इसाई संस्था–एनजीओ हातेमालो, साढे २ अर्ब लगानी

A+ A A-

आजको राजधानीले नेपालका ४० जिल्लामा इसाई संघसंस्थाले विभिन्न कार्यक्रममा लगानी गरेको पाइएको समाचार प्रकाशित गरेको छ । समाज कल्याण परिषद्का अनुसार इसाई नामसँग जोडिएका ६५ वटा एनजीओ गैरसरकारी संस्थाले नेपालको शिक्षा, स्वास्थ्य, दलित, आदिवासी, बालबालिका, कृषिलगायतका क्षेत्रमा साढे २ अर्ब रुपैया बढी लगानी गरेको पाइएको समाचारमा छ ।

‘कुन कुन क्रिस्चियन एनजीओ भनेर हेरेका छैनौं । समग्रमा भन्दा बढी लगानी क्रिस्चियनहरूकै छ,’ समाज कल्याण परिषद्का सूचना अधिकारी हरि तिवारीले भने, ‘समग्रमा हेर्दा ७० प्रतिशत लगानी क्रिस्चियन संघसंस्थाकै रहेको देखिन्छ ।’

ती एनजीओले धेरैजसो लगानी शिक्षा, स्वास्थ्य, दलित र आदिसासी केन्द्रित गरेको पाइन्छ । आर्थिक वर्ष २०७५/०७६ मा क्रिस्चियन धर्मसँग सम्बन्धित अन्तर्राष्ट्रिय विभिन्न संघसंस्थाले नेपालका एनजीओमार्फत मात्र १ अर्ब ९९ करोड ६४ लाख ९० हजार ६ सय ९९ रुपैयाँ लगानी गरेको पाइएको राजधानीले लेखेको छ ।

सामुदायिक विद्यालयमा करोडौं लगानी, शैक्षिक गुणोस्तर दिनानुदिन खस्कँदो शीर्षकमा प्रमुख समाचार प्रकाशित गरेको छ । सरकारले सामुदायिक विद्यालयमा करोडौं रुपैयाँ खर्चिए पनि त्यसले उचित प्रतिफल दिन नसकेको पाइएको छ । करोडौंको लगानीले आशातीत प्रतिफल नदिएको भन्दै शिक्षा क्षेत्रको लगानी बालुवामा पानी भएको टिप्पणी शिक्षाविद्हरूको छ ।

शैक्षिक गुणस्तर दिन प्रतिदिन खस्किँदै गएकाले सामुदायिक विद्यालयप्रति अभिभावकको विश्वास गुम्ने क्रम बढेको छ । सामुदायिक विद्यालयको गुणस्तर अत्यधिक खस्किन थालेपछि न्यून आर्थिक अवस्था भएकाहरू पनि आफ्ना छोराछोरीलाई दुःख गरेरै भए पनि निजी विद्यालयमा पढाउन विवश छन् भन्दै राजधानीले समाचार लेखेको छ ।

ठूला दुवै दलमा किचलो शीर्षकमा राजधानीले पहिलो पृष्ठमा समाचार प्रकाशित गरेको छ ।

त्यस्तै राजधानीले सरकारी निकायमा भ्रष्टाचारका रुप शीर्षकमा सम्पादकीयलेखेको छ भने आतंकवादको फरक परिभाषा शीर्षकमा डा. पुरुषोत्तम मरहठ्ठाको लेख छापिएको छ ।

प्रकाशित मिति: शुक्रबार, फागुन १०, २०७५ १८:१०