माओवादी खाओवादी भएकै हो, यसलाई बदल्छौँ: झक्कु सुवेदी (अन्तर्वार्ता)

A+ A A-

नेकपा माओवादीका नेता झक्कु सुवेदीले पार्टीको जारी अभियानप्रति जनताको ठूलो आकर्षण रहेको बताएका छन् ।

शिलापत्रसँगको भिडियो कुराकानीमा नेता सुवेदीले यो तीनमहिने अभियानले पार्टी पुरानै लयमा फर्कने दाबी गरे । ‘हामी अहिले जनताका कुरा सुनिरहेका छौँ । हामी बिग्रिएको सत्य हो, जनताले भनेअनुसार नै हाम्रो पार्टी अघि बढ्छ,’ उनले भने ।

नेता सुवेदीले कुराकानीका क्रममा भने, ‘पार्टीको विचारमा समस्या होइन, हाम्रो आचरण, व्यवहार साँच्चिकै बिग्रिएकै हो ।’ नेताहरू जनताको घरघरमा गएर सुझाव संकलन गर्दै हिँडेकाले पार्टी र जनस्तरको सम्बन्धमा व्यापक सुधार हुने उनले दाबी गरे ।

माओवादीमा वैचारिकदेखि सांस्कृतिक विचलन आएकाले गम्भीर आलोचना भइरहेको बेला भएको यो अभियानले नेताहरूलाई सुध्रिने मौका पनि हुने उनको भनाइ छ । सरकारको आफैँ नेतृत्व गरिरहेको माओवादीले छुट्टै राजनीतिक अभियान किन लैजान पर्‍यो ? सरकारमार्फत जनतालाई राहत दिने र परिवतर्नको आभाष दिए माओवादीप्रति यसै जनमत बढ्थ्यो नि भन्ने प्रश्नमा उनले भने, ‘सरकारले गरेका काम जनताको बीचमा लैजान पनि यो अभियान आवश्यक पर्‍यो । प्रचण्ड सरकारले गरेका राम्रा काम पनि तपाईंहरूले मार्केटिङ गर्न सक्नु भएन भनेर जनताले पनि गुनासो गरेका छन् ।’

सच्चिनुपर्ने नेतृत्व छ, जुन सत्ताबाहेक केही देख्दैन, तपाईं पुरानै माओवादी शक्ति निर्माण गर्छौं भन्नुहुन्छ जनतालाई फेरि झुक्याउन जानुभएको भन्ने प्रश्नमा उनले भने, ‘प्रचण्ड पनि सच्चिने कुरो छ ।’ माओवादीप्रतिको हिजोको जस्तै विशाल आकर्षण नघटेको तर कतिपय नेताहरूको व्यवहार र आचरणका कारण जनता रिसाएको उनको भनाइ थियो ।