प्रचण्डप्रति ओलीको कटाक्षः मानसरोवरमा डुबुल्की लगाउँदैमा पाप कट्दैन

A+ A A-

नेकपा एमालेका अध्यक्ष केपी शर्मा ओलीले प्रचण्ड नेतृत्वको सरकारले भ्रष्टाचारको ढाकछोप गर्ने मात्र नभई भ्रष्टाचार गरिरहेको समेत आरोप लगाएका छन् । एमाले सुदूरपश्चिम अधिवेशनको आइतबार धनगढीमा उद्घाटन गर्दै उनले २ साउनमा बरामद भएको सुनको परिमाणमा प्रश्न उठाए ।

सुन तस्करीको अनुसन्धानमा सरकारले तमासा मात्र गरेको भदै उनले भने, ‘एमालेको सरकारको पालामा कहिले यति, कहिलो ओम्नी भन्ने, अहिले सय केजी सुनमा ६१ केजी भयो, ३९ केजी कहाँ गयो ?’ सरकार तस्करी ढापछोप गर्न लागेकै कारण जाँचबुझ आयोग बन्न समय लागेको समेत उनले बताए ।

ब्रेक शुमा लुकाएर ल्याएको सुन भन्सार जाँचपास भइसकेको अवस्थामा राजस्व अनुसन्धान विभागले बरामद गरेको थियो । सुरुमा करिब एक क्विन्टल भनिएको सुन ब्रेक शुसहित जोख्दा १ सय ५५ किलो भएको थियो । राष्ट्र बैंकको टक्सार विभागले सुन निकालेर गालेर खोजेको थियो, जस क्रममा करिब ६१ किलो मात्र सुन भएको पुष्टि भएको थियो ।

प्रधानमन्त्री प्रचण्ड जनताप्रति उत्तरदायी नभएको टिप्पणी पनि गरेका छन् । अहिले देश चम्किने र जनता सम्झिने सरकार नभएको उनको भनाइ थियो । ओलीले प्रधानमन्त्री प्रचण्ड विदेश भ्रमण र धर्मकर्ममा मात्र केन्द्रित भएको बताए ।

‘अहिले देशमा सरकार छ कि छैन रु के दुई धाम गरेर मात्रै हुन्छ ?’, उनले भने, ‘जनतालाई माया नगरेपछि, देशलाई माया नगरेपछि चन्दन लगाएर गेरुवस्त्र लगाए पनि पाप कट्दैन, मानसरोवरमा डुबुल्की लगाउँदैमा पनि पाप कट्दैन ।’ प्रधानमन्त्री पुष्पकमल दाहाल प्रचण्ड चीन भ्रमणका क्रममा मानसराेवर पुगेका थिए ।

प्रचण्ड नेतृत्वको सरकार आएपछि मुलुकको अर्थतन्त्र ओरालो लागेको उनको आरोप थियो । ‘नेकपा एमालेले सरकार छाडेपछि अर्थतन्त्र ओरालो लाग्यो । हिंसा बढिरहेको छ । ७ प्रतिशतभन्दा माथि पुर्‍याइएको आर्थिक बृद्धि यो गठबन्धनले २ प्रतिशतभन्दा तल झारिसकेको छ’, उनले भने, ‘देश अप्ठेरो अवस्थामा पुगेको छ । अझै अप्ठेरो गतिमा पुर्‍याउनु हुँदैन ।’

अधिवेशनबाट नेतृत्व चयन गर्ने विषयमा भने ओली सर्वसम्मत गर्न नेताहरूलाई निर्देशन दिएका छन् । ओलीले उपत्यका विशेष प्रदेश कमिटीले सदस्यदेखि अध्यक्षसम्म सर्वसम्मत चयन गरेको कुरा स्मरण गर्दै सुदूरपश्चिमबाट पनि सोही सन्देश प्रवाह गर्न आग्रह गरे ।

‘अहिलेसम्म कहीँ पनि सहमति हुन सकेन तर उपत्यका विशेष प्रदेश कमिटीले सदस्य र पदाधिकारी सबै सर्वसम्मत चयन गरेको छ । उहाँहरूलाई धन्यवाद छ, योभन्दा ठूलो धन्यवाद तपाईंहरू दिन पाउँ,’ ओलीले भने, ‘जिल्ला, भूगोल सबैतिर सर्वसम्मत बनाउनुस् । जसले कमिटीको नेतृत्व गर्न सक्छ सबै मिलेर उसलाई छान्नुस् । निजी उम्मेदवार उभ्याउने, जिद्दी गर्ने काम नगर्नुहो्स ।’

ओलीले नेतृत्वले क्षमता, योग्यता र दक्षता हेरेर मूल्याङ्कन गर्ने बताउँदै आफ्नो मूल्यांकन कसैले पनि नगर्न भन्दै सबै नेताहरू बसेर टुंगो लगाउन निर्देशन दिए । ‘नेतृत्वले काम, विचार, क्षमता हेरेर मूल्यांकन गरेको हुन्छ तर मान्दै नमान्ने होइन । सकभर नेतृत्वको भर पर्नुस्,’ उनले भने, ‘मैले केही भन्दिनँ यतैका साथीहरू एक ठाउँ बसेर टुंग्याउनुस् । सबैले यस्तो सल्लाह भयो भनेर भन्नुस म स्वीर्काछु ।’

निर्वाचन आयोगलाई सरसम्मान पठाइदिन पनि उनले आग्रह गरे ।

प्रकाशित मिति: आइतबार, असोज २१, २०८० १८:३०