रेलको झ्यालले चम्काएको करिअर

A+ A A-

पर्ख पर्ख मायालु म पनि त आऊँला
रेलको झ्याल समाएर सँगै भागौंला...

यो गीत गाउने गायिका हुन् विन्दु परियार । जुन गीत मंगलम फिल्ममा समावेश गरिएको गीत हो । यो गीत अहिले पनि यूट्युबमा सर्च गरेर हेर्नेको संख्या घटेको छैन ।

मीठो स्वरकी धनी विन्दु सांगीतिक कार्यक्रमका लागि देश तथा विदेश गइरहन्छिन् । दाङमा जन्मेकी विन्दुले करिअरका उकालीओराली मनग्य भोगेकी छिन् ।

विन्दुको बाल्यकाल सामान्य रह्यो । लेकबेंसी, घाँसदाउरा, मेलापात गर्दागर्दै बित्यो बाल्यकाल । गाउँकै सरकारी विद्यालयमा पढिन् । गीतसंगीतमा परिवारका कोही पनि लागेका छैनन् । तर, मामाघरका हजुरबुबाले गीत गाउँथे । हजुरबुबाले गीत गाएको बेला विन्दुले पनि सँगै गाउँथिन् । त्यसैबेला संगीतप्रति नजानिँदो लत बस्यो विन्दुको ।

घरमा फुर्सद भयो गीत गुनगुनाएर बस्थिन् उनी । साथीहरूसँगै बसेर गीत गाउँदा उनी अरुको भन्दा राम्रो भाका हालेर गीत गाउँथिन् ।

‘माटोमा सिन्काले कोरेर गीत लेखिन्थ्यो अनि गाइन्थ्यो । गीत मात्रै होइन, नृत्य पनि गर्थें । गाउँदै नाचिन्थ्यो’, उनले विगत सम्झिइन् ।

गीत सुनेपछि सबैले हौसला दिन्थे । ‘मीठो स्वर छ, गीतसंगीततिरै लाग्नू’ भन्ने आशीर्वाद दिन्थे । विन्दुको संगीतप्रतिको लगाव झन् बढ्दै गयो ।

रेडियोमा, नारायण गोपाल, झलकमान गन्धर्व, आशा भोस्लेको गीत बज्थ्यो । त्यही गीत आफैंले नक्कल गरेर गाउँथिन् बिन्दु । अरूका गीतलाई भाका हालेर गाउन सिपालु थिइन् । विन्दुले पुराना लोकभाकाका गीतहरू सानैमा सुनिन् ।

स्कुलमा पनि विन्दुले गीत गाइन् । स्कुलको सांस्कृतिक कार्यक्रमहरूमा गीत गाएर थुप्रै पुरस्कारहरू पनि जितेकी छिन् । त्यसपछि त झन् उनको मीठो स्वरको चर्चा गाउँमा आसपासका क्षेत्रमा हुन थाल्यो । गाउँका हरेक सांस्कृतिक कार्यक्रममा उनको माग हुन थाल्यो ।

विन्दुलाई गायनभन्दा पनि नृत्यमा बढी मोह थियो । उनले विभिन्न कार्यक्रमहरूमा नृत्य गर्थिन् ।

२०६९ सालतिर एसएलसी दिएपछि गाउँ दाङ) मा ‘सरयु सिंगिङ स्टार प्रतियोगिता’ भएको थियो । त्यस प्रतियोगितामा सहभागी उनी प्रथम बन्न सफल भइन् । पहिलो स्थान मात्र होइन, उनले पुरस्कारस्वरूप सुरूमै फिल्मको गीत अवसर पाइन् र ‘अप्रिल फुल’ फिल्मकोे ‘तेरो मेरो पिरती’ बोलको गीत गाइन् ।

उनी गीत मात्रै रेकर्ड गराएर घर फर्किने सोचमा काठमाडौं आएकी थिइन् । गीत रिलिज भएपछि सबैबाट एकदमै राम्रो प्रतिक्रिया आयो । राम्रो प्रतिक्रियाले अब काठमाडौंमै बसेर संघर्ष गर्नुपर्छ भन्ने उत्प्रेरणा दियो उनलाई ।

‘त्यो बेलाई मलाई मलाई संगीत ज्ञान थिएन’, उनी हाँस्दै भन्छिन्, मात्रै प्रतियोगितामा भाग लिन्छु भन्ने थियो । पहिलो हुन्छु र फिल्ममा गीत गाउने अवसर पाउँछु भन्ने त सोचेकी नै थिइनँ ।’

पहिलो गाँसमा मीठो गाँस भेटिन् विन्दुले । फिल्मी गीत गाउनुअघि आफूले आफूलाई चिनेकी थिइनन् । त्यसपछि आफैंले आफूलाई प्रमाणित गरिन् र पूर्णकालीन संगीतमा नाता गाँस्ने प्रण गरिन् ।

गायनमा इच्छा भए पनि आफ्नो पेशा हुन्छ भन्ने दुविधामा थिइन् उनी ।

‘यही पेशामा लाग्छु भन्ने थिएन । बस्, एउटा गीत रेकर्ड होस् भन्ने चाहना भने थियो’, उनी भन्छिन्, ‘परिवार पनि मेरो मध्यम वर्गीय हो । खर्च धेरै गर्न सक्ने अवस्था थिएन । आमा बुबाले साह्रै इच्छा भए एउटा गीत रेकर्ड गराऊ न त भनेर सहयोग गर्नुभयो ।’

