इजरायलमा मारिएका गणेशकुमारको शव आफन्तलाई बुझाइयो, आजै अन्त्येष्टि गरिने

A+ A A-

इजरायलमा हमासको आक्रमणमा परी मृत्यु भएका बझाङ जयपृथ्वी– ६ का गणेशकुमार नेपालीको शव बझाङ पठाइएको छ । बिहीबार राति १ बजे नेपाली सेनाको हेलिकोप्टरबाट धनगढी ल्याइएको नेपालीको शव बझाङ पठाइएको हो ।

फ्लाई दुबईको विमानमार्फत बिहीबार बिहान ७ बजे काठमाडौँ पुगेको नेपालीको शव राति धनगढी ल्याइएको जिल्ला प्रशासन कार्यालय कैलालीले जनाएको छ ।

जिल्ला प्रशासन कार्यालय कैलालीका सूचना अधिकारी शिवराज जोशीले भने, ‘राति १ बजे शव धनगढी पुगेको थियो । सोही समय हामीले धनगढी नेत्रालयको एम्बुलेन्समार्फत शवलाई बझाङ पठाएका छौँ ।’ नेपालीको आज नै हिन्दु परम्पराअनुसार दाहसंस्कार गरिने उनको भनाइ छ ।

इजरायलमा हमासको आक्रमणमा परी मृत्यु भएका १० विद्यार्थीमध्ये चार जनाको शव आइतबार आफन्तको जिम्मा लगाइएको थियो । नेपालीको शव भने बिहीबार राति मात्र धनगढी पुगेसँगै पाँच जनाको शव आफन्तको जिम्मा लगाइएको हो । हमास आक्रमणबाट मारिएकामध्ये सात जना सुदूरपश्चिम प्रदेशका छन् ।

हालसम्म नेपालीसहित दार्चुला मालिकार्जुन– ४ का लोकेन्द्रसिंह धामी, दार्चुला लेकम–५ का दीपेशराज विष्ट, कैलाली घोडाघोडी–४ का नारायणप्रसाद न्यौपाने तथा कैलाली बौनियाँ–३ का आशिष चौधरीको शव यसअघि नै ल्याइसकिएको छ । प्रदेशका थप दुई जनाको शव ल्याउन सम्बद्ध नातेदारको डीएनए संकलन गरी पठाइएको र चाँडै नेपाल ल्याई आफन्तको जिम्मा लगाइने बताइएको छ ।

उक्त आक्रमणमा परी मृत्यु हुने अन्य विद्यार्थीहरूमा धनुषा सापही–६ का आनन्द साह, सुनसरी मधुवन–१ का राजेशकुमार स्वर्णकार, डोटी पचनाली–३ का राजन फुलारा, डोटी लामीखाल– ८ का पदम थापा र सल्यान शारदा–३ का प्रवेश भण्डारी रहेका छन् ।

सोही आक्रमणमा परेका कञ्चनपुर भीमदत्त–३ का विपिन जोशी अझै सम्पर्कविहीन छन् । सुदूरपश्चिम विश्वविद्यालयको कृषि क्षेत्रमा ‘लर्न एन्ड अर्न’ कार्यक्रमअन्तर्गत उनीहरू इजरायल गएका थिए ।

प्रकाशित मिति: शुक्रबार, कात्तिक १०, २०८० ०९:११