा एक वर्ष प्रधानमन्त्री बन्ने पालो अध्यक्ष नेपालले पाउनेछन् । तीन चरणमा मन्त्री बनाउँदा सबै सांसदको पालो पुग्ने भएकाले एकीकृत समाजवादीका सांसदहरू मन्त्री बन्ने पर्खाइमा रहेको ती नेताले बताए ।

श्रेष्ठ र आलेले पहिलो चरणमा नै मन्त्री बन्नुपर्ने निकटहरूसँग बताउने गरेका छन् । यस्तोमा मन्त्री भएका भुसाल र ज्वालाको आलोचना सुरु भएपछि उनीहरूको मन्त्री बन्ने पालो ‘अर्ली’ आउन सक्ने बुझाइ नेताहरूको छ ।

भुसालको तुलनात्मक रूपमा आलोचना चर्को हुने गरेको छ । पार्टीले हालै समाजवादी अभियान तराईका २२ जिल्लामा सम्पन्न गर्‍यो । भुसाल महासचिवबाट उपाध्यक्षमा बढुवा भएका व्यक्ति हुन् । उनी भएको भए सो अभियान पनि नहुने बुझाइ नेताहरूमा छ ।

‘भुसालजी महासचिव भएको भए समाजवादी अभियान नै नहुने थियो । उपमहासचिव विजय पौडेलले चुनावअघि नै अभियान गर्नुपर्छ भनेर गर्नुभएको प्रस्ताव अड्किएको थियो । अहिले मन्त्री भएपछि पनि उहाँले एउटा पनि गतिलो काम गर्नुभएको छैन,’ पार्टीका एक नेताले भने ।

समाजवादी अभियानमा कृषकका उत्पादन राज्यले खरिद गरेर किसानलाई बजारको ग्यारेन्टीसँगै राहत हुने एजेन्डा लिएको थियो । पार्टीका एजेन्डा मन्त्रीले कार्यान्वयन गर्न नसकेको एक पदाधिकारीले बताए ।

‘पार्टीका एजेन्डालाई सरकारमार्फत जनतासँग जोड्ने काम मन्त्रीको हो । त्यो गर्न उहाँ (मन्त्री भुसाल) ले सकिरहनुभएको छैन । खै किन हो ? यो कार्यक्रम लैजान दबाब छ । उहाँले काम गर्न सक्नुभयो भने दबाब छैन,’ ती पदाधिकारीले शिलापत्रसँग भने ।

मन्त्रीको हेरफेरका लागि कार्यकर्ताबाट सुझाव आएको प्रवक्ता खतिवडा बताउँछन् । ‘चर्चा चलेकै छ । तलबाट सुझाव अझै आओस् भनेर पर्खिएको अवस्था हो । औपचारिक रूपमा कुरा आएको छैन । पर्सि सचिवालय बैठकमा पनि एजेन्डा छैन । केही छलफल होला । मन्त्री फेर्न दबाब होइन, परामर्शको रूपमा विषय उठेको छ,’ उनले भने ।

गत वर्षको चैत मध्यमा बनेका मन्त्रीहरूको कार्यमूल्याकंन गर्ने बेला नभएको प्रवक्ता खतिवडाले बताए ।

‘राम्रो प्रस्तुति गर्न सकिँदैन । दुईवटा मन्त्री लिएर हुने पनि केही होइन । सरकारलाई समर्थन गरेर विपक्षमा बस्नुपर्छ । विपक्षी भूमिका निर्वाह गर्नुपर्छ । यो मेरो व्यक्तिगत धारणा हो,’ प्रार्टी प्रवक्ता खतिवडाले भने ।

मन्त्रीहरूलाई पार्टीको नीतिअनुसार कार्यक्रम ल्याउन प्रयास भइरहेको नेता तथा पार्टी कार्यालयका सचिव जीवनराम श्रेष्ठ बताउँछन् । ‘संयुक्त सरकारमा मन्त्री एक्लैले सबै काम गर्न सकिन्छ भन्ने छैन । मन्त्रालयका कामहरू पार्टीको नीतिअनुसार गराउने हाम्रो प्रयास छ,’ उनले शिलापत्रसँग भने ।

प्रकाशित मिति: शुक्रबार, कात्तिक १७, २०८० २०:००