एमाले सुदूरपश्चिम अधिवेशनः भीम रावल पक्ष चुनावका लागि तयार हुँदा सहमतिको सम्भावना टर्दै

एमाले सुदूरपश्चिम अधिवेशनः भीम रावल पक्ष चुनावका लागि तयार हुँदा सहमतिको सम्भावना टर्दै

A+ A A-

नेकपा एमाले सुदूरपश्चिम प्रदेश नेतृत्वका लागि सहमतिको प्रयास भए पनि पूर्वउपाध्यक्ष भीम रावल पक्षले चुनावको तयारी गरेको छ । रावल पक्षका उम्मेदवार भरत साउद प्यानलसहित चुनावमा जाने भएका हुन् ।

आकाक्षीहरूसँग नेताहरूले सहमति प्रयास गरिरहँदा पार्टी अध्यक्ष केपी शर्मा ओली र पूर्वउपाध्यक्ष भीम रावलको प्रभाव प्रदेशमा परेको छ ।

रावलनिकट उम्मेदवार साउदले प्यानलसहित उम्मेदवार बनाएपछि चुनाव हुने अवस्था आएको हो । साउदको प्यानलबाट उपाध्यक्षमा हजारी साउद, सचिवमा रतन रेग्मी, उपसचिवमा नर बहादुर बिश्वकर्मा र अर्चना गहतराज उम्मेदवार छन् ।

तर नेताहरूले सहमतिमा नेतृत्व टुंगो लगाउने प्रयास भने गरिरहेका छन् । अध्यक्षका चार उम्मेदवारमध्ये एक जनालाई अध्यक्ष बनाउने र अन्यलाई अन्य कमिटीमा व्यवस्थापन गर्ने गरी नेताहरूले खाका तयार पारी छलफल गरिरहेका छन् । अध्यक्षमा अछाममा कृष्ण प्रसाद जैशी र सचिवमा रणबहादुर चन्दलाई सर्वसम्मत बनाउने गरी प्रारम्भिक खाका तयार भएको छ । जैशी र चन्द फरक टिमबाट चुनावमा होमिने तयारीमा थिए । जौशीलाई स्थायी कमिटी सदस्य कर्ण थापाको समर्थन रहेको छ भने चन्दलाई प्रदेश अध्यक्ष दामोदर भण्डारीको समर्थन रहेको छ ।

अध्यक्षका अन्य उम्मेदवार कमल तिमिल्सिना, कृष्णप्रसाद जैशी, वचनबहादुर सिंह सहमत भए पनि भरत साउद भने चुनावमा जाने पक्षमा छन् ।

प्रदेशको सचिवमा रणबहादुर चन्द, राजेश खाती, रतनराज रेग्मी, जीवन कुमार बमले उम्मेदवारी दिएका थिए । बमले उम्मेदवारी फिर्ता लिइसकेका छन् ।

उपाध्यक्षमा हरिसिंह साउद, बलदेव रेग्मी, रणबहादुर महरा, कालिबहादुर शाही, हजारीसिंह साउद र गजेन्द्र बहादुर शाहीले उम्मेदवारी दिएका छन् ।

उपसचिव (महिला)तर्फ भागरथी विष्ट, कन्दकलाकुमारी राना र अर्चना गहतराजले उम्मेदवारी दिएका छन् । उपसचिव खुल्लातर्फ रामदत्त जोशी, अशोककुमार चन्द, नरबहादुर बिक, सुरेन्द्रबहादुर पाल, हरदेव जोशी र पल्लभराज भट्ट उम्मेदवार छन् । उम्मेदवारी दिएकाहरुका बीचमा ल्याएर सहमतिको प्रयास भइरहेको छ । मंगलबार पाँच बजेबाट मतदान सुरू हुने कार्यतालिका यसअघि सार्वजनिक भए पनि रातिसम्म मतदान सुरू भएन ।

प्रकाशित मिति: मंगलबार, असोज २३, २०८० २१:५१