इथियाेपियामा बन्धक युवालाई दलालकाे धम्की- पत्रकारको फोन वा म्यासेज आए त्यहीँ सिध्याइदिन्छु (फलाेअप)

इथियाेपियामा बन्धक युवालाई दलालकाे धम्की- पत्रकारको फोन वा म्यासेज आए त्यहीँ सिध्याइदिन्छु (फलाेअप)

A+ A A-

एक वर्षदेखि इथियाेपियाको राजधानी अडिसाबाबामा बन्धक बनाइएका युवाहरूलाई त्यहाँ पुर्‍याउने मानव तस्करले आफ्नो फोन नम्बर मिडियालाई दिएमा र मिडियाबाट फोन वा म्यासेज आएमा ज्यान मार्ने धम्की दिएका छन् ।

उनीहरूलाई अमेरिका लैजाने भनेर इथियाेपिया पुर्‍याउनेमध्येका एक प्रविण गिरीले त्यस्ताे धम्की दिएका हुन् । गिरीले फाेन गरेर धम्क्याएकाे उल्लेख गर्दै बन्धक एक युवाले टेलिफोनमा भने, 'समाचार आएपछि उनी सम्पर्कमा आएका थिए । अब कोही पनि मानिसको मलाई फोन वा म्यासेज आए तिमीहरू फर्केर आउँदैनौँ, त्यहीँ सिध्याइदिन्छु। यत्ति कुरा बुझिराख भनेर फाेन राखे ।'

दलालहरू करिब ६ महिनादेखि सम्पर्कविहीन थिए । गत बिहीबार शिलापत्रमा प्रकाशित समाचारमा नाम आएपछि गिरी सम्पर्कमा आएको पीडितहरू बताउँछन् । उनीहरू भन्छन्, 'लामो समयपछि दलालको फोन आयो । अब केही हुन्छ कि भन्दा उल्टै ज्यान मार्ने धम्की आयो ।'

दलाल गिरीको त्यो धम्कीपछि भने फोन नआए पनि दलालका सहयोगीले फोन गरेर नानाथरीका कुरा गर्ने गरेकाे युवाहरू बताउँछन् । बन्धक बनाइएका पाँच जनासँग भने अहिले पासपोर्ट नै छैन । उनीहरू जसरी भए पनि नेपाल फर्किने योजना लिएर स्थानीयको सहयोगमा ओभरस्टे शुल्क तथा जरिवाना बुझाउन डेढ महिनाअघि इथियाेपियाकाे सुरक्षा अध्यागमन तथा शरणार्थी मामिला अधिकार, अध्यागमन तथा राष्ट्रिय मामिलाको मुख्य कार्यालय पुगेका थिए ।

तर, विभागले तिमीहरू कसरी यहाँ आयौँ, कहाँ जान खोजेको यो सब हामीलाई थाहा छ भन्दै एजेन्ट को हो ? त्यसलाई ल्यायौँ भने मात्र पासपोर्ट दिन्छौँ भनेर फर्कायो । एजेन्ट सम्पर्कविहीन भएकाले खाेसिएकाे पासपोर्ट नपाइने तनाव बढेको उनीहरू बताउँछन् ।

गिरीको ज्यान मार्ने धक्कीपछि ती युवाहरू मनोवैज्ञानिक रूपमा त्रसित छन् । पीडितहरूले नेपाल सरकार यो विषयमा चासाे देखाएर तत्काल उद्धारका लागि याचना गरेका छन् । दलालले यसअघि पनि बारम्बार आफूहरूलाई नआत्तिनु, या त अमेरिका उडाउँछु या त नेपाल झिकाउँछु भन्दै आएका थिए । तर, महिनाैँसम्म कुनै प्रगति नभएपछि युवाहरू बन्धक बनेका हुन् ।

