गुटेरेसको सम्बोधनपछि प्रधानमन्त्री प्रचण्ड र एमाले भिड्दा कांग्रेस पन्छियो

गुटेरेसको सम्बोधनपछि प्रधानमन्त्री प्रचण्ड र एमाले भिड्दा कांग्रेस पन्छियो

A+ A A-

संयुक्त राष्ट्र संघका महासचिव एन्टेनियो गुटेरेसले संघीय संसदको संयुक्त बैठकमा सम्बोधन गरे । उनले जलावायु परिवर्तनले पारेको प्रभाव र शान्ति प्रक्रियामा विशेष जोड दिए ।

महासचिव गुटेरेसले जलवायु परिवर्तनको परिणामस्वरूप नेपालमा देखा परेको समस्या अन्याय भएको बताए । उनले जलवायु संकटको प्रभावको सामना गरिरहेका समुदायहरूप्रति चिन्तित भएको बताए ।

‘जलवायु परिवर्तनको परिणामस्वरूप यो देशमा के भइरहेको छ, त्यो डरलाग्दो अन्याय हो र जीवाष्म इन्धन युगको गम्भीर आरोप हो । जलवायु संकटको प्रभावको सामना गरिरहेका नेपालका ती समुदायहरूप्रति म अति चिन्तित छु,’ उनले भने, ‘संयुक्त राष्ट्रसंघ उनीहरूको साथमा छ । विश्वले पनि यस्तै गर्नुपर्छ ।’

उनले बितेको २० वर्षमा नेपालको यात्रा हेर्न लायक र अद्भुत रहेको बताउँदै नेपालले द्वन्द्वलाई सफलतापूर्वक साम्य पारेको र युद्धबाट शान्तितर्फ उन्मुख भएको भन्दै प्रशंसा पनि गरे । महासचिव गुटेरेसले शान्ति प्रक्रियाको काममा नेपाल एक्लै नरहेको बताए ।

‘तपाईंहरू एक्लो हुनुहुन्न । अन्तर्राष्ट्रिय मापदण्डहरू पूरा गर्ने, तपाईंको सर्वोच्च अदालतका निर्णय र पीडितहरूका आवश्यकता पूरा गर्ने प्रक्रियाको विकास गर्न र यसलाई व्यवहारमा ल्याउन संयुक्त राष्ट्र संघ तपाईंहरूलाई सहयोग गर्न तयार छ,’ उनले भने ।

महासचिव गुटेरेसले सम्बोधनमार्फत राष्ट्र संघको धारणा राखिसक्दा पनि नेपालका राजनीतिक दलहरू भने विभाजित नै देखिए । खास गरी सत्तारुढ दल र प्रमुख प्रतिपक्षी दल एमालेबीच आरोप प्रत्यारोप चल्याे ।

एमाले अध्यक्ष केपी शर्मा ओलीले शान्ति प्रक्रियामा एमाले तयार भएको तर सरकारकै कारणले टुंगोमा पुग्न नसकेको ब्रिफ आइतबारको भेटमा गुटेरेससँग गरेका थिए । मंगलबारको संघीय संसद बैठकमा महासचिव गुटेरेसको सम्बोधनपछि ओलीले प्रतिक्रिया दिन मानेनन् । उनले पार्टीको तर्फबाट धन्यवाद दिए भने गुटेरेसले उठाएको विषयको प्रशंसा गरे ।

ओलीले थप प्रतिक्रिया नदिए पनि प्रधानमन्त्री पुष्पकमल दाहाल प्रचण्डले भने देश विभाजित भएको केही नेताले देखाउनु दुर्भाग्य रहेको बताए । ‘उहाँको पूरै सहयोग रहन्छ भन्नेमा विश्वस्त छु । सम्पूर्ण अन्तर्राष्ट्रिय समुदायको सहयोग हुने वातावरण देखेको छु । मेरो निम्तामा उहाँ आउनुभयो । सफल भ्रमण भयो । नेपाल र नेपालीका निम्ति खुसी र गर्वको कुरा हो । योभन्दा बढी भन्न चाहन्नँ म,’ प्रधानमन्त्री प्रचण्डले भने, ‘नेपाल र नेपालको शान्ति प्रक्रियाका बारेमा अन्तर्राष्ट्रिय समुदाय र राष्ट्र संघको यस्तो राम्रो धारणा छ । तर दुर्भाग्य, हाम्रा नेता साथीहरूले यस्तो बेलामा देश विभाजित देखाउनुभयो । त्यो भने दुर्भाग्यपूर्ण हो ।’

शान्ति प्रक्रियामा अहिलेको सत्तारुढ दल र त्यसमा पनि माओवादी र प्रचण्ड सकारात्मक नभएको एमाले सचिव योगेश भट्टराई बताउँछन् ।

'शान्ति प्रक्रियामा सत्तारुढ दल र माओवादी र उसको अध्यक्ष प्रचण्ड सकारात्मक हुनुहुन्न भन्ने कुरा घामजत्तिकै छर्लङ्ग छ । किन द्वन्द्वपीडितले राहत क्षतिपूर्ति पाइरहेका छैनन् ? त्यसको पहिचान किन भइरहेको छैन भन्ने कुरा राष्ट्र संघका महासचिवलाई थाहा नहोला र ? त्यसमा हाम्रा अध्यक्षज्यूले प्रस्ट ढंगले भन्नुभयो,’ उनले भने ।

टीआरसी विधेयक टुंगो लगाउने र संक्रमणकालीन न्यायलाई कसैले मागिखाने भाँडो बनाउन नदिने भट्टराईले बताए ।

कांग्रेस सभापति शेरबहादुर देउवाले महासचिव गुटेरेससँगको भेटमा संक्रमणकालीन न्याय टुंग्याउने विषयमा दलहरूबीच सहमति भएको जानकारी दिएका थिए । तर मंगलबार संसद भवनमा सञ्चारकर्मीहरूसँग आफूलाई केही थाहा छैन भन्दै देउवाले प्रतिक्रिया दिएनन् ।

१७ वर्षपछि राष्ट्र संघका महासचिवले संक्रमणकालीन न्याय टुंग्याउनुपर्छ भन्दा राजनीतिक दलहरू किन असक्षम देखिए भन्ने प्रश्नमा कांग्रेसका मुख्य सचेतक रमेश लेखकले भने, ‘सँगै उहाँले संक्रमणकालीन न्यायको विषय जटिल हो भन्नुभएको छ । यो विषय समय लाग्छ । अरु देशको हेर्दा समय लाग्छ । यो कुरा उहाँले बुझ्नु भएको छ । हामीले जे भन्दै आएका छौँ, त्यही कुरा उहाँले भन्नुभएको हो । नयाँ कुरा होइन । पीडितमैत्री भएर यसको सम्बोधन हुनुपर्छ ।’

प्रकाशित मिति: मंगलबार, कात्तिक १४, २०८० १८:२३