नारायणकी आमालाई अझै लाग्छ– छोरा मरेको छैन, फर्केर आउँछ

A+ A A-

घरभित्र रुवावासी चलिरहेको छ । हरिकृष्ण न्यौपाने मूर्च्छित देखिन्छन् । उनको मुखबाट शब्द पनि आइरहेको छैन । इजरायलमा हमासले आक्रमण गर्दा मृत्यु भएका कैलालीको घोडाघोडी नगरपालिका वडा नम्बर ४ का नारायणप्रसाद न्यौपानेको घर मात्र होइन, गाउँ नै शोकमा डुबेको छ ।

नारायणप्रसादकी सानी आमा (कान्छी आमा) सीता न्यौपानेले सामाजिक सञ्जाल तथा छिमेकीबाट आफ्नो छोरा मरेको खबर पाइन् । तर, अहिलेसम्म उनलाई विश्वास भने छैन । उनले भनिन्, ‘इजरायल आक्रमणमा परी मेरो छोरा मरेको खबर सुनेँ । मलाई अहिलेसम्म विश्वास छैन । मेरो छोरा फर्केर आउँछ । ती सबै १० जना फर्केर आउँछन् ।’ उनले सामाजिक सञ्जाल र छिमेकीबाट सुनेको खबर झुटो हुने अपेक्षा गरिन् ।

शव देख्न नपाएको हुँदा अब छोराको फोन आउँछ कि भन्ने पर्खाइमा छन् उनी । उनले एकाएक छोरा मरेको कुरा विश्वास गर्न सकिरहेकी छैनन् ।

‘लर्न एन्ड अर्न’ कार्यक्रमअन्तर्गत इन्टर्नसिपमा अध्ययन गर्न करिब एक महिनापहिले नारायणप्रसाद इजरायल गएका थिए । पढाइका लागि लिइएको ऋण तिर्न तथा पक्की घर बनाउने सपनासहित उनी इजरायल गएको आमा सीताले बताइन् । ‘पढ्दै कमाउँदै नयाँ घर बनाउँछु भन्थ्यो,’ उनले छोराले फोन सम्पर्कमा भनेको कुरा स्मरण गर्दै भनिन्, ‘घर बनाउन पैसा म पठाऊँला, ढुङ्गा झार्दै गर्नुहोला ।’

नारायणप्रासद इजरायल जानका लागि भदौ २० गते घरबाट निस्केका थिए । उनले भदौ २५ गते राति १२ बजे विदेश जाँदै छुु आमा भनेर फोन गरेको कुरा आमा सीताको स्मरणमा अझै ताजै छ । ‘त्यहाँ पुुगेपछि आफ्नो काम हामीलाई सुनाएको थियो,’ उनले भनिन्, ‘घरका हामी सबै काम देखेर खुसी भएका थियौँ । तर, आक्रमणको घटनाले मनलाई विक्षिप्त बनाएको छ ।’

जेठा छोरा धर्मराज न्यौपानेले भाई नारायणलाई पढाउनुुपर्छ भनेर १० वर्षदखि भारतको बैङ्गलोरमा काम गरिरहेका छन् । उनले आफ्नो भाइलाई पढाउन भारतमा काम गरिरहेको आमा सीताले बताइन् । उनले नारायणलाई पढाएर केही गर्छ भन्ने आशासहित विदेश पठाएको बताइन् ।

घरपरिवारको दैनिकी चलाउन धर्मराज रोजगार छन् । भारतको बैङ्गलोरमा काम गर्दै घर खर्च उनले पठाइरहेको सीताले बताइन् । ‘सानो छोरा करिब १२ वर्षको छ । तीन छोरामा माइलो नारायण उमेरले २२ पुुग्दै थिए । २०५८ साल फागुुनमा उनको जन्म भएको हो,’ आमा सीताले भनिन्, ‘धर्मराज आफूले नपढे पनि भाइलाई पढाउँछुु भनेर भारतमा काम गर्न गयो ।’ नारायणका बुवा हरिकृष्ण अशक्त छन् । घरमा आर्थिक अवस्था राम्रो नभएको सीताले सुनाइन् ।

