परिवारकाे सहारा बन्न इजरायल पुगेका लाेकेन्द्र उतै अस्ताए

A+ A A-

दार्चुलाको मालिकार्जुन गाउँपालिका– ४ का लोकेन्द्रसिंह धामी इजरायलमा हमासको आक्रमणमा परी मारिएका छन् । उमेर २७ वर्ष मात्रै पुगेका उनको विदेश गएको एक महिना नपुग्दै मृत्यु भएको हो ।

धामीका काका किसनसिंह धामीले भने, ‘ऋण निकालेर विदेश गएको हो । अब परिवारलाई थप आर्थिक समस्या झेल्नुपर्ने अवस्था छ ।’

घरमा लोकेन्द्रका हजुर आमा, हजुरबुवा, आमा, बुवा र दाइका साथै उनी श्रीमती मञ्जु धामी, १४ महिनाका छोरा सुप्रिम, ५ वर्षकी छोरी जेनिशा रहेका छन् । परिवारको कान्छो छोरा रहेका लोकेन्द्रको मृत्युले परिवार नै स्तब्ध बनेको छ । मृतक लोकेन्द्रसिंह धामीकी श्रीमती मञ्जु अहिले बोल्न सक्ने अवस्थामा छैनन् ।

काका किसनसिंहले भने, ‘परिवारको कान्छो छोरा लोकेन्द्र बुढेसकालका हजुरबुबा हजुरआमा, आमाबुवाका सहारा थिए । साथै, श्रीमती र छोराछोरीको भविष्य बनाउनका लागि ऊ इजरायल पुगेको थियो । अहिले ऊ परदेशकै भूमिमा अस्तायो ।’

त्यसैगरी, दार्चुलाको लेकम गाउँपालिका– ५, टकनाका २५ वर्षीय दिपेशराज विष्टकी आमा अहिले अस्पतालमा छिन् ।इजरायलमा छोराको मृत्यु भएको खबर छिमेकी तथा सामाजिक सञ्जालबाट पाएपछि बेहोस बनेकी उनलाई अस्पतालमा भर्ना गरिएको हो ।

दार्चुलाबाट महेन्द्रनगर जान भनेर हिँडेकी विष्टकी आमा बेहोस भएपछि गोकुलेश्वरमा स्लाइन पानी दिएर भर्ना गरिएको छ । प्रमुख जिल्ला अधिकारी किरण जोशीसहितको टोलीलाई विष्टकी आमाले भनिन्, ‘अब जे हुन भई नै सक्यो । जतिसक्दो चाँडो शव नेपाल ल्याइदिनुहोला ।’

पढाइसँगै कमाउने रहरले इजरायल पुगेका विष्टले पहिलो तलब नपाउँदै ज्यान गुमाउनुपर्‍यो । उनले असोज ३ गतेदेखि आफ्नो काम सुरु गरेका थिए । काम गरेको एक महिना पूरा हुन नपाउँदै अचानक भएको अप्रिय घटनामा उनको मृत्यु भएको छ ।

दार्चुलाका लोकेन्द्रसिंह र दिपेशसँगै कैलालीको घोडाघोडी–४ का नारायणप्रसाद न्यौपाने, बझाङको जयपृथ्वी– ६ का गणेशकुमार नेपाली, कैलालीकै आशिष चौधरी, धनुषाका आनन्द साह, सुनसरीका राजेशकुमार स्वर्णकार, डोटीका राजन फुलारा र पदम थापा र सल्यानका प्रवेश भण्डारीको पनि हमासको आक्रमणमा परी मृत्यु भएको पुष्टि भइसकेको छ ।

शव ल्याउन पहल गर्छौं : प्रजिअ किरण जोशी

इजरायलमा ज्यान गुमाएका दार्चुलाका दिपेशराज विष्ट र लोकेन्द्र धामीको परिवारलाई प्रमुख जिल्ला धिकारीसहितको टोलीले भेटघाट गरेको छ ।

सोमबार दार्चुलाका प्रमुख जिल्ला अधिकारी किरण जोशी, सशस्त्र प्रहरीको नम्बर ४४ गणका गणपति तथा एसपी डम्बरबहादुर विष्ट, जिल्ला प्रहरी कार्यालय दार्चुलाका डीएसपी शिवबहादुर सिंह र राष्ट्रिय अनुसन्धान विभागका जिल्ला प्रमुख डीएसपी भगिन्द्रबहादुर चन्दसहितको टोलीले सोमबार मृतकको परिवारसँग घरमै पुगेर भेटघाट गरेको छ ।

भेटघाटमा पीडित परिवारले जतिसक्दो चाँडो शव नेपाल ल्याइदिन टोलीसँग आग्रह गरेको छ । भेटमा प्रजिअ जोशीले नेपाल सरकार तथा सीडीओ कार्यालयबाट गर्नुपर्ने काम र पहलमा कुनै कमी हुन नदिई आफू लाग्ने प्रतिबद्धता व्यक्त गरेका छन् ।

प्रकाशित मिति: सोमबार, असोज २२, २०८० १९:०६