पीडितहरू भन्छन्, 'यहाँसम्म पुर्‍याउने दलालको नेपाल फर्काउने आश्वासनले करिब एक वर्ष एउटै ठाउँमा कुरेरै बसियो । अब दलालले उद्धार गर्ने छाँट देखिएन । सरकारले नै जति सक्यो चाँडो उद्धार गराेस् भन्ने चाहन्छाैँ । हामी यहाँ अप्रिय निर्णय गर्नुपर्ने स्थितिमा पुगेका छाैँ ।'

परिवारले भने छोराहरू नेपाल फर्किने आशामा ऋण खोज्दै पैसा पठाएका छन् । आफूहरूका कारण सिंगाे परिवार ऋणमा चुर्लुम्म डुबेको हुँदा अब भने कुनै पनि हालतमा पैसा पठाउन नसक्ने बताएकाले उद्धारका लागि सरकारले नै पहल गर्नुपर्ने उनीहरूकाे माग छ ।

उनीहरूलाई अमेरिका पठाउने मुख्य मानव तस्करका रूपमा प्रविण गिरी रहेको र उनको अर्को साझेदारमा थलवीर कुँवर रहेको परिवारकाे दाबी छ । सिस्ने गाउँपालिका, स्यालापाखा, रुकुमका गिरी केही वर्षदेखि मित्रनगर बानेश्वरमा बस्दै आएका छन् भने उनका मुख्य सहयोगी कुँवर पनि सोही स्थानका हुन् । उनी हाल घोराही उपमहानगरपालिका-१६, बयरबटुवाका हुन् । गिरीले भारतको चण्डीगढमा पनि घर भाडामा लिएको र नेपाली युवाहरूलाई अमेरिका लग्ने आश्वासन दिँदै चण्डीगढको त्यही घरमा लामो समयसम्म राख्ने गरेको पाइएको छ ।

गत एक वर्षयता गिरी भने दुबईमा बस्दै आएका छन् । गिरीले त्यहीबाट मानव तस्करको र्‍याकेट चलाउँछन् । गिरीले अहिले पनि अमेरिका, युरोप र क्यानडा पठाउने भन्दै करिब दुई सयभन्दा बढी युवालाई दुबईमा लगेका छन् । अहिले पनि युवाहरू विभिन्न देशमा पठाउने प्रलोभन देखाउँदै कम्तीमा ४० लाख लिने र दिल्ली तथा दुबईमा राख्ने गरेकाे पाइएकाे छ । लाखाैँ रकम असुली गरिसकेपछि अनलाइन भिसा पाउने देशहरूमा पठाएर सयौँ जनालाई अलपत्र पारेको बुझिएको छ ।

समाचार सार्वजनिक भएपछि बन्धक युवाहरूलाई काठमाडौंस्थित मानव बेचबिखन नियन्त्रण ब्युरोबाट पनि फोन गएको थियाे । बन्धक युवाहरूले यथार्थ बताएकाे र केही पहल हुनेमा आशा पलाएको बताएका छन् । दलाल गिरीले भने आफू नेपाल बाहिर भएकाले प्रहरी प्रशासनले केही गर्न नसक्ने भन्दै धम्क्याएका थिए ।

इथियाेपियामा बन्धक बनाइएकाहरू सबै दाङका युवा छन् । दंगीशरण गाउँपालिका दुई जना, शान्तिनगर गाउँपालिका, घोराही र तुलसीपुर उपमहानगरका एक/एक जना रहेका छन् । आफूजस्तै हजारौँ युवा अन्य देशमा हुन सक्ने भएकाले बाटोमै अलपत्र पारेर छाड्ने मानव तस्करलाई नियन्त्रण गर्न उनीहरूले सरकारसँग माग गरेका छन् ।

मानव तस्करलाई कडाभन्दा कडा कारबाहीका लागि कानुन निर्माण गर्न पनि पीडितकाे माग छ ।

यो पनि :

अमेरिका हिँडेका दाङका पाँच युवा इथियोपियामा एक वर्षदेखि बन्धक (भिडियोसहित)

प्रकाशित मिति: आइतबार, असोज २१, २०८० १४:५६