‘छोराले अब घर बनाउनुपर्छ आमा भनेको थियो तर, छोराको सपना टुुट्यो । मेरो छोरा जानुुभन्दा म गए पनि हुन्थ्यो । अब हाम्रो के काम छ र ? हाम्रो त उमेर पनि पुुगिसक्यो,’ उनले पाँच दिनअघि मात्रै छोरासँग कुरा गरेको सम्झिँदै भनिन्, ‘छोराले केही गर्ला भनेर ऋण काढेर पठाएका थियौँ । हामीलाई के थाहा, यस्तो दिन देख्नुुपर्छ भनेर ?’

नारायणकी आमा रूपाको मृत्युु भएपछि सीता त्यस घरमा कान्छी आमाको रूपमा आएकी थिइन् । सानैबाट आफ्नै हातले पालनपोषण गरेको छोराले यसरी एक्कासि छोडेर जाँदा आफ्नो सहारा नै टुुटेको उनी सुनाउँछिन् ।

प्यालेस्टाइनी हमास समूहको आक्रमणबाट १० जना नेपाली विद्यार्थीको मृत्युु भएको थियो । आइतबार साँझ इजरायलस्थित नेपाली दूतावासले उनीहरूको मृत्युु भएको पुष्टि गरेको थियो । जसमा मारिनेमा सात जना सुदूरपश्चिमका रहेका छन् । अहिले सिङ्गो मुुलुुकसँगै सुदूरपश्चिम पनि शोकमग्न छ ।

छोराहरू गुमाएका आमाबुबाहरू अहिले विक्षिप्त छन् । आक्रमणमा मृत्यु हुनेमा कैलाली घोडाघोडी नगरपालिका– ४ का नारायणप्रसाद न्यौपाने, कैलालीकै बौनिया– ३ का आशीष चौधरी, डोटी पचनली– ३ का राजन फुलारा, डोटीकै लमिखाल– ८ का पदम थापा, दार्चुला लेकम– ५ का दीपेशराज विष्ट, दार्चुला मालिकार्जुन– ४ का लोकेन्द्रसिंह धामी, बझाङ जयपृथ्वी– ६ का गणेशकुमार नेपाली रहेका छन् ।

यस्तै, धनुषा सपाही– ६ का आनन्द साह, सुनसरी मधुवन– १ का राजेशकुमार स्वर्णकार र सल्यान शारदा– ३ का प्रवेश भण्डारी रहेका छन् भने अन्य चार जना अस्पतालमा उपचाररत छन् । घाइतेहरूमा सल्यान शारदा– २ का विधान सेजवाल, दाङ दङ्गिशरण वडा नम्बर– ३ का प्रवीण डाँगी, कैलाली टीकापुर– ९ का धनबहादुर चौधरी, गोरखा– ८, गोर्खाका हिमाञ्चल कट्टेल र कंचनपुर भीमदत्त– ३ का विपिन जोशी छन् ।

प्रभावित सबै विद्यार्थी सुदूरपश्चिम विश्वविद्यालय कृषि संकायअन्तर्गत टीकापुर बहुमुखी क्याम्पसका रहेको बताइएको छ । इजरायलमा सिक्दै कमाउँदै कार्यक्रमअन्तर्गत कुल २ सय ६५ विद्यार्थी इजरायल गएका छन् । तीमध्ये ४९ जना सुदूरपश्चिम विश्वविद्यालयका हुन् । त्यसमा पनि प्रभावित १७ जना सुदूरपश्चिम विश्वविद्यालयकै हुन् ।

प्रकाशित मिति: सोमबार, असोज २२, २०८० १६:२१