अन्तर्राष्ट्रिय विमानस्थल निर्माणसँगै प्याराग्लाइडिङको अध्ययन

A+ A A-

राष्ट्रिय गौरवको आयोजना पोखरा क्षेत्रीय अन्तर्राष्ट्रिय विमानस्थल निर्माणको काम तीव्ररुपमा अगाडि बढेसँगै सरकारले पोखरामा प्याराग्लाइडिङ सञ्चालनको सम्भावना बारे अनुसन्धान सुरु भएको छ ।

संस्कृति, पर्यटन तथा नागरिक उडययन मन्त्रालयले विमानस्थल सञ्चालनपछि प्याराग्लाइडिङ उडानका बारेमा आवश्यक अध्ययन गर्न गठन गरेको टोलीले स्थलगत अवलोकन गरी सरोकारवालासँग छलफल गरेको छ ।

अध्ययन टोलीले लगातार दुई दिनसम्म अन्तर्राष्ट्रिय विमानस्थल सञ्चालनपछि पोखरामा प्याराग्लाइडिङ उडानलाई कसरी सञ्चालन गर्ने भन्ने विषयमा केन्द्रित रहेर सरोकारवालासँग आवश्यक छलफल गरेको टोलीका सदस्य एवं नेपाल हवाई खेलकुद संस्थाका अध्यक्ष योगेश भट्टराईले बताए ।

पोखरामा लामो समयदेखि सञ्चालान हुँदै आएको प्याराग्लाइडिङ पोखराको पर्यटनमा ब्राण्डका रुपमा स्थापित भइसकेको छ । पछिल्लो समयमा साहसिक खेलकुदका रुपमा विकास हुँदै गएको पोखराको प्याराग्लाइडिङ विश्वको पाँचौ उत्कृष्ट स्थानमा पर्दछ ।

अन्तर्राष्ट्रिय विमानस्थल सञ्चालनमा आएपछि पोखरामा प्याराग्लाइडिङ गर्ने प्रमुख स्थान सराङकोट लगायतका क्षेत्रमा नै उड्डयन प्रधिकारणले ‘होल्डिङ जोन’ का रुपमा राखेपछि यहाँको प्याराग्लाइडिङ धरापमा पर्ने सम्भावना बढेको हो ।

पोखरामा विमानस्थलको निर्माण सुरु भएसँगै नागरिक उड्ययन प्राधिकरण पोखराले सरोकारवालालाई समयसीमा तोकेर प्याराग्लाइडिङ गर्ने स्थानहरुको खोजी गर्न सुझाएको थियो ।

पोखराका सरोकारवाला व्यवसायीहरुले कार्यदललाई निश्चित समय तोकर सराङकोटलगायतका स्थनबाटै प्याराग्लाइडिङ उडान गर्न सकिने सुझाब दिएको कार्यदलका सदस्य एवं नेपाल हवाई खेलकुद संस्थाका सचिव इन्द्र भण्डारीले बताए ।

उनले विमानस्थल सञ्चालनपछि पनि पोखराको प्याराग्लाइडिङ उडान गर्न केही घन्टाको समय तोक्न अध्ययन टोलीमा छलफल भएको बताए ।

‘हामी एक महत्वपूर्ण निष्कर्ष सहित मन्त्रिज्यूलाई प्रतिवेदन बुझाउँदै छौं,’ उलने भने । ‘हामीलाई आशा छ पोखराको ब्राण्डको रुपमा स्थापित प्यारग्लाइडिङलाई यथास्थानबाटै सञ्चालन गर्न सबै सकारात्मक हुने छन् ।’

पूर्वी क्षेत्रबाट ल्याण्डिङ गर्ने जहाज कारणबस ल्याण्ड गर्न नसकेर (मिस एर्पोच) सोझै फेवातालमाथि आइपुग्न ३० सेकेण्ड लाग्ने भएकाले यसका बारेमा गहन अध्ययन गरिएको सचिव भण्डारीले बताए । ‘हामीले पोखराको प्याराग्लाइडिङ जोगाउँदै यसलाई ब्राण्डिङ गर्न धेरै कुराको खोजी गरिरहेका छौं’ उनले भने, ‘एकातिर लगानी र रोजगारीलाई सुरक्षित राख्दै गण्डकी प्रदेशको मुख्य आधारका रुपमा रहेको पर्यटनलाई कसरी जोगाउने प्रमुख चिन्ता हो ।’

अध्ययन टोलीले विमानस्थलको सञ्चालनपछि पोखरामा कसरी प्याराग्लाइडिङ उडान कायम राख्न सकिन्छ भनी विभिन्न मुलुकहरुको अवस्थाको पनि अध्ययन गरेर प्रतिवेदन तयार गर्ने निर्णयमा पुगेको टोलीका सदस्य एवं नाका अध्यक्ष योगेश भट्टराईले बताए ।

पोखराको सराङकोट र तोरीपानीबाट उडान भर्ने प्याराग्लाइडिङहरुको नियमन सहित ब्यवस्थापन गर्ने जिम्मेवारी नेपाल हवाई खेलकुद संस्था (ना) ले नै पाएको उनले बताए ।

हवाई खेलकुद संस्था (ना) ना का महासचिब वसन्त दवाडी पोखराको प्याराग्लाइडिङ साहसिक खेल गतिविधिमा विश्व बजारमा नै मुख्य ब्राण्ड बनिसकेको बताउँछन् । ‘अध्ययन टोली केही महत्वपूर्ण निष्कर्षसहित फर्किएको छ,’ उनले भने, ‘हामीलाई आशा छ, पोखराको प्याराग्लाइडिङलाई व्यवस्थित रुपले सञ्चालन गर्न अध्ययन टोलीले भूमिका खेल्ने छ ।’

अध्ययन टोलीले बाहिरबाट पोखरामा पटके उडानका लागि आउने पाइलट र नेपाली पाइलटहरुको लाइसेन्स जारी, नविकरण,उपकरण दर्ता, आवश्यक तालिम लगायतका काम गर्नेगरी जिम्मेवारी दिने गरी व्यवस्था गर्न प्रक्रिया अगाडि बढाउने सहमति भएको छ ।

प्याराग्लाइडिङ उडान गर्न लाग्ने शुल्कका वारेमा समेत अध्ययन टोलीले छलफल गरेको छ । अध्ययन टोलीले प्रतिवेदन लिपिबद्ध गरेर मन्त्रीलाई बुझाउने छ । पोखराको प्याराग्लाइडिङ उडान सञ्चालन र व्यवस्थापन गर्न नेपाल सरकार संस्कृति, पर्यटन तथा नागरिक उड्ययन मन्त्रालयले एक कार्यदल बनाएको छ ।

मन्त्रालयले प्राधिकरणका निर्देशक सुभाष झाको संयोजकत्वमा गठित ८ सदस्यीय कार्यदल बनाएको हो । कार्यदलको सदस्यमा संस्कृति, पर्यटन तथा नागरिक उड्ययन प्राधिकरणका अधिकृत मुकेश दाहाल सहितका ८ जना विभिन्न सम्बन्धित क्षेत्रका व्यक्तिहरु रहेका छन् ।

प्रकाशित मिति: शुक्रबार, असोज १०, २०७६ २३:४६