वैदेशिक लगानीकाे सुरक्षा ग्यारेण्टी गर्न बाँकी छः प्रचण्ड

A+ A A-

पूर्वप्रधानमन्त्री एवं नेकपाका अध्यक्ष पुष्पकमल दाहाल (प्रचण्ड)ले पहिले स्वदेशी लगानीलाई सुरक्षित वातावरण बनाउन सके विदेशी लगानी भित्र्याउन सकिने बताएका छन् । स्वदेशी लगानीकर्ताहरूले नेपालमा लगानीको वातावरण राम्रो छ भन्ने सन्देश बाहिर दिन सके विदेशी लगानी स्वतः नेपालमा भित्रिने भन्दै उनले पहिले स्वदेशी लगानीको सुरक्षा र वातावरण बनाउनुपर्ने बताएका हुन् ।

रूपन्देहीको तिलोत्तमा नगरपालिकाले आयोजना गरेको प्रथम लगानी सम्मेलनको बिहीबार उद्घाटन गर्दै उनले स्वदेशी लगानी बढाउन सार्वजनिक खरिद ऐन र ठेक्का प्रणालीलाई सरलीकरण गर्नुपर्ने बताए । साढे २ सय वर्षको तानाशाही व्यवस्था परिवर्तन गरी लोकतान्त्रिक गणतन्त्र स्थापना गरे पनि व्यवहारमा परिवर्तन गर्न नसके परिवर्तनको कुनै अर्थ नरहने उनको भनाइ थियो । उनले व्यवस्थासँगै आफ्नो सोच, शैली र संस्कार पनि बदल्न जरुरी रहेको बताए ।

‘हामीले पटकपटक आन्दोलनमार्फत व्यवस्था परिवर्तन गर्‍यौं, अब ऐनकानुन परिवर्तन गरेर भए पनि लगानीमैत्री वातावरण बनाउन बाँकी छ, विदेशीलाई लगानी सुरक्षित छ भन्ने विश्वास दिलाउन बाँकी छ, उनीहरूको लगानीको सुरक्षाको ग्यारेण्टी गर्न बाँकी छ’, उनले भने ‘त्यति गर्न सकियो भने देशमा लगानीको कुनै कमी हुने छैन ।’

त्यस्तै, अर्थमन्त्री डा. युवराज खतिवडाले लगानीको वातावरण नै नभएको भन्नु सत्य नभएको दाबी गरे । कैयौं कानुन परिमार्जन गरेर नीतिगत सुधारहरू सरकारले गरिरहेको उनको भनाइ थियो ।

प्रदेश–५ का मुख्यमन्त्री शंकर पोखरलले लगानीका आधारहरू प्रदेश नं. ५ मा तयार भएको भन्दै निर्धक्क लगानी गर्न आग्रह गरे । प्रदेशमा तीव्र गतिमा पूर्वाधारको विकास भइरहेको बताउँदै यसले लगानीकर्तालाई उत्साह थप्ने विश्वास लिएको उनको भनाइ थियो ।

आज मात्र चल्ने लगानी सम्मेलनमा संघीय सरकारका अर्थमन्त्री, राजनीतिक दलका नेताहरू, विभिन्न प्रदेशका मुख्यमन्त्री, विभागीय मन्त्रीहरू, उच्चपदस्थ सरकारी अधिकारीहरू, राष्ट्र बैंकका गभर्नर, लगानी बोर्डका प्रमुख कार्यकारी अधिकृत, डीएफआईडीका प्रतिनिधि, चिनियाँ प्रतिनिधिलगायत स्वदेशी तथा विदेशी लगानीकर्ताहरूको सहभागिता रहेको थियो ।

स्वदेशी तथा विदेशी लगानीलाई तिलोत्तमामा आकर्षित गर्ने उद्देश्यले लगानी सम्मेलनको आयोजना गरिएको नगरपालिकाका प्रमुख वासुदेव घिमिरेले बताए । नगरपालिकाले कृषि, पर्यटन, उद्योग, पूर्वाधारलगायत क्षेत्रलाई प्राथमिकता दिएर विभिन्न २२ परियोजनाको प्रस्ताव तयार गरेको छ ।

लगानी सम्मेलनमार्फत ती परियोजनामा निजीक्षेत्रबाट ५० अर्बभन्दा बढी पुँजी भित्रिने आयोजकको अपेक्षा छ । नगरपालिकाले पहिचान गरेका झण्डै १ सय परियोजनामध्येबाट प्राथमिकताका आधारमा २२ परियोजना प्रस्ताव गरिएको हो ।

प्रकाशित मिति: शुक्रबार, असोज १०, २०७६ ०४:०३