विश्वकपमा नेपाल: निर्णायक खेलका पाँच ‘हिरो’

तस्वीर : क्यान

A+ A A-

बिहीबार कीर्तिपुर मैदानमा ओमानविरुद्ध १४६ रनको लक्ष्य पछ्याएको नेपाल १४० रनमा सीमित हुँदा अमेरिका र वेस्ट इन्डिजमा हुने टी २० विश्वकप क्रिकेटमा छनोट हुन नेपालले तुलनात्मक रूपमा बलियो प्रतिद्वन्द्वी यूएई पायो ।

शुक्रबार बलरलाई सहयोगी हुने देखिएको मूलपानी मैदानमा नेपालका कप्तान रोहित पौडेलले टस हारे । अनुमान र अपेक्षाविपरीत यूएईका कप्तान मोहम्मद वासिमले पहिला ब्याटिङ रोजे । बिहानीको समयमा बल स्विङ हुने भएकाले नेपालले टस हारे पनि पहिला बलिङ गर्ने राम्रो अवसर पायो । सायद बिहीबार १४६ रन पछ्याएको नेपाल ओमानसामु निरीह देखिएकाले यूएईका कप्तानले पहिला ब्याटिङ रोजेका पो हुन् कि ।

जे भए पनि मैदानमा खेल जित्न खेल्नैपर्छ । त्यसमाथि क्रिकेट एक टिम खेल हो । यहाँ ११ जना खेलाडीले आफ्नो शतप्रतिशत दिनुपर्छ । र, पाएका मौकाहरूको पनि फाइदा उठाउन सक्नुपर्छ । नेपाली टिमका लागि मैदानमा ११ खेलाडी भए पनि मैदानबाहिर समर्थकका रूपमा १२औँ खेलाडी पनि साथमा थिए । त्यसैले शुक्रबार नेपालले चाहेजस्तै नतिजा आयो । नेपालले जित्यो, विश्वकपमा छनोट भयो ।

विश्वकप छनोट एसिया फाइनलको सेमिफाइनलसम्म आइपुग्न मैदानमा खेलाडीले गरेको प्रदर्शन ओमानविरुद्धको बाहेक उत्कृष्ट थियो । त्यसैले शुक्रबार सेमिफाइनलमा यूएईलाई नेपालले हराउन सक्ने विश्वास थियो ।

जब यूएईका ब्याटर मैदानमा आए, सोमपाल कामीले बलिङ थाले नेपाली समर्थकले हुटिङ सुरु गरे । विस्फोटक अन्दाजमा विन्दास ब्याटिङ गर्ने यूएईका कप्तान मोहम्मद वासिमले आफ्नो लयअनुसार ब्याटिङ गर्दा नेपालले ३ ओभरमै २९ रन दिइसकेको थियो । दबाबमा नेपाली बलर थिए । तर, सोमपाल कामीले चौथो ओभरको पहिलो बलमै रनआउटका रूपमा यूएईलाई पहिलो झट्का दिए । यूएईका ओपनर खालिद शाह तीन रन बनाएर सोमपाल कामीको थ्रोमा रनआउट भएपछि नेपालले विकेट लिन सुरु गर्‍यो । सोही ओभरको चौथो बलमा सोमपाल कामीले मोहम्मद वासिमको महत्त्वपूर्ण र सबैभन्दा ठूलो विकेट लिए ।

यसरी चौथो ओभरमा दुई विकेट गुमाएपछि यूएई दबाबमा पर्‍यो । दुवै ओपनरलाई पेभेलियन फर्काउने यो खेलका एक हिरो सोमपाल कामी बने । उनले खेलमा ३ ओभर बलिङ गर्दा १५ रन दिएर एक विकेट लिए ।

यूएईलाई १३४ को सामान्य स्कोरमा रोक्न पार्ट टाइम बलर कुशल मल्लको पनि महत्त्वपूर्ण योगदान रह्यो । बायाँहाते अफ स्पिनर मल्लले यूएईका अर्धशतक बनाइसकेका विर्त्य अरविन्द, अलिसान शारफु र आयान अफ्जल खानको विकेट लिए । उनले दुई विकेट अन्तिम ओभरमा लिएका थिए । यसरी खेलमा ३ ओभर बलिङ गर्दा ११ रन दिएर ३ विकेट लिएका उनी यो खेलका एक ‘हिरो’ बने । यसअघिका खेलहरूमा ब्याटिङबाट योगदान दिने उनले शुक्रबार बलिङबाट योगदान दिएर यूएईलाई सस्तैमा सीमित गर्न मद्दत गरे ।

यसपछि नेपालका सबैभन्दा भरपर्दा बलर सन्दीप लामिछाने पनि चम्किए आजको खेलमा । उनले यूएईका विस्फोटक ब्याटर आसिफ खान र अलराउन्डर बसिल हमिदको महत्त्वपूर्ण विकेट लिए । आजको खेलमा ‘हिरो’ बनेका उनले चार ओभरमा एक ओभर मेडन राख्दै १४ रन दिएर २ विकेट लिए ।

शुक्रबार नेपालले बलिङबाट खेल आफ्नो नियन्त्रणमा राखे पनि जित आसिफ शेखको महत्त्वपूर्ण अर्धशतकले सहज बनाएको हो । ठूला खेलमा सधैँ ब्याटबाट योगदान दिने उनले अर्का ओपनर कुशल भुर्तेललाई सस्तैमा गुमाए पनि गुल्सन झा र रोहित पौडेलसँग म्याचविनिङ साझेदारी गरे । उनले ५१ बलमा ६४ रनको सुझबुझपूर्ण इनिङ्स खेले । र, टिमलाई जिताएरै मैदानबाट नटआउट आए । उनी यो खेलमा प्लेयर अफ द म्याच पनि बने ।

नेपालले यूएईजस्तो बलियो प्रतिद्वन्द्वीलाई सहजै पाखा लगाएर निर्णायक खेलमा जित हासिल गर्दा कप्तान रोहित पौडेलको भूमिका पनि महत्वपूर्ण रह्यो । बलिङ परिवर्तनदेखि तेस्रो नम्बरमा गुल्सन झालाई ब्याटिङमा उतार्ने र आफैँले बलिङ गर्ने उनका हरेक निर्णय आज सही सावित भए । साथमा उनले नटआउट २० बलमा ३४ रन बनाए भने बलिङमा पनि एक विकेट लिए । सबैभन्दा महत्त्वपूर्ण टिमलाई जिताएरै मैदानबाट नटआउट फर्किए ।

प्रकाशित मिति: शुक्रबार, कात्तिक १७, २०८० १६:३५