कुनै समय थियो, नेपाली क्रिकेट टोलीको बलिङ र फिल्डिङ बलियो पक्ष थियो । तर, नेपाली टोलीले १५० माथिको लक्ष्य पायो भने हामी फ्यानहरू निराश हुन्थ्यौँ । नेपाली क्रिकेट टोलीमा सबैभन्दा ठूलो समस्य नै ब्याटिङमा थियो । लाग्थ्यो– हाम्रो ब्याटिङ कहिल्यै सुध्रिँदैन । ब्याटिङमा पनि नेपालको ओपनिङ ब्याटिङमा एकदमै समस्या, फ्यानहरू रिसको झोकमा भन्थौ ०/२ बाटै सुरु गरौँ न, किन दु:ख पाउनु ? हुन पनि नेपाली क्रिकेट टोलीको ओपनिङ ब्याटिङले समर्थकको मन एकदमै दु:खाएको छ भन्नुपर्छ ।
खेल नै कम मात्रै खेल्न पाउने नेपाली क्रिकेट टोली अर्धशतक हेर्नकै लागि ६ महिना, वर्ष दिन कुर्नुपर्थ्यो । शतकको त कुरै नगरौँ । यति हुँदाहुँदै पनि कम लगानी, सीमित स्रोत साधनका बाबजुद नेपाली क्रिकेट टोलीले धेरै राम्रो नतिजा हासिल गर्यो । बलिङ र फिल्डिङमा त नेपालले चमत्कार नै गर्थ्यो । थोरै तलबमा पनि नेपाली खेलाडीले देशको नाम धेरैपटक विश्वमाझ चिनाए ।
अहिले समय फेरिएको छ । नेपाली क्रिकेट फेरिएको छ । पछिल्ला वर्षहरूमा नेपाली क्रिकेट टोलीले धेरै फड्को मारेको छ । खेलाडीहरूमा आत्मविश्वास बढेको छ । कुनै समय नेपालले पनि क्रिकेट खेल्छ र ? भन्ने देशहरूलाई नै आज नेपालले चुनौती दिन थालेको छ । पहिले अर्धशतक र शतक हेर्नै वर्षौं कुर्नुपर्ने हामी अहिले नेपाली क्रिकेट टोलीले हरेक खेलमा रेकर्डहरू कायम गर्न थालेको छ । विश्वले नेपाली क्रिकेटलाई नियालिरहेको छ । समग्रमा भन्दा हामी सम्पूर्ण नेपालीले गौरव गर्ने ठाउँमा नेपाली क्रिकेट टोली पुगेको छ ।
अब नेपाली क्रिकेटमा खाँचो भनेको स्पोन्सरहरूको हो । दुई/तीनवटा अन्तर्राष्ट्रियस्तरका राम्रा मैदानको पनि खाँचो छ । घरेलु क्रिकेटलाई अझै बढाउनुपर्नेछ । खेलकुदप्रति सरकारले गरेको बेवास्ता अब ध्यानाकर्षण गराउनुपर्नेछ । खेलकुदमा बजेट पनि बढाउनुपर्नेछ ।
यसरी सम्पूर्ण कमजोरी रहेका क्षेत्रहरूको विकासमा नेपाल सरकारको ध्यान जानु जरुरी छ । नेपाली क्रिकेटलाई अझै माथि पुर्याउन सबै जना एकजुट हुनु आजको आवश्यकता हो ।
कृष्ण रिजाल, नेपाली क्रिकेट समर्थक ।
प्रकाशित मिति: बुधबार, कात्तिक १५, २०८० २०:३४
-1742979654.jpg)
