अपहरणमा परेको नाटक गर्ने पौडेल प्रहरी नियन्त्रणमा

A+ A A-

अपहरणको अभिनय गरी परिवार र प्रहरीलाई झुक्याउने एक व्यक्ति पक्राउ परेका छन् । लेनदेनको विषयमा कुरा नमिलेपछि अपहरणमा परेको अभिनय गर्ने पोखरा फूलबारीका नारायणप्रसाद पौडेललाई प्रहरीले पक्राउ गरेको हो ।

पौडेलले यही ४ असोज दिउँसो आफू अपहरणमा परेको भन्दै परिवारमार्फत प्रहरीलाई जानकारी गराएका थिए । उनी अपहरणमा परेको सूचना पाएपछि जिल्ला प्रहरी कार्यालय कास्कीले खोजीकार्य तीव्र पारेको थियो । प्रहरीले अपहरणको विषयलाई निकै गम्भीर रुपमा लिएर खोजी थालेपछि पौडेल स्वयं रुपन्देही जिल्ला प्रहरी कार्यालमा पुगेर आफूलाई पोखराबाट अपहरण गरी अपहरणकारीहरुले छाडेर भारततर्फ गएको जानकारी गराएका थिए ।

प्रहरीले रुपन्देहीबाट पोखरा ल्याइ अनुसन्धान गर्दा जग्गाको कारोबार गर्ने क्रममा पैसा लेनदेनमा कुरा नमिलेपछि विपक्षीलाई फसाउनका लागि आफू अपहरणमा परेको नाटक गरेको प्रहरीसमक्ष उनले स्वीकार गरेको कास्की प्रहरीले जनाएको छ ।

अपहरणमा परेको नाटक गर्ने पौडेल आफैं रुपन्देही गएको र त्यहाँ गएर उजुरी दिएको खुल्न आएको जिल्ला प्रहरी कार्यालय कास्कीका डीएसपी राजकुमार केसीले जानकारी दिए । लेनदेनको विषयबाट छुटकारा पाउन पौडेलले आफ्नै अपहरणको नाटक गरेको केसीले बताए ।

पौडेलविरुद्ध सार्वजनिक मुद्दामार्फत अनुसन्धान अगाडि बढाइएको कास्की प्रहरीका प्रवक्ता प्रहरी नायव उपरीक्षक राजकुमार केसीले जानकारी दिए ।

‘आफूले आर्थिक हिसाब दिन बाँकी रहेका मानिसलाई फसाउनका लागि अपहरणको नाटक गरेको खुल्न आएको छ,’ डिएसपि केसीले भने, ‘यसबारे हामी थप अनुसन्धान गरिरहेका छौं ।’

प्रकाशित मिति: बुधबार, असोज ८, २०७६ ०५:२८