वाओ ! लाङटाङ ट्रेक : कहाँबाट जाने ? कति लाग्छ खर्च ? (फोटो फिचरसहित)

A+ A A-

मनमोहक हिमशृङ्खलाको अवलोकन गर्न जर्मनीबाट नेपाल आएकी माइकी रसुवाको लाङटाङ पुगेकी थिइन् । लाङटाङको ४ हजार ७ सय ७३ मिटर उचाइको क्यान्जिङ री–२ चढेपछि उनी खुसी देखिन्थिन् । ‘वाओ अम्याजिङ,’ चर्कोस्वरमा उनको आवाज गुञ्जिएको थियो ।

हिमालयको देश भएकाले रोजाइमा नेपाल परेको उनले सुनाइन् । दक्षिण कोरियाबाट आएका ७५ र ७२ वर्षका दुई पुरुष ४ हजार ३ सय मिटर उचाइमा रहेको क्यान्जिङ री–१ चढेपछि क्यान्जिङ री–२ उक्लिएका थिए ।

जर्मनीबाट नेपाल आएकी माइकी ।

ज्येष्ठ नागरिकको यो जोश देखेर क्यान्जिङ री–२ मा केही बेर माहौल उत्सवझैँ बन्यो । ती ज्येष्ठ नागरिकलाई देखेर हौसिएकी माइकी आफू प्रभावित भएको बताइन् । खुसीले केही बेर क्यान्जिङ री–२ मा उत्सव चल्यो । त्योभन्दा बढी हिमालको चिसो सिरेटो चलेको थियो । चारैतिर हिमाल । तर, मध्य दिनमा हिमाललाई कुहिरोले ढकमक्क ढाकेको थियो । हिमाललाई चियाउने माइकीको सपना पूरा हुन सकेन । सूर्योदयसँगै खुल्ने हिमाल मध्यदिनमा आइपुग्दा कोहिरोले छोपिने रहेछ । त्यसैले क्यान्जिङ री १ र २ मा बिहान पर्यटकको घुइँचो लाग्ने रहेछ ।

क्यान्जिङ री भोलि बिहान फेरि चढ्ने वाचा गरेर माइकी क्यान्जिङ उपत्यकामा झरिन् । ती ज्येष्ठ नागरिक पनि क्यान्जिङ उपत्यकामै झरे । उनीहरू मात्र होइन, आन्तरिक पर्यटक पनि उत्तिकै थिए । दसैँ बिदामा लाङटाङ ट्रेकिङ जानेको लर्को थियो । कोही ५ हजार मिटर उचाइको चेर्गो रीतर्फ लागिरहेका थिए भने कोही पनि यलापिकतर्फ ।

दक्षिण कोरियाबाट आएका ७५ र ७२ वर्षका दुई पुरुष ।

पदमार्गमा सुसाइरहने लाङटाङ खोला । बीचबीचमा भेटिने अनुपम झरनामा रमाउँछन् पर्यटकहरू । काठमाडौंबाट नजिक पर्ने पदमार्ग भएकाले पनि आन्तरिक पर्यटको भिड लागेको थियो । नजिक र प्राकृतिक सौन्द्रर्य भएकाले लाङटाङ ट्रेकिङ आएको अन्तरिक पर्यटकहरू बताउँछन् ।

‘काठमाडौंबाट नजिक पर्ने पदमार्ग हो लाङटाङ । आँखाको लेन्सबाट लिन सकिने आनन्द क्यामेरामा कैद गर्न नसकिने रहेछ । एकैपटक आधा दर्जन हिमशृङ्खलाहरूको अवलोकन गर्न पाइने रहेछ । क्यान्जी गुम्बाबाट वरिपरि हिउँले ढाकेका हिमाल हेर्न पाइयो । सहज पदमार्ग र बसोबासका लागि पर्याप्त होटलहरू रहेछन्,’ काठमाडौंबाट गएका पुरुषोत्तम पोखरेलले भने ।

दसैँको बिदा पनि भएकाले ट्रेकिङ जानेको लर्को थियो । अधिकांश होेटलहरू भरिभराउ थिए । ‘यो सिजनमा धेरै पर्यटक आउनुभएको छ । होटल भरिएको छ,’ स्थानीय होटल व्यवसायी ग्याल्मु तामाङले भनिन्, ‘पुसपछि सुनसान हुन्छ । फेरि चैत वैशाखमा भिड लाग्छ ।’