विन्दुका लागि काठमाडौंको भूगोल अपरिचित थियो । काठमाडौं प्रवेशसँगै संगीतमा होमिएपछि उनका लागि चुनौती थपिए । तर, दिदी भिनाजु काठमाडौंमै रहेकाले उनलाई सजिलो भयो ।

‘आर्थिक रूपमा बलियो पनि थिइनँ । पैसा पनि त्यति थिएन । कुनै सीप पनि सिकेकी थिइनँ । त्यसपछि बागबजारको एउटा टेलरिङमा लुगा सिलाउने काम पनि गरें । म्युजिक सिक्ने इच्छा जाग्यो । सुरू पनि गरें’, उनले विगत सुनाइन् ।

विन्दुले दाङदेखि काठमाडौंमा स्थापित हुन संघर्षका अनेकन घुम्ती पार गरिन् । उनले एक सय तनाखा लिएर काेरसमा पनि थुप्रै गीत गाएकी छिन् । विस्तारै उनको आवाजलाई नेपाली गीतसंगीतले चिन्न थाल्यो र जीवनका खुट्किलाहरू चढ्दै गइन् । तिनै खुट्किलाहरूले आज उनी एउटा मुकाममा पुग्न सफल भइन ।

उनी सहभागी भएको सिंगिङ आइडल प्रतियोगिताको निर्णायक संगीतकार दीपक शर्मा । उनले विन्दुको स्वरको एकदमै तारिफ गरेका थिए त्यतिबेला । पहिलो गीत गाउने अवसर दीपककै देन रहेको बताउँछिन् उनी ।

‘पर्ख पर्ख मायालु’ र ‘पहिलो नम्बरमा’मा पनि उनकै संगीत हो । यो त पछि आएका अवसर हुन् । सुरूसुरूमा त म गीतहरूको डमी गाउँथे’, उनी भन्छिन्, ‘पर्ख पर्ख मायालु’ पनि खासमा एउटा एल्बमका लागि तयार हुँदै गरेको गीत थियो । मैले त्यो गीतको डमी गाउने अवसर पाएकी थिएँ । पछि त्यो ‘मंगलम’ फिल्मको टिमले मन पराउनुभएछ ।’

मंगलम टिमले डमी सुन्दै उनको आवाज मनपराए । ख्यालख्यालमै त्यो गीत गाउने अवसर जुर्याे । उनी आफूलाई भाग्यमानी ठान्छिन् । ‘लकले फेभर गरेर पनि होला, गीत गाउन पाइयो पनि, हिट भयो पनि’, उनी भन्छिन् ।

लगभग ३ सय गीतमा आवाज दिएकी विन्दुका ‘मंगलम’ फिल्मको ‘पर्ख पर्ख मायालु’ र ‘छक्का पन्जा ३’ को ‘पहिलो नम्बरमा’, ‘घरबार’ जस्ता गीत चर्चित छन् । उनी लोकशैलीका गीत मात्रै गाउँदिनन्, विभिन्न धारका गीत गाउन पनि खप्पिस छिन् ।

कतिपय गायकगायिका निरतन्तर गीत बजारमा ल्याउने तर चर्चामा नाउँदा गायन क्षेत्रबाट पलायन भएको कुरा पनि नौलो होइन नेपाली संगीत क्षेत्रमा ।

उनी भन्छिन्, ‘म भाग्मानी हुँ या होइन भन्ने कुरा गर्दिनँ तर आपूmले गरेको कामले सकारात्मक प्रतिफल दिएपछि झन् काममा लाग्न प्रेरणा मिल्दो रहेछ ।’ उनी देश विदेशको कार्यक्रममा ब्यस्त नै छिन् पछिल्लो समय ।

उनी भन्छिन्, ‘लगभग ८ ÷९ वर्षदेखि संगीतमा संघर्ष गरिहेकी छु । यो त आफ्नो संगीतप्रतिको त्याग तपस्याले नै जुराएको हो । अझै पनि संगीतको विद्यार्थी ठान्छु आफूलाई ।’

राष्ट्रिय स्तरका विभिन्न अवार्ड तथा सम्मान पाइसकेकी विन्दु पैसाभन्दा पनि आत्मसन्तुष्टिका लागि यस क्षेत्रमा लागेको बताउँछिन् । उनी भन्छिन्, ‘पैसाकै लागि भए अन्य पेशा व्यवसायतिर लाग्थें होला । तर, संगीतले जीवनलाई नजिकबाट नियाल्न पाएकी छु । त्यसैले गीतसंगीतमै खुसी खोजिरहेकी छु ।’

पछिल्लो समय नेपाली गीतसंगीतका नाममा अश्लीलता भित्रिएको उनको ठम्याइ छ । अधिकाशं गायक–गायिका व्यापारमुखी भएर राम्रा शब्दमा बुनिएका गीतहरू छायाँमा परेको उनको बुझाइ छ ।

उनको विचारमा जीवन नै संगीत हो, संगीत नै जीवन हो । संगीतको तालमा जीवनका लयहरू पनि गाइरहने उनी बताउँछिन । ‘दर्शक स्रोताको माया पाएकी छु । संगीतलाई नयाँ स्वाद दिन कोसिस गरिहेकी छु,’ उनी भन्छिन् ।

प्रकाशित मिति: शुक्रबार, असोज १०, २०७६ ०१:१६