हिमालको काखमा अवस्थित लाङटाङ–क्यान्जिङ उपत्यकामा ठडिएका छन् पक्की घरहरू । सडकले नछोएको ठाउँमा कसरी पक्कीघर बने होलान् भन्ने प्रश्न धेरैले गर्छन् । ‘स्याफ्रुबेँसीबाट खच्चड र भरियालाई सामान बोकाएर ल्याएको हो । कतिले काठमाडौंदेखि हेलिकोप्टरबाट पनि सामान ल्याएर बनाएका घरहरू हुन्,’ ग्याल्मुले भनिन् ।

पक्की घर २०७२ सालको भूकम्पछि बनाइएको उनी बताउँछिन् । ‘भूकम्पले काठ र ढुंगाका घरहरू भत्किएपछि पक्की घर बनाएका हौँ,’ उनले भनिन् । उनका अनुसार भूकम्पले लाङटाङ, गुम्बाडाँडा, थाङसेप र घोडातबेलाका धेरै घरसँगै मानवीय क्षति भएको थियो । त्यसपछि लाङटाङ–क्यान्जिङ उपत्यकामा कंक्रिटका घरहरू ठडिए । त्यस क्षेत्रका स्थानीयको आम्दानीको अर्को स्रोत भनेको चौँरीपालन र याकको ऊनबाट बनेका कपडा हुन् ।

कहाँबाट जाने ? कति लाग्छ खर्च ?

काठमाडौंबाट जाने हो भने माछापोखरीबाट सार्वजनिक यातायात वा निजी सवारीसाधनमा जान सकिन्छ । माछापोखरीमा बिहान ६ बजेदेखि ९ बजेसम्म सार्वजनिक बस पाइन्छ । बालाजु, कलंकी, थानकोट, गल्छी, नुवाकोट धुन्चेहुँदै ६–७ घण्टामा स्याफ्रुबेँसी पुगिन्छ । त्यसपछि सुरु हुन्छ पैदलयात्रा । स्याफ्रुबेँसीबाट ३ घण्टाको पैदल यात्रापछि ब्याम्बोमा बास बस्न पुगिन्छ । तर, समय रहेमा लामा होटल वा रिइभरसाइडमा गएर बास बस्दा उपयुक्त हुन्छ ।

भोलिपल्ट कहिले उकाली कहिले ओराली गर्दै लाङटाङ वा क्यान्जिङ गुम्बा पुगिन्छ । यात्रामा लाङटाङ खोलाले साथ छोड्दैन । पहाडको चेपबाट झरिरहेका झरना, चरा चुरुङ्गीको चिरबिरचिरबिर आवाजले मन शान्त बनाउँछ । यसरी अर्को दिन बिहानै क्यान्जिङ उपत्यकाबाट क्याजिङ री जान सहज हुन्छ । कतिपय भने क्यान्जिङ पुगेपछि यलापिक अथवा सेर्गोेरीतर्फ जान्छन् ।

क्यान्जिङ गुम्बाबाट क्यान्जिङ री–१ साढे १ घण्टा र क्यान्जिङ–२ साढे २ घण्टामा पुगिन्छ । क्यान्जिङ रीबाट फर्किएर लाङटाङ आएर बास बस्दा राम्रो हुन्छ । र, लाङटाङबाट स्याफ्रुबेँसी आएर सवारीसाधनमा आफ्नो घर फर्किन सहज हुन्छ ।

लाङटाङ ट्रेल राम्रो र सहज भएकाले ५ दिनमा पूरा गर्न सकिन्छ । लाङटाङ ट्रेकिङका लागि कति खर्च लाग्ल भन्ने प्रश्न धेरैलाई लाग्न सक्छ । ५ दिनका लागि बिहानबेलुकाको दालभात खान र बस्नका लागि १५ हजार भए पुग्छ । र, बाटोमा खानका लागि काजु, किसमिस, ओखर, बदम, बिस्कुट, क्याटबरी चक्लेट भने आफूले छुट्टै लैजानुपर्छ ।

तस्वीरमा हेरौँ लाङटाङ ट्